Read Angguruk Yali YOSUA 17 Bible Online

YOSUA 17 - Angguruk Yali bible

YOSUA 17

¹Yusuf amloho monggiyon Manasye inowen endetfahonen ondohowon unubam enehangge hik turuk lit kinang ngi roho welamuhup ambeg ulug og isibahon tuma ul: Manasye amloho monggiyon unuk Makhir inowen ondohowonen ondohowon Gilead inap wereg. Gilead inap arimano sehen senehon enehako roho turuk inap wereg lit o Gilead kinang ik Yordan yali fil werehon ino senerik libagma hit ngi roho welamuhup ambeg ulug kinang Gilead men Basan men og isibag.

²Manasye umalikisi winon ununuk Abiezer, Helek, Asriel, Sekhem, Hefer, Semida menen ondohowonen ondohowon onowesi wal taneg welatfahon kinang ik Yordan hubula fil werehon og isibag.

³Hun Hefer amloho unuk Zelafehad Manasye amloho Makhir inowen indag tibahon Gilead umbusag inowen malik ap angge indag ta fug angge we hilani malik eneg indag enepfag. Malik indag enepfahon ununuk Mahla, Noa, Hogla, Milka, Tirza men suwal enepfag.

⁴Malik itano Allah amingmingangge imam Eleazar men hun Nun amloho Yosua men Israel inap onowesi men weregma libareg unubam enele uruk lit, ”NINIKNI Allahn Musa nit nunubahet hiyag utuk lit, ’It hilani malik arimano oho ngi roho welamuhuben kinang onori welamuhup ambeg sehelimuwon eke og isahup,’ ibag,” ulug hiyag isibag. Hiyag isibagma NINIKNI Allahn ibag ane hikit toho hilani malik itano inikni ori enengginang sehelimuwon og isibag.

⁵Tam kinang Manasye inap og isibahon ik Yordan yali fil o Gilead men Basan men weregma ik Yordan hubula fil ngi roho welamuhup ambeg ap angge og isibahon men hiyap angge og isibahon men mangno roho numen og isibag.

⁷Manasye inap enengginang hili ino Asyer inap enengginang hili-hilimu ik ambut fil Sikhem horogma o pumbuk Mikhmetat keyen laruk lit wiriko fil En-Tapuah inap enengginangma laruk.

⁸O pumbuk Tapuah ino Efraim inap ngi roho weregma kinang walinggoho werehon ino Manasye inap ngi roho wereg.

⁹O Tapuah ino famen Manasye inap enengginang hili ino ik Kana som wirig atug ik saho ahik ayegma laruk. Ik Kana ino pulmu weregma kinang ik Yordan eleruk fil werehon men ik Yordan ambut fil werehon men Manasye inap ngi roho wereg. O pumbuk ik Yordan ambut fil werehon arimano Manasye inap enengginang sehelimu wereg angge famen Efraim inap ngi roho wereg. Ari regma Manasye inap enengginang ik Yordan eleruk fil Asyer inap enengginang iraham weregma yali fil Isakhar inap enengginang iraham wereg.

¹¹O pumbuk Isakhar inap enengginang men Asyer inap enengginang men sehelimu wereg angge famen Manasye inap og isibahon arimano ununuk tuma ul: o Bet-Sean, Yibleam, Dor, En-Dor, Taanakh, Megido men o pumbuk toron walinggoho werehon men Manasye inap og isibag.

¹²Og isibag angge famen Manasye inaben Kanaan inap o pumbuk arimano fam welatfahon yanggal enebuk fug teg latfag.

¹³Fobik Israel inap inine atfareg Kanaan inap arimano yanggal enebuk fug angge mingming eneptuk latfag.

¹⁴Welatfagma Yusufen ondohowonen ondohowon arimanowen Yosua fam enele uruk lit, ”NINIKNI Allahn nit ninineyap neneptukmu nit Yusuf ninap nenebe anggolo atukukteg welahe angge famen nungge fahet haren enehangge hik turuk lit kinang ngi roho welamuhuk ambeg misig eneg og nisarikin?” ulug hiyag itfag.

¹⁵Hiyag itfagma Yosua inowen hebeloho hiyag isaruk lit, ”Hit henebe anggolo welahebonen henengginang tom Efraim ino keleg teg halug Feris inap men Refaim inap men enengginang punumu werehon arimano lahakupteg e muko o wiroho welamuhup,” ulug hiyag isibag.

¹⁶Hiyag isibagma Yusuf inaben, ”Tom ino men nenebe anggolo welaheyon men wirim teg elegma tonggoma o Bet-Sean pumbuk toron walinggoho werehon men o Yizreel tonggoma men o kema-kema Kanaan inap wereg lit kereta wam kudan lisoho walug laruk angge ine angge besi fam wirihon foroho lit werehen it enembeg oho kuk fug teg lahe,” ulug hiyag itfag.

¹⁷Hiyag itfagma Yosua inowen Efraim inap men Manasye inap men unubam ele uruk lit, ”Hit henebe anggolo wereg lit hinine roho turuk lahep angge re hit ngi roho welamuhup ambeg misig og hisarikikteg

¹⁸nin sebe roho tom ino oho og hisahuk. Og hisahukmu hit lahakupteg kinang ino atogman atogma ngi roho welamuhuben e mubuhupteg o wiroho welamuhup. Welamuhupmu Kanaan inap arimanowen kereta besi fam wirihon arimano foroho lit inine roho turuk lamuhup angge famen hiren it yanggal enebuhup,” ulug hiyag isibag.