Read Angguruk Yali YOSUA 23 Bible Online

YOSUA 23 - Angguruk Yali bible

YOSUA 23

¹NINIKNI Allahn Israel inap let eneptuk lit ap seliyon o kema-kema werehon it ininggikmu imbibagma inindi yuwag atfareg weregman eneg Yosua sabal atfag.

²Sabal atfareg Israel inap obog toho wol enepfareg onowesi, ap suwon-suwon, alem haloho emberuk inap, tog aptuk ane milal eneptuk inap men unubam ele uruk lit, ”An mondabi sabal atikikteg nele hiyag hisamin.

³NINIKNI Allah hiren oho wel turuk lahebon ino inggarehen hit fahet tog aptuk lit ap seliyon obog toho apmayap eneptukmu hinilen yet haruk latikip.

⁴Yet harikipmu anden hit hununggul unuk wal taneg welahebon hunubam enehangge hik turuk lit anden elehap eneptikik inap enengginang obog toho men uwan apmayap eneptikik fug inap enengginang men ik Yordan famen tulug mo ubuk uruk fil ik saho ahik ayegma hit ngi amuhup ulug og hisarikik.

⁵Og hisarikikmu NINIKNI Allah hiren oho wel turuk lahebon inowen hit hunubam sali imbibag ane hikit toho ap o pumbuk arimano obog toho yanggal enebuhumu enengginang hit ngi amuhup.

⁶Ari fahet hinindi wirik toho wereg lit Musa wene fam haharoho imbibahon obog toho hinine roho seneg lit ke hareyon la fug angge we ke pikiron eneg laruk lamuhup.

⁷Ari roho laruk lit Kanaan inap hit sehelimu werehon men ambiyeg welamuhup fug. Unumbasi iren wel eneptukon ununuk uruk lit it onolohotman tem toho ihi uruk lamuhup fug. Ari uruk lit enemingmingangge amuhuk ulug unubam sembahyang uruk lamuhup fug.

⁸It unubam sembahyang uk fug angge HINIKNI Allah men hininggik ahandip toho welatikip hag toho fobik oho welamuhup.

⁹NINIKNI Allahn ap o pumbuk enebe anggolo wereg lit inine anggolowon hit honolohotman yanggal eneptukmu ap misihen oho indamen tulug ketiya oho hit apmayap henebuk fug teg.

¹⁰HINIKNI Allahn hit hunubam sali imbibag ane hikit toho hit fahet tog aptukmu hit ap misihen ap teng-teng angge 1.000 yanggal enebuk teg.

¹¹Ari fahet hit fano honoluk welamuhuben HINIKNI Allah hinindi reg ane hinine roho seneg lamuhup.

¹²Hit HINIKNI Allah embeselug Kanaan inap hit sehelimu we tor angge werehon men hininggik ahandip toho wereg lit hit hunumalikisi men it unumalikisi men og-og atuk lit henebe misig hag toho welamuhup halug

¹³HINIKNI Allahn ap o pumbuk arimano hit honolohotman yanggal enebuhu fugmu hit sehelimu yebangge hag toho wereg lit sabiyap alem fam ap enembolma unusuruk hag toho hunusurukmu asengseng haruk lamuhup. Alog anggeyen ap inilanggen hak eneptuk hag toho Kanaan inaben hunusurukmen eneg kinang HINIKNI Allahn og hisarisi ambeg fanowon ino famen eleg amuhup.

¹⁴Ketiya an war aruhukon horogma welahireg nele iminon tu holeg lamek: NINIKNI Allah hiren oho wel turuk lahebon inowen fano ane hunubam turuk laruhuk ulug sali hunubam emberisi ane il misig oho umbusuk fug angge obog toho hikirap tirisi ulug hit obog tohowen honoluk toho welamuhup.

¹⁵HINIKNI Allahn ele fano roho hiyag hisarisi ane obog toho hikirap tirisi. At ele sobir isalug turuk lamuhup halug alem angginon hunubam umbuhuk irisi ane oho hikirap tuhu.

¹⁶Hiren HINIKNI Allahn nininggik ahandip toho welamuhuk ulug sali hunubam emberisi ane sobir isalug ap winonen nunumbasi ulug wel eneptukon onombolim laruk lit it unubam sembahyang uruk lamuhup halug NINIKNI Allahn hit hunubahet olok hahumu hit folo-folo kinang fanowon HINIKNI Allahn og hisarisiyon aru famen eleg amuhup,” ulug hiyag isibag.