Read Angguruk Yali YOSUA 21 Bible Online

YOSUA 21 - Angguruk Yali bible

YOSUA 21

¹Welatfareg ununggul unuk Lewi inap onowesi arimano Allah amingmingangge imam Eleazar men hun Nun amloho Yosua men Israel inap ununggul unuk onowesi men enembeg o Silo kinang Kanaan fam watfareg enele uruk lit,

²”NINIKNI Allahn Musa feneyen ele ibahon tu, ’O pumbuk Lewi inap welamuhup ambeg men enembohom foroho ambeg men hiyag isaruk lamuhup,’ ibag,” ulug hiyag isibag.

³NINIKNI Allahn hiyag isibag ane hikit toho Israel inaben o pumbuk iren tohon minggiroho winon men wam foroho ambeg walinggoho werehon men Lewi inap hiyag isibag.

⁴O pumbuk unuk keyon og isahuk ulug Lewi ahun Kehat inowen endetfahonen ondohowon fahet enehangge tamon hik turuk lit imam Harun umalikisi o pumbuk Yehuda kinang famon eke, Simeon kinang famon eke, Benyamin kinang famon eke hiyag isibag. Hiyag isibag ambeg arimano ununggul unuk wal-wal welamuhup ulug o pumbuk nuwalen hiyag isibag.

⁵Hun Kehat inowen ondohowonen ondohowon minggiroho winon fahet enehangge hik turuk lit o pumbuk Efraim kinang famon eke, Dan kinang famon eke, Manasye kinangma ik Yordan hubula fil werehon eke hiyag isibahon arimano mangno roho o pumbuk numen hiyag isibag.

⁶Hun Gerson inowen ondohowonen ondohowon fahet enehangge hik turuk lit o pumbuk Isakhar kinang famon eke, Asyer kinang famon eke, Naftali kinang famon eke, o Basan tonggoma Manasye kinang fam ik Yordan yali fil werehon eke hiyag isibahon arimano mangno roho o pumbuk nuwalen og isibag.

⁷Hun Merari inowen ondohowonen ondohowon fahet enehangge hik turuk lit o pumbuk nisanggowen hiyag isaruk lit Ruben kinang famon eke, Gad kinang famon eke, Zebulon kinang famon eke it ununggul unuk wal taneg hiyag isibag.

⁸Ari roho turuk lit Israel inap arimanowen NINIKNI Allahn Musa feneyen ele ibag ane hikit toho enehangge hik turuk lit Lewi inap arimano o pumbuk wam foroho ambeg walinggoho werehon arimano men hiyag isibag.

⁹O pumbuk Lewi inap hiyag isibahon Yehuda kinang famon men Simeon kinang famon men ununuk tuma ul:

¹⁰Lewi ahun Kehat inowen endetfahonen ondohowon Harun umalikisi fahet enehangge tamon hik turukmu

¹¹o pumbuk Enak inap unumba Arba ibam Hebron tom Yehuda fam werehon ino men wam foroho ambeg walinggoho werehon men hiyag isibag angge famen

¹²yabuk o Hebron walinggoho werehon men o pumbuk toron men tam hun Yefune amloho Kaleb og itfahon ino hiyag isibag fug.

¹³O Hebron ino fahet enele kong toho uruk lit ap san ap eke watukon ayeg waroho nuwabuhup tohon ulug o Hebron larukmu ili waruk lamuhup ulug imbibag. Hebron ino Harun umalikisi og isaruk lit nin eke o Libna,

¹⁴Yatir, Estemoa,

¹⁵Holon, Debir,

¹⁶Ain, Yuta, Bet-Semes wam foroho ambeg walinggoho werehon men hiyag isibag. Hiyag isibahon arimano o pumbuk Yehuda kinang famon men, Simeon kinang famon men mangno roho sohowen hiyag isibag.

¹⁷Hiyag isibareg nin eke o pumbuk uhan Benyamin kinang famon ununuk Gibeon, Geba, Anatot, Almon wam foroho ambeg walinggoho werehon men hiyag isibag.

¹⁹Hiyag isibahon arimano obog toho o pumbuk nuwalen wam foroho ambeg walinggoho werehon men Harun umalikisi Allah amingmingangge arimano hiyag isibag.

²⁰Lewi ahun Kehat inowen endetfahonen ondohowon minggiroho winon fahet enehangge hik turuk lit o pumbuk Efraim kinang famon hiyag isibag.

²¹Hiyag isibahon arimano ap unusulug larukon ili og eneptuk ambeg Sikhem tom Efraim fam werehon ino men Gezer,

²²Kibzaim, Bet-Horon wam foroho ambeg walinggoho werehon men hiyag isibag. Hiyag isibahon arimano o pumbuk uhan hiyag isibag.

²³O pumbuk Dan kinang famon Elteke, Gibeton,

²⁴Ayalon, Gat-Rimon wam foroho ambeg walinggoho werehon men og isibahon o pumbuk uhan og isibag.

²⁵O pumbuk Manasye kinang ik Yordan hubula fil werehon piren Taanakh men Gat-Rimon men wam foroho ambeg walinggoho werehon men hiyag isibag.

²⁶O pumbuk hiyag isibahon Kehat inowen ondohowonen ondohowon ununggul unuk minggiroho winon arimano welamuhup ulug o pumbuk numen wam foroho ambeg walinggoho werehon men hiyag isibag.

²⁷Lewi ahun Gerson inowen ondohowonen ondohowon arimano o Manasye kinang ik Yordan yali fil welamuhup ulug o pumbuk piren hiyag isaruk lit ap unusulug larukon ili og eneptuk ambeg Golan o Basan kinangma werehon ino men Beestera men wam foroho ambeg walinggoho werehon men hiyag isibag.

²⁸Nin eke o pumbuk Isakhar kinang famon hiyag isibahon uhan itano ununuk Kisyon, Dobrat,

²⁹Yarmut, En-Ganim wam foroho ambeg walinggoho werehon men hiyag isibag.

³⁰Nin eke o pumbuk Asyer kinang famon hiyag isibahon uhan itano ununuk Misal, Abdon,

³¹Helkat, Rehob wam foroho ambeg walinggoho werehon men hiyag isibag.

³²O pumbuk Naftali kinang famon hiyag isibahon hinahan itano ap unusulug larukon ili og eneptuk ambeg Kedes o Galilea kinang fam werehon men Hamot-Dor men Kartan men wam foroho ambeg walinggoho werehon men hiyag isibag.

³³O pumbuk hiyag isibahon arimano obog toho Gerson inap ununggul unuk wal-wal welamuhup ulug o pumbuk nuwalen wam foroho ambeg walinggoho werehon hiyag isibag.

³⁴Nin Lewi ahun eke Merari inowen endetfahonen ondohowon ununggul unuk wal-wal o pumbuk Zebulon kinang famon uhan hiyag isibahon ununuk Yokneam, Karta,

³⁵Dimna, Nahalal wam foroho ambeg walinggoho werehon men hiyag isibag.

³⁶Nin eke o pumbuk Ruben kinang famon uhan hiyag isibahon ununuk Bezer, Yahas,

³⁷Kedemot, Mefaat wam foroho ambeg walinggoho werehon hiyag isibag.

³⁸O pumbuk Gad kinang famon uhan hiyag isibahon ap unusulug larukon ili og eneptuk ambeg Ramot o Gilead kinangma werehon men Mahanaim,

³⁹Hesbon, Yaezer wam foroho ambeg walinggoho werehon men hiyag isibag.

⁴⁰O pumbuk hiyag isibahon arimano Merari inap ununggul unuk wal-wal yug toho welamuhup ulug enehangge hik turuk lit o pumbuk nisanggowen hiyag isibag.

⁴¹Lewi inap arimano Israel inap enengginang seheli ke o pumbuk hiyag isibahon mangno roho teng misigmen nubam hilag sabit fimahen 48 arimano men wam foroho ambeg walinggoho werehon men hiyag isibag.

⁴³NINIKNI Allahn Israel inap unumbasi unubam kinang og hisahuk ulug sali imbibag angginang ino obog toho Allahn Israel inap og isibagma ilmig tibareg yug toho welatfag.

⁴⁴Weregma NINIKNI Allahn Israel inap unumbasi unubam sali imbibag ane hikit toho Israel inap let eneptuk lit ap seliyon o kema-kema werehon obog toho it ininggikmu emberukmu misihen oho Israel inap apmayap enebuk fug teg latfagma Israel inap inindi yuwag toho welatfag.

⁴⁵NINIKNI Allahn fano ane eneg hunubam turuk laruhuk ulug sali imbibag ane il misig oho umbusuk fug angge obog toho hikirap tibag.