Read Angguruk Yali YOSUA 20 Bible Online

YOSUA 20 - Angguruk Yali bible

YOSUA 20

¹Welatfagma NINIKNI Allahn Yosua fam ele uruk lit,

²”Israel inap hiyag isamihinon tu: Allahn Musa feneyen hiyag nisibag ane hikit toho ap unusulug larukon ili og eneptuk ambeg hiyako umbuhup.

³Ap san nare pinggi ware fesemin puk fug anggeyen inggik fam tor angge kik harukmen war aruhu halug ap ware feserukon ino ayeg waroho nuwabuhup tohon ulug o arimano laruk laruhumu ili waruk lamuhup.

⁴Ap ino ili og nabusa ulug o arimano eke laruk lit o pumbukmu kurukon sokolma in arik lahureg o ino onowesi roho werehon unubam alem at ubam werehon fahet hiyag isaruk laruhu. Hiyag isarukmu onowesiyen ili waruk lit nit men welamuhuk ulug o eke hiyag utuk lamuhup.

⁵Ari roho turukmu ap warehon ino areyen ap ino ayeg waroho ware fesemin ulug muko laruk lit o ino lahu halug ap inowen olok haruk lit pikit toho watisi fug ulug onowesi roho werehon arimanowen ap watmin ulug muko lahuwon ino inggikmu emberuk lamuhup fug.

⁶Inggikmu umbuk fugmu o ino weregman eneg alem ubam werehon ino haloho emberuk lamuhup. Haloho emberuk lamuhupmu ap ino o ino amusun toho weregman eneg Allah amingmingangge imam onowe suwon o Yerusalem werehon ino war atuk laruhu. War aruhumu eneg ap ino ibam ori wereg ambeg suhuloho lahu,” ulug hiyag isibag.

⁷Hiyag isibag ane ari hikit toho Israel inaben ap unusulug larukon ili og eneptuk ambeg welaruhu ulug hiyako imbibag ambeg ununuk tuma umbul: O pumbuk Kedes o Galilea kinangma tom Naftali fam werehon men, o Sikhem tom Efraim fam werehon men, o Kiryat-Arba unuk eke Hebron tom Yehuda fam werehon men,

⁸o Yerikho yali fil, ik Yordan fuma fil Ruben inap inibam o Bezer tom atelma tonggo reg ambeg ino men, Gad inap inibam o Ramot kinang Gilead fam werehon men, Manasye inap inibam o Golan kinang Basan fam werehon men imbibag.

⁹Imbibag ane ino hikit toho Israel ahun ekeyen ano ap pohon Israel kinangma werehon ekeyen ano ap eke inggiken tor angge kik harukmen war aruhu halug ap ware feserukon ino ap warehon oriyen ayeg waroho nuwabuhup tohon ulug o pumbuk arimano eke larukmu iren ili waruk lamuhup. Ili waruk lit alem ubam werehon haloho emberuk lamuhup.