Read Angguruk Yali YOSUA 22 Bible Online

YOSUA 22 - Angguruk Yali bible

YOSUA 22

¹Ari tibagma Yosua inowen ununggul unuk Ruben inap men Gad inap men Manasye inap minggiroho winon men wol enepfareg

²it unubam ele uruk lit, ”NINIKNI Allah amingmingangge Musa inowen hiyag hisibag ane fuki roho holtuk lit anden hit hiyag hisarikik ane hikit toho turuk latikip.

³Turuk lit NINIKNI Allah hiren oho wel turuk lahebon inowen alem tu men ari men turuk lamuhup ulug komo henepfag ane obog toho hinine roho seneg lit honori umbusuk fug angge let eneptukmen eneg ketiya oho welahep.

⁴Weregma NINIKNI Allahn honori unubam sali imbibag ane hikit toho let eneptukmu inindi yuwag atisimu ketiya hit ik Yordan fuma fil lalihipteg hinibam NINIKNI Allah amingmingangge Musan tam og hisarisi ambeg yug toho welamuhup.

⁵Wereg lit NINIKNI Allah amingmingangge Musan tu men ari men turuk lamuhup ulug komo henepfag ane hinine roho seneg lit NINIKNI Allah hiren oho wel turuk lahebon ino hinindi reg lit nenebe abirangge amingmingangge wereg lit At ele holtul ulug At men hininggik ahandip toho wereg lit Aren ari hag toho laruk lamuhup ulug hiyag hisibag ane hikit toho laruk lamuhup,” ulug hiyag isibag.

⁶Hiyag isibagma Yosua inowen Allah unuk fam hi enepfareg lalihip ulug hiyag isibagma inibam libag.

⁷Indam Musa inowen ununggul unuk Manasye inap minggiroho winon o Basan kinang ik Yordan yali fil werehon ino og isibagma hun Yosua inowen Manasye inap winon onori enesehelimu welamuhup ulug kinang ik Yordan hubula filon og isibag. Og isibareg hinibam lalihip ulug hiyag isibag sambil ino Yosua inowen Allah unuk fam hi enepfareg

⁸nin eke hiyag isaruk lit, ”Hit tuma wereg lit ap seliyon enenggengge huhulangge hilaruk latikibon ili ruruk angge perak emas tembaga men ine angge besi men sum wan turukon men wam men anggolo roho hit hininggikmu atisi. Hit hininggikmu atisi angge anggolo werehon arimano hiren hinibam walug lalihipteg hit honori men fibir amuhup,” ulug hiyag isibag.

⁹Ari ulug hiyag isibagma Ruben inap men Gad inap men Manasye inap minggiroho men Israel inap o Kanaan kinangma o Silo ino palu roho welatfahon arimano embeselug libareg inibam o Gilead kinang NINIKNI Allahn Musa feneyen og hisahuk ulug hiyag isibag ane hikit toho tam ilmig tibag ambeg ino libag.

¹⁰Ruben inap men Gad inap men Manasye inap minggiroho winon men ninibam lul ulug laruk lit ik Yordan uwan paloho nindig am fug angge Kanaan kinangma o Gelilot libareg ik Yordan ayegma Allah fahet hubu lahaptuk ambeg ulug helep anggolo esengget watil lahibag.

¹¹Esengget watil lahibag ane fahet Israel inap ununggul unuk winon arimanowen holfareg it-it enele uruk lit, ”Ruben inap men Gad inap men Manasye inap yali filon menen ik Yordan ayegma nit nenengginang fam o Gelilot inowen Allah fahet hubu lahabul ulug helep esengget watusa,” uruk latfag.

¹²Ari uruk lit Israel inap ununggul unuk winon arimano obog tohowen it men tog abuhuk ulug o Silo palu arik watfag.

¹³Watfareg Israel inaben Ruben inap men Gad inap men Manasye inap yali filon arimano o Gilead weregma lalihip ulug hun Eleazar amloho Pinehas imam ino men

¹⁴ununggul unuk numen welatfahon onowesi misig-misig men mon enepfag.

¹⁵Mon enepfagma ik Yordan paloho o Gilead libareg Ruben inap men Gad inap men Manasye inap men hiyag isaruk lit,

¹⁶”NINIKNI Allah umalikisi welaheyon obog tohowen nenele misig toho uruk lahe ane tu holeg lamek: Nungge fahet hiren NINIKNI Allah ele ying turuk lit hubu lahaptuk ambeg ari witikip? Nungge fahet At embeselug laruk lahep?

¹⁷Niren o Peor inowen siyag ane turukukon ino henepeleg atisi ano?[9] Siyag ane turukukon fahet Allahn alem angginon nit umalikisi welaheyon nunubam emberisimu siyahon nunubam tag tegman eneg ketiya oho asengseng toho welahe. Alem ari fahet hiren hayen peruk lit ari hahon nin eke nunubam atep peruk lahep ano?

¹⁸Nungge fahet NINIKNI Allah henembol yig utuk lahep? Hiren o yoho NINIKNI Allah ninirim pelihip halug sono Aren nit Israel ninap obog toho nunubahet indimu olok hahu.

¹⁹Hit henengginang fahet siyagma Allah wel turuk ambeg wibuk fug teg peruk lahep halug NINIKNI Allah angginang o sabo fanowon wirigmu wamuhupteg nit sehelimu yug toho welamuhup. Nit NINIKNI Allah fahet hubu lahaptuk ambeg witukuk angge re hiren nin sebe roho misig eke wituk lit NINIKNI Allah ele ying turuk lit nir oho nenele ying nenebuhup fug.

²⁰Hun Zerah amloho Akhan inowen Allahn ibag ane sobir isalug ap seliyon enenggengge hirako hilarisi ane fahet wenggel homok! At eneg war alep angge famen Israel ninap obog toho alem angginon nunubam atisi,” ulug hiyag isibag.

²¹Hiyag isibagma Ruben inap men Gad inap men Manasye inap yali filon arimano menen Israel inap onowesi unubam enele uruk lit,

²²”NINIKNI Allah aben nunumba ulug wel eneptukon obog toho Inikni werehon inowen nit fahet siyag ane turusa fug ulug oluk teg hag toho Israel hinaben oho honoluk toho welamok. Niren NINIKNI Allah nenembol yig umul ulug hubu lahaptuk ambeg ino wiri ferukuk halug Aren nit o yoho windat nenepmisi fug.

²³An enembol yig numul ulug wam ano suburu ano yaltuk lit wam eke esetukon fahet helep arimano esengget watusa ano ulug At inggarehen kim nisahureg alem nunubam umbuhu.

²⁴Fobik hit hunumalikisiyen nit nunumalikisi unubam, ’Hit men Israel ninap NINIKNI Allah men hininggik ahandip toho welahep fug,’ ulug hiyag isahup tohon perukukteg nenekolen Allah wel turuk ambeg ino wiri ferukuk.

²⁵Hit hunumalikisiyen enele uruk lit, ’NINIKNI Allahn nit men hit Ruben hinap men Gad hinap men honggolegma ik Yordan ino hiliyangge welamag ulug imbibag angge re hit NINIKNI Allah umalikisi welahep fug,’ ulug hiyag isarukmu nit nunumalikisiyen NINIKNI Allah fam wenggel haruk ane umbusuhup tohon ulug wenggel harukuk.

²⁶Ari wenggel harukukteg nenele uruk lit, ’Allah wel turuk ambeg ulug helep esengget wabul angge famen esengget wabul ambeg inowen wam sei ano unu ano yaltuk lamuhuk fug,’ urukuk.

²⁷Urukuk ane ari hikit toho niren o Gelilot inowen hubu lahabuk fug angge NINIKNI Allah ibam hit henengginang fam wirihon inowen eneg At wel turuk lamuhuk ulug henembeg lalug wam osoho naruk lit wam sei men unu men yaltuk lamuhuk. Ari turuk lamuhukon fahet hiren endebuhubonen endebuhubon men niren endebuhukonen endebuhubon menen onoluk toho welamuhuben enehangge welamag ulug helep arimano esengget watukuk. Esengget watukuk ane ariyen fobik hit hunumalikisiyen nit nunumalikisi unubam, ’Hit NINIKNI Allah umalikisi welahep fug,’ ulug enele uk fug teg lamuhup angge famen

²⁸fobik hit hunumalikisiyen ari hag toho enele uruk lamuhup halug nit nunumalikisiyen hiyag isaruk lit, ’Nit niniknisiyen NINIKNI Allah fahet hubu lahaptuk ambeg o sabo fanowon fam witfahon ino wirim toho helep esengget watfahon aruma yet homok! Helep esengget watfag ambeg tuwen wam sei ano unu ano yaltuk lamuhuk fug, helep aruman nit Allah umalikisi welahe ane ino ebenam aruhu ulug esengget watfag,’ ulug hiyag isaruk lamuhup perukuk.

²⁹Ari fahet hiren o sabo fanowon owahalma NINIKNI Allah niren oho wel turuk laheyon fahet hubu lahaptuk ambeg wiri ferikip angge re niren nin eke misig wituk lit NINIKNI Allah ele ying tuhuk tohon!” ulug hiyag isibag.

³⁰Iren ari ulug hiyag isibagma imam Pinehas men Israel inap ununggul numen ik Yordan hubula fil welatfahon onowesi menen hol isibareg fano ehesa pibag.

³¹Ari pibareg Pinehas inowen it hiyag isaruk lit, ”NINIKNI Allah nit sehelimu wereg ulug ketiya nonoluk aha. Hiren helep arimano esengget watuk lit NINIKNI Allah ele ying tirikip fug angge famen NINIKNI Allahn nit Israel ninap nunusuhu rohon ulug inggikmuwen taluk neneptikip,” ulug hiyag isibag.

³²Hiyag isibareg Pinehas men Israel inap onowesi arimano men o Gilead kinang embeselug inibam o Kanaan kinangma suhuloho watfareg iren turuk latfag ane onori Israel inap hiyag isibag.

³³Hiyag isibag ane ari fahet Israel inaben fano peruk lit Allahn let neneptisi ulug wel tibareg Ruben inap men Gad inap men unusik lahukteg enengginang siyahap tuhuk ulug tam enele uruk latfag hag toho nin uruk latfag fug.

³⁴Uruk latfag fugmu Ruben inap men Gad inap menen wenggel haruk lit, ”Helep esengget watukukon arimanowen Allah nit NINIKNI wereg ane ari nonoluk aruhuwen enehangge wereg,” pibareg helep esengget watfag ambeg ino unuk Enehangge suwalfag.