Read Angguruk Yali YOSUA 12 Bible Online

YOSUA 12 - Angguruk Yali bible

YOSUA 12

¹Israel inaben ap suwon piren ik Yordan yali fil welatfahon itano apmayap eneptuk lit it enengginang ik Arnon famen tulug Yordan tonggo keyen tom Hermon fam ilmig tibag.

²Ap suwon apmayap enepfahon misig Amori inap onowe suwon unuk Sihon welatfag. Sihon ibam o Hesbon wereg lit o Gilead kinang pul keyen minggiroho seneg latfag. Kinang ino o Aroer ik Arnon ayegma werehon ino famen tulug o pumbuk ik Arnon tonggo pulmu werehon keyen Amon inap enengginang hili ik Yabok ino fam Sihon inowen seneg latfag.

³Ik Yordan paloho tonggo yali fil werehon ino ik sene yenggelehon Galilea famen tulug ik ambut fil o Bet-Yesimot ik Il Warehon ilanma werehon ino keyen kinang tom Pisga alma werehon fam Sihon inowen oho seneg latfag.

⁴Ap suwon eke o Basan seneg latfahon Israel inaben apmayap enepfahon unuk Og welatfag. Og ino Refaim inap[7] tam anggolo welatfag angge famen eleg atfareg tor angge welatfahonen ondohowon wereg lit ibam o Astarot men Edrei men welatfag.

⁵Og inowen tom Hermon famen tulug o pumbuk Salkha men o Basan kinang keyen Gesur kinang men Maakha kinang men seneg latfag. Gilead kinang oho pul keyen minggiroho seneg lit ap suwon Sihon o Hesbon welatfahon angginang hili fam kinang ari obog toho Og inowen seneg latfag.

⁶Sihon men Og men NINIKNI Allah amingmingangge Musa men otsi Israel inap menen apmayap enepfareg it enengginang seneg lamuhuben Ruben inap men Gad inap men Manasye inap pul ke minggiroho welatfahon men og isibag.

⁷Yosua men otsi Israel inap menen ap suwon ik Yordan hubula fil welatfahon arimano apmayap enepfag. Ap suwon arimanowen o pumbuk Baal-Gad tom Libanon alma tonggoma werehon famen tulug ik ambut fil Tom Leimu o Edom kinang horogma werehon fam kinang obog toho seneg latfag. Kinang ari Yosua inowen ilmig tibareg Israel inap ununggul unuk wal taneg ngi roho welamuhuben fibir isibag.

⁸Kinang fibir isibahon ino tom men hebe yali fil hubula fil werehon men ik Yordan tonggo men lek ik ambut fil werehon ino men tam Het inap, Amori inap, Kanaan inap, Feris inap, Hewi inap, Yebus inap men yug toho welatfag ambeg ino ketiya Israel inap ngi roho welamuhup ulug og isibag.

⁹Og isibag ambeg arimano tam ap suwon teng misig nubam hilag uhanen 31 seneg latfag. Ap suwon arimano inibam tuma emberuk lahe: o Yerikho, Ai o pumbuk Betel horogma werehon ino men, o Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, o Yokneam tom Karmel alma werehon ino men Dor hebe fam wirihon ino men Goyim o Galilea kinangma werehon ino men o Tirza men welatfag.