Read Angguruk Yali YOSUA 14 Bible Online

YOSUA 14 - Angguruk Yali bible

YOSUA 14

¹Allah amingmingangge imam Eleazar men hun Nun amloho Yosua men Israel inap ununggul unuk onowesi wal taneg welatfahon menen Israel inap yug toho welamuhup ambeg ulug kinang wal-wal og isibag.

²Kinang og usul ulug NINIKNI Allahn Musa fam hiyag itfag ane hikit toho Israel inap ununggul unuk sohowen men sebe roho misig minggiroho men unubam enehangge hik turuk lit it wal taneg kinang fibir isibag.

³Fibir isaruk lit ununggul unuk Yusuf inap unumbasi Manasye men Efraim men piren wereg ulug Manasye inap men Efraim inap men kinang wal taneg og isibag. Israel inap ununggul unuk piren men sebe roho misig pul ke minggiroho men kinang ik Yordan paloho yali fil werehon og isibag. Ununggul unuk Lewi inap Musa inowen kinang og isa fug angge we inibam welamuhup ambeg ulug o pumbuk men enembohom foroho ambeg men og isibag.

⁵Ari roho turuk lit NINIKNI Allahn Musa fam hiyag itfag ane hikit toho Israel inaben kinang fibir isibag.

⁶Israel inap o Gilgal welatfag li Yehuda inap arimano Yosua ambeg watfareg it sehelimuwon Kenas ahun Kaleb hun Yefune amloho inowen Yosua fam ele uruk lit, ”Nit o Kades-Barnea weregma NINIKNI Allahn an men hat men nunubahet amingmingangge Musa hiyag itfag ane hat holuk.

⁷An indag atik iyag sambil ino mo ilig am wirig am turukmen teng misigmen nubam hilag nuwalen 40 atfagma NINIKNI Allah amingmingangge Musa inowen an hiyag nutuk lit, ’Kanaan kinang aluwat ha lamihin,” ulug mon napfagma an o Kades-Barnea embeselug larik iyareg suhuloho waharuk lit anden aluwat ha liyag ane nele si ane uk fug angge tem toho hiyag isiyag.

⁸Anden tem toho hiyag isarukmu nori an men ambiyeg aluwat ha luwahon arimanowen Israel inap un ane hiyag isaruk lit it inindi enekolap eneptuk latfag. We an eneg nindi wirik toho an NIKNI Allah ubam wenggel haruk latik iyag.

⁹Ari roho tiyagma Musa inowen an nubam sali emberuk lit, ’Haren hat HIKNI Allah ubam hindi wirik toho wenggel haruk lahenma kinang huyuhen soptikin ambeg ino hat humalikisi men mondabi ngi amuhup,’ ibag.

¹⁰Ibag ane ari Israel inap lekma mase ril laruk latfag li NINIKNI Allahn Musa hiyag itfag. Hiyag itfag sambil ino mo ilig am wirig am turukmen teng misigmen nubam hilag num fumahen 45 atisi. Ari turukmu NINIKNI Allahn sali imbibahon hikit toho an fet nasug latisimu ketiya oho nebe fano roho welahi. An indag atik iyag sambil ino mo ilig am wirig am turukmen teng hinahanman nubam hilag uhan 85 atisi angge famen

¹¹Musan an mon napfag sambil ino nine roho turuk latik iyag hag toho ketiya oho nine roho turuk lit tog oho abuk teg lahi.

¹²Ari fahet NINIKNI Allahn o ino sambil tom ari og huruhuk ulug hiyag nitfag antom ino ketiya haren og nitmihin. Allahn hiyag nitfag sambil ino hat hinggarehen holtuk lit tom ino fam Enak inap inibam o pumbuk suwon walinggoho elehet ohoma wereg urukmu holtik inag. NINIKNI Allahn an hiyag nitfag ane hikit toho let nabuhu halug anden Enak inap arimano yanggal enebuhuk ano,” ulug hun Kaleben Yosua hiyag itfag.

¹³Hiyag itfagma Yosua inowen hun Kaleb ino Allah unuk fam hi ribareg o Hebron ino ngi aruhun ulug og itfag.

¹⁴Yefune amloho Kaleb inowen Israel inap INIKNI Allah ubam indi wirik toho wenggel haruk latfag ane ari fahet aren endetfahonen ondohowon arimano o Hebron ino ngi roho weregman eneg ketiya oho wereg.

¹⁵Enak inap winon unuwag we tot horog tegma Enak ahun uwag yat anggolo welatfahon unuk Arba wirim toho o pumbuk Hebron indam unuk o Arba suwaleg latfag. O Hebron ino Kaleb og itfagma kinang ino fam aben tog aptuk ane imbisibareg inindi yuwag toho wereg latfag.