Read Angguruk Yali YOSUA 2 Bible Online

YOSUA 2 - Angguruk Yali bible

YOSUA 2

¹Hiyag itfagma o Sitim welatfag ambeg inowen hun Nun amloho Yosuan ap winon hiyag isa fug angge ap piren mon eneptuk lit, ”O pumbuk Yerikho men kinang Kanaan men aluwat ha lalihip,” ulug mon enepfag. Mon enepfagma ap piren itano o Yerikho libareg yaying turuk hiyap unuk Rahab ambeg kibareg ibam nohibag.

²Nohorukmen ap ekeyen Yerikho inap onowe suwon fam, ”Yoho hubanggo Israel inap o tuma aluwarik wahasa,” ulug hiyag itfagma

³Rahab ambeg isa lalihip ulug ap mon enepfagma libareg Rahab fam hiyag utuk lit, ”Ap hat hambeg wahason wilip nisa ma! It itano kinang tuma obog toho aluwabul ulug wahasa,” ibag.

⁴Ap suwonen mon enepfahon arimano ambeg uwan wam fugmu Rahab inowen ap piren itano unubam hiyag isaruk lit, ”Hinawimu lahalihipteg hekel uwag andog toho foroho lahiyon apma hiraho latlihip,” ulug hiyag isibag anggeyen mon enepfahon arimano watfagma Rahab inowen hiyag isaruk lit, ”Ap ehebon itano nambeg wahasa angge famen keman wahasa, an napeleg. Hup atukmu sok o Yerikho pumbukmu kurukon ino labuk ohoma ap piren itano wilip ahasareg lahasa. Kema fil lahasa-o, an napeleg. Folo-folo mug eneplug lalihipteg sen eneplihip,” ulug hiyag isibag.

⁷Ari ulug hiyag isibagma ap suwonen mon enepfahon arimanowen ap piren itano mug eneplug lul ulug o pumbukmuwen wilip atfagma sok elehetma kuruk ambeg lare fisibag. Lare fisibagma ap itano mug eneplug libareg ik Yordan paloho nindig atuk ambeg imbisik libag.

⁸Libagma ap piren itano nohuk fug angge hinawimu weregma Rahab ino enembeg lahibareg

⁹ap itano unubam hiyag isaruk lit, ”HINIKNI Allahn Kanaan kinang tu og hisarisimu hit ngi amuhup ane an noluk teg lahi. Hit ngi amuhubon fahet nit Kanaan ninap nenekolen nunuwag elek turuk lahe.

¹⁰Hit o Mesiren wilip atukmu HINIKNI Allahn ik Longgop ino[1] hit henelukeman lilohap tibag ane men, hiren ap suwon piren Amori inap onowesi ik Yordan lema fil welatuson Sihon men Og men unusirikip ane men fahet niren holtukuk.

¹¹Ari holtukukteg hit HINIKNI Allahn pohol ha kinang ha seneg ulug nit nonoluk atisimu ninindi anggin atuken hit honolohotman ninine roho tuk ane mondabi eleg atisi.

¹²Ari fahet anden hit let henebihi hag toho hiren an nikni nisinga men nori ap angge hiyap angge men ap winon nit niniraham werehonet nunusuk fug angge nunumbahakupmu nonoluk welamuhuken HINIKNI Allah olohotman fag toho hiyag nutuk lit tem toho urusa puhuken enehangge embelihip,” ulug hiyag isibag.

¹⁴Hiyag isibagma ap piren itanowen hebeloho hiyag utuk lit, ”NINIKNI Allahn kinang aru nit og nisahumu kik wamuhukteg hit hunusuk fug angge hunumbahakuk ulug sali emberuk lahe. Hunumbahakuk fug halug nit war amuhuk. We nit o Yerikho aru aluwarik waheyon fahet ap hiyag isa fug!” ulug hiyag itfag.

¹⁵Elehet o pumbuk walinggoho ohowon ino Rahab ibam fam ahandip tegma Rahab inowen ap piren itano keyenteg sel fil fo reg latfahon ino fene hele ililoho pilap enepfag.

¹⁶Pilap enepfareg Rahab inowen te, ”Ap mug heneplug lahason arimanowen hisahup tohon tom fam eremu hirag arik lalihipteg o hinahanam hiraho lit weregman ap arimano inibam wamuhup halug hit honori wereg ambeg lahup,” ulug hiyag isibag.

¹⁷Hiyag isibagma ap piren itanowen, ”Nubam sali embelihip ulug heng nenebehenon hikit toho niren hat hubam tuhuk.

¹⁸Tuhuken nit kinang tu fam kik wamuhuk sambil ino haren hele mut palehon tu nit pilap nenebehen ke ari enehangge ililoho pilabe fuhunteg hat hikni hisinga men hori obog toho hondoko kilap enebik waruhun.

¹⁹Kilap enebik waruhunon arimano misig hat hibamen wilip aruhumu ware fusuhuk halug hiren te nunubam sali emberuson pisan isalug war aha ulug nit fahet siyag puhup fug angge famen ap misig hat hibam welaruhuwon olma weregman unusuhuk halug eneg alem nit nunubam aruhu.

²⁰Haren nit waheyon fahet Yerikho inap winon hiyag isahun halug sali emberuk laheyon aru hikit toho tuhuk fug,” ulug hiyag itfag.

²¹Hiyag itfagma hiyap inowen te, ”Hiren ehebon hikit toho teko lahu,” ibareg lalihip ulug hiyag isibagma ap piren itano libag. Libagma Rahab inowen hele mut palehon ino ap piren pilap enepfag ke ino ililoho pilabe fibag.

²²Ap piren itano tom fam libareg hiraho lit weregman hup hinahanam atfagma it mug eneplug libahon arimano yami enebil larukmen eleg latfagma inibam suhuloho watfag.

²³Suhuloho watfagma ap piren itano tom famen wambibareg ik Yordan pal isalug Yosua ambeg suhuloho watfareg aluwat ha libag ane obog toho hiyag utuk lit,

²⁴”NINIKNI Allahn o Kanaan kinang ino nit nininggikmu og nisarisimu nit ngi amuhukon fahet Kanaan inap obog toho enekolen unuwag elek turuk,” ulug hiyag itfag.