Read Angguruk Yali YOSUA 18 Bible Online

YOSUA 18 - Angguruk Yali bible

YOSUA 18

¹Israel inaben kinang atogman atogma ilmig tibareg it obog toho o Silo palu arik watfareg o sabo Allah men Ambi Atuk Ambeg ekema witil ekema witil laruk latfahon ino wiri fibag.

²O itano li Israel inap ununggul unuk winon obog toho kinang fibir isibag angge famen ununggul unuk sabiren kinang og isibag fug.

³Og isibag fureg Yosua inowen ap ununggul unuk sabiren itano unubam ele uruk lit, ”Nit nunumbasi INIKNI Allahn hit ngi roho welamuhup ambeg ulug kinang og hisarisi. Og hisarisi ambeg ino hit noenam welamuhupteg ilmig ta lahup?

⁴Hit hununggul unuk welahebon wal tanehen ap enebe hinahan-hinahan eneko hiyag nirik wamuhupmu anden ap arimanowen kinang ino aluwarik lahuben mon enebuhuk. Mon enebuhukmu lahupteg kinang ino walinggoho laruk lit iren ngi roho welamuhuk puhup ambeg aluwat halug suwesingga fam haharoho embelug suhuloho an nambeg walug wamuhup.

⁵Walug wamuhupteg kinang aluwarik larukukon ino nit-nit fibir amuhuk ulug hili sabiren umbuhup. We ununggul unuk Yehuda inap arimano tam ngi atusa ambeg ik ambut fil welamuhupmu Yusuf inap arimano tam ngi atusa ambeg ik eleruk fil welamuhup.

⁶Ap aluwat ha lahubon arimanowen suwesingga ino an nambeg walug wamuhupmu anden hit hunubam enehangge hik turuk lit NINIKNI Allahn hit kinang wal taneg og isahuk puhu ambeg an noluk aruhu.

⁷Ununggul unuk Lewi inap eneg NINIKNI Allah amingmingangge welamuhup ulug imbibag angge re hit kinang ngi roho welamuhup hag toho it kinang ngi roho welamuhup fug. Gad inap men Ruben inap men Manasye inap pul ke minggiroho men NINIKNI Allah amingmingangge Musa inowen ik Yordan yali fil kinang og isarisi,” ulug hiyag isibag.

⁸Hiyag isibag ane ari hikit toho ap en enesug latfahon arimano kinang ino aluwat ha lul ulug weregma Yosuan hiyag isaruk lit, ”Lalihipteg kinang ino walinggoho aluwarik laruk lit hiren yet haruk lamuhubon suwesingga fam haharoho umbuhupteg an nambeg suhuloho walug wamuhup. Wamuhupmu anden o Silo aruman hit hunubam enehangge hik turukmu NINIKNI Allahn hit kinang og isahuk puhu ane noluk aruhu,” ulug hiyag isibag.

⁹Hiyag isibagma ap arimano kinang ino walinggoho aluwat hil libag. Laruk lit fobik nit nununggul unuk welaheyon sabiren aruma wal tanehen kinang ino fibir amuhuk ulug hili imbil laruk lit o pumbuk yet hil laruk latfahon obog toho suwesingga fam imbibareg hun Yosua o sabo witfag ambeg o Silo weregma suhuloho watfag.

¹⁰Watfagma Yosua inowen NINIKNI Allahn pemisi ane noluk atmisi ulug Israel inap unubam enehangge hik turuk lit ununggul unuk wal taneg ngi roho welamuhup ambeg ulug kinang fibir isibag.

¹¹Yosua inowen enehangge tamon hik turukmu ununggul unuk Benyamin inap onowesi wal taneg welatfahon men unubam atfag. Atfagma Benyamin inap kinang yug toho welamuhup ambeg ulug Yehuda inap inibam men Yusuf inap inibam men honggolegma it hiyag isibag.

¹²Kinang ino hili ik eleruk fil imbil laruk lit ik Yordan famen tulug o Yerikho horogma punumu lahalug yali fil tom keyen o Bet-Awen lekma imbik libag.

¹³O Bet-Awen famen tulug o Lus unuk eke Betel suwaleg ambeg ik ambut fil tom luharoho lalug o Atarot-Adar wamburuk lit tom Bet-Horon Apmon ik ambut fil werehon fene lahalug

¹⁴nunggulig ik ambutmu laruk lit Yehuda inap inibam pumbuk Kiryat-Baal unuk eke Kiryat-Yearim suwalehon fam imbik libag.

¹⁵Hili ik ambut fil imbil laruk lit o Kiryat-Yearim irahamen ak tibareg hubula fil lalug nunggulig ik Neftoah eleruk pisan toho laruk lit

¹⁶tom ik Hinom tonggo alukema o Refaim tonggoma ik Yordan eleruk fil wereg antom alem keyen nunggul atug ik Hinom som ilihig laruk lit o pumbuk Yebus inggik hare fil nindig haruk ambeg weregma punu alem keyen ik En-Rogel elerukmu imbik libag.

¹⁷Ik ino famen nunggulig ik Yordan eleruk fil o En-Semes keyen tulug tom Adumim laharukon aluke ke keyen o Gelilot pisan isalug hun Ruben amloho Bohan ahalep fam imbik laruk lit

¹⁸ik eleruk filen tom alem keyen nunggulig ik Yordan ayegma wambulug

¹⁹o Bet-Hogla horogma tom altuk ik eleruk filen nunggulig laruk lit ik Yordan ik Il Warehon fam kilaptuk ambeg imbik libag. Ari roho laruk lit hili ik ambut fil imbik libag.

²⁰Hili yali filon ik Yordan som imbik libag. Hili imbil libahon arimano Benyamin inap onowesi wal taneg welatfahon ngi roho welamuhup ulug og isibag.

²¹O pumbuk it ngi atfahon ununuk tuma umbul: O Yerikho, Bet-Hogla, Emek-Kezis,

²²Bet-Araba, Zemaraim, Betel,

²³Haawim, Para, Ofra,

²⁴Kefar-Haamonai, Ofni, Geba men og isibag. O pumbuk nisanggowen arimano men pumbuk toron walinggoho werehon men it ngi atfag.

²⁵Nin eke o Gibeon, Rama, Beerot,

²⁶Mizpa, Kefira, Moza,

²⁷Rekem, Yirpeel, Tarala,

²⁸Zela, Elef, Yebus unuk eke Yerusalem suwalehon ino, Gibeat, Kiryat men og isibag. O nunggul huriken arimano men pumbuk toron walinggoho werehon men Benyamin inap onowesi wal taneg werehon yug toho welamuhup ambeg ulug og isibag.