Read Angguruk Yali YOSUA 13 Bible Online

YOSUA 13 - Angguruk Yali bible

YOSUA 13

¹Hun Yosua ino mondabi sabal atfagma NINIKNI Allahn at ubam ele uruk lit, ”Yosua, hat sabal atikinmu hiren kinang ilmig tarikip fug ambeg anggolo werehon fahet Anden hiyag hitmin.

²Filistin inap enengginang obog toho men Gesur inap enengginang men

³Awi inap enengginang ik ambut fil werehon men hiren ilmig ta lahup. O Mesir kinang hili ik Sikhor ino famen tulug ik eleruk fil o Ekron horogma o Kanaan kinang wereg. Filistin inap onowesi suwon o Gaza, Asdod, Askelon, Gat, Ekron men wereg.

⁴O Kanaan kinang obog toho men o pumbuk Meara Sidon inaben tohon ino famen tulug o pumbuk Afek o Amori inap enengginang horogma werehon ino fam kinang ari oho fobik ilmig tahup.

⁵O Gebal inap enengginang men kinang Libanon yali fil werehon obog toho o pumbuk Baal-Gad tom Hermon alma werehon famen tulug o Hamat laruk abunggalem fam kinang ari oho hit fobik ngi arik kuhup.

⁶Sidon inap tom Libanon famen tulug punumu yug toho wereg inap enembeg o Misrefot-Maim oho hit fobik ngi amuhup. Ap ihiyon arimano obog toho Anden fobik hit Israel hinap honolohotman yanggal enebuhuk. Yanggal enebuhuk ambeg arimano Israel inap ununggul unuk sohowen men ununggul unuk Manasye inap pul ke minggiroho werehon men wal taneg ngi roho welamuhuben haren ketiya Anden hiyag hitikik ane hikit toho enehangge unubam hik turuk lit kinang ari obog toho fibir isahun,” ulug NINIKNI Allahn Yosua hiyag itfag.

⁸Ununggul unuk Manasye inap pul ke minggiroho winon arimano men Ruben inap men Gad inap men yug toho welamuhup ambeg ulug NINIKNI Allah amingmingangge Musa inowen kinang ik Yordan yali fil werehon ino tam og isibag.

⁹Og isibag ambeg arimano o Aroer ik Arnon ayegma werehon men, o pumbuk tonggo pulmu werehon men, tom atelma tonggo reg ambeg o Medeba famen tulug o Dibon fam oho,

¹⁰tam o pumbuk Amori inap onowe suwon Sihon o Hesbon welatfahonen seneg latfahon arimano obog toho men, Amon inap enengginang horogma werehon men,

¹¹o Gilead kinang men, Gesur inap enengginang men, Maakha inap enengginang men, tom Hermon men, o Basan kinang famen tulug o pumbuk Salkha fam oho, kinang arimano obog toho og isibag.

¹²Nin ap suwon Og ino Refaim inap[8] anggolo welatfag angge famen eleg atfareg tor angge welatfahonen ondohowon angginang o Astarot men Edrei men oho og isibag. Og isibag ambeg tam ngi reg latfahon Refaim inap arimano obog toho Musa inowen apmayap eneptuk lit yanggal enepfag.

¹³We o Gesur inap men Maakha inap men eneg Israel inaben yanggal enepfag fugmu ketiya oho Israel inap sehelimu wereg.

¹⁴Israel inap INIKNI Allahn ununggul unuk Lewi inap unubam sali emberuk lit, ”An ninggarehen hit henesehet tohon og hisaruk laruhuk,” ulug hiyag isibag ane hikit toho Musa inowen kinang og isibag fug.

¹⁵Musa inowen ununggul unuk Ruben inap onowesi wal taneg werehon kinang og isibahon tu:

¹⁶O Aroer ik Arnon ayegma werehon famen tulug o pumbuk ik Arnon tonggo pulmu wereg keyen o Medeba horogma tom atelma tonggo reg ambeg arimano obog toho og isibag.

¹⁷Nin eke og isibahon tu: Hesbon men o pumbuk toron walinggoho tonggoma werehon ununuk Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar hebema werehon ino men,

²⁰o Bet-Peor men, tom Pisga wamburuk ke men, o Bet-Yesimot men,

²¹o pumbuk tom atelma tonggo reg ambeg werehon obog toho men, Amori inap onowe suwon Sihon ibam o Hesbon welatfahon angginang obog toho men Ruben inap ngi atfag. Ap suwon Sihon ino men at unuk fam Midian inap onowesi roho welatfahon Ewi, Rekem, Zur, Hur, Reba men Musa inowen apmayap enepfag.

²²Apmayap eneptuk lit Israel inaben fulu roho hiyag isaruk ahun Bileam hun Beor amloho ino oho karog fam ware fisibag.

²³O pumbuk arimano obog toho men pumbuk toron walinggoho werehon men Ruben inap onowesi wal taneg werehon yug toho welamuhup ambeg ulug ngi atfag. Ngi atfag ambeg arimano hubula fil hili-hili ik Yordan imbibag.

²⁴Musa inowen ununggul unuk Gad inap onowesi wal taneg werehon kinang og isibahon tu:

²⁵O Yaezer men o pumbuk Gilead kinangma werehon obog toho men Amon inap enengginang pul ke minggiroho winon men og isaruk lit hili-hili o Raba yali fil o pumbuk Aroer horogma imbibag.

²⁶Hili imbibag ambeg arimano o pumbuk Hesbon famen tulug o Ramat-Mizpa men Betonim fam, o Mahanaim famen tulug kinang Debir fam,

²⁷o pumbuk tonggoma werehon Bet-Haram, Bet-Nimra, Sukot, Zafon oho og isibag. Og isibag ambeg arimano tam ap suwon Sihon ibam o Hesbon welatfahonen seneg latfag angginang fam wereg. Og isibag ambeg arimano hili-hili hubula fil ik Yordan emberuk lit hili-hili ik eleruk fil Ik Sene Galilea imbibag.

²⁸O pumbuk arimano obog toho men pumbuk toron walinggoho werehon men Gad inap onowesi wal taneg werehon yug toho welamuhup ambeg ulug hili imbibag.

²⁹Musa inowen ununggul unuk Manasye inap pul ke minggiroho werehon onowesi wal taneg kinang og isibahon tu:

³⁰O Mahanaim famen ak turuk lit tam o Basan inap onowe suwon Og inowen seneg latfag angginang obog toho men, o pumbuk hun Yair inowen tohon o Basan kinangma werehon teng piren 60 arimano men og isibag.

³¹Hun Manasye amloho Makhir inowen ondohowonen ondohowon pul ke minggiroho winon onowesi wal taneg werehon kinang Gilead pul ke minggiroho men ap suwon Og ibam o Astarot men Edrei men og isibag.

³²Kinang arimano obog toho hun Musa ino ik Yordan yali fil o Yerikho horogma wereg lit Israel inap yug toho welamuhup ambeg ulug og isibag.

³³Israel inap INIKNI Allahn ununggul unuk Lewi inap unubam sali emberuk lit, ”An ninggarehen hit henesehet tohon og hisaruk laruhuk,” ulug hiyag isibag ane hikit toho Musa inowen kinang og isibag fug.