Read Angguruk Yali YOSUA 24 Bible Online

YOSUA 24 - Angguruk Yali bible

YOSUA 24

¹Welatfareg Yosua inowen Israel inap ununggul unuk obog toho o Sikhem wamuhup ulug wol enepfagma palu arik watfag. Watfagma Yosuan Israel inap onowesi, ap suwon-suwon, alem haloho emberuk inap, tog aptuk ane fahet milal eneptuk inap arimano eneg Allah wereg ambeg in arik maniyek ulug wol enepfagma in arik watfag.

²In arik watfagma Yosuan ele hiyag isaruk lit, ”Israel ninap NINIKNI Allah ele tu holeg lamek, ’Indam hunumbasi ik Efrat paloho fima fil wereg lit tu Allah hag toho wereg perukon wel eneptuk lit Abraham men Nahor inikni Terah inowen oho wel eneptuk latfag angge famen

³Anden hunumba Abraham ik Efrat paloho fima fil weregma wol turuk lit Kanaan kinang walinggoho lahun ulug monde fiyareg fobik hat hubalmangge anggolo amuhup ulug amloho Ishak og itik iyag.

⁴Og itik iyareg Ishak umalikisi Yakub men Esau men og itik iyag. Og itik iyareg tom Seir hat ngi roho welaruhun ulug Esau fam hiyag itik iyagma Yakub umalikisi men o Mesir libag.

⁵Libagma Anden Musa men Harun men o Mesir mon eneptik iyareg o Mesir inap enesehelimu alem angginon eke hag eke hag monde feruk lit hit hiniknisi o Mesiren hondog eneplug wilip atik iyag.

⁶Wilip atuk lit ik Longgop ayegma larukmen o Mesir inap wam kudan lisoho walug laruk angge kereta fam lahibareg hiniknisi mug eneplug ik Longgop ikma libag.

⁷Larukmu yet isibareg hiniknisi arimano enekolen enele hi roho An Allah fam uruk latfagma Anden Mesir inaben Israel inap yet isahup ulug onolohotma hika fisiyag. Hika fisiyagma Mesir inap ik paloho lul ulug ikma kurukmen Anden ik monde fiyagma hondo enepfahon ino fahet hit honoluk. Iken hondo enepfagma hit amusun toho lekma welatikip.

⁸Weregma Anden hit Amori inap ik Yordan yali fil werehon enembeg og heneplug waharikikmu it arimanowen hunusul ulug turukmen Anden it arimano hit hininggikmu og isaruk lit hit honolohotman unusirikikmu kinang iren tohon hit atikip.

⁹Hit atikipmu o Moab inap onowe hun Zipor amloho Balak ino Israel hinap men tog aptuk lit hit huluwap henebukag ulug hun Beor amloho Bileam wol tirisi.

¹⁰Wol tirisimu huluwap enepmin ulug waharisi angge famen Anden Israel inap Balak inggikmuwen windat enepminen ele holmin fug perikikmu aren fano welamuhup ulug hit An nunuk fam hi heneptisi.

¹¹Hi heneptisimu hit ik Yordan paloho o Yerikho waharikipteg weregma Yerikho inap, Amori inap, Feris inap, Kanaan inap, Het inap, Girgasi inap, Hewi inap, Yebus inap, it arimano obog tohowen hit hunusul ulug turukmen it arimano hit hininggikmu emberikik.

¹²Hit hunusul ulug larukmen Anden it arimano enekolap eneptukmu Amori inap onowesi suwon piren itano hit honolohotman longgo urusa. We tem toho hiren sehen men karog men fam yanggal eneptikip fug.

¹³Ari roho turuk lit Anden kinang Kanaan aru og hisarikikmu hiren o sat toho wibuk fug angge tam wituson fam eneg kirikipteg welahep, yabuk lisag toho wibuk fug angge suburu hom hali tam yatuson naruk lit welahep.[10]

¹⁴Ari fahet hunumbasiyen ik Efrat ayegma men o Mesir men wereg lit tu Allah hag toho wereg ulug wel eneptuk latfahon arimano umbusuhupteg hinindi wirik toho wereg lit NINIKNI Allah fahet eneg henekol toho wereg lit At ele eneg holtuk lamuhup ulug hiyag hisaruk lahi angge famen

¹⁵hiren te NINIKNI Allah fam wenggel haruk lamuhuk fug peruk lahep halug o yoho tu famen nunumbasi ik Efrat ayegma wereg lit tu Allah hag toho wereg ulug wel eneptuk latfahon arimano niren oho wel eneptuk lamuhuk ilihip halug fano, Amori inap enengginang hit atikip ambeg tumon unumbasi niren wel eneptuk lamuhuk ilihip halug oho fano. An nibam werehon menen NINIKNI Allah ele eneg holtuk lamuhuk,” ulug Yosua inowen Israel inap obog toho hiyag isibag.

¹⁶Ari ulug hiyag isibagma Israel inaben hebeloho hiyag utuk lit, ”NINIKNI Allah umbusuhupteg aben tu Allah hag toho wereg perukon wel eneptuk lamuhup ulug wenggel ha fug.

¹⁷NINIKNI Allahn niniknisi o Mesir inaben ininggik lisoho mingming eneptuk latfag ambehen hondog eneplug wilip atfareg ap winon enengginang fam laruk lit enehangge aben tuk fug teg ane ehenon ari nit niniline turuk lit let neneptisi.

¹⁸Let neneptuk lit NINIKNI Allahn Amori inap kinang tu fam welatuson men ap seliyon winon obog toho nit nonolohotman yanggal eneptisimu niren oho Allah Ninikni we misig wereg ulug At eneg wel turuk lamuhuk,” ulug hiyag itfag.

¹⁹Hiyag itfagma Yosua inowen hebeloho hiyag isaruk lit, ”NINIKNI Allah fam eneg wenggel hehep ha fug teg lahep. At ebe usa fulu ahun wereg lit aben tu Allah hag toho wereg ulug wel eneptuk ane fahet indi olok atuk. Niren At embeseruk lit siyag ane turuk laheyon elehap tuhu puk fug.

²⁰Tam fano ane hunubam turuk latisi angge famen hiren NINIKNI Allah henembol yig umuhupteg tu Allah hag toho wereg perukon wel eneptuk lamuhup halug hit inggik kobog hunubaharuk lit alem angginon hunubam umbuhumu mondabi siyag amuhup,” ulug Yosuan Israel inap hiyag isibag.

²¹Hiyag isibagma Israel inap arimanowen te, ”Eleg, we NINIKNI Allah fahet eneg wenggel haruk lamuhuk,” ulug hiyag itfagma

²²Yosuan, ”Hininggarehen ehep ane henemu honoluk toho welamuhup,” ibagma iren te, ”Nonoluk toho welamuhuk,” ibag.

²³Ari ibagma Yosua inowen, ”Usasum hiren foroho lahebon hik isalihipteg Israel ninap NINIKNI Allah fam eneg hinindi hebel amek!” ulug hiyag isibagma

²⁴Israel inap arimanowen Yosua fam, ”Nit NINIKNI Allah fam wenggel haruk lit At ele eneg holtuk lamuhuk,” ibag.

²⁵O ino sambil Yosua inowen, ”Nit Israel ninap Allah umalikisi weregman eneg welamuhuk,” ulug sali imbibareg Allahn komo eneptuk ane Israel inap o Sikhemen milal enepfareg

²⁶suwesingga fam haharoho imbibag.[11] Imbibareg helep humon eke wibareg Allah wel turuk ambeg e suwon alma hutuk tibibag.

²⁷Hutuk tibibareg Yosua inowen Israel inap obog toho unubam ele uruk lit, ”NINIKNI Allahn nit nunubam ele hiyag nesehekon obog toho helep tu olohotman hiyag nesehekma niren NINIKNI Allah fahet awiya wahuk tohon helep hutuk tibihiyon aru siyengge hag toho mondabi welaruhu,” ulug sali imbibag.

²⁸Sali imbibareg Yosua inowen hinibam lalihip ulug hiyag isibagma inibam welatfag ambeg wal taneg libag.

²⁹Ari obog toho tibibareg hun Nun amloho Yosua NINIKNI Allah amingmingangge ino indag tibahon sali teng uhan 110 atfagma war atfag.

³⁰War atfagma kinang inggarehen tohon o Timnat-Serah tom Efraim fam punu Gaas iliko fil kinangma sale fisibag.

³¹Yosua oluk weregma Israel inaben NINIKNI Allah fam eneg wenggel haruk latfag. Yosua war atfagma ori winon NINIKNI Allahn Israel inap unubam fano ane turukmu haruk latfag inap suwon-suwon arimano onoluk welatfag li oho Israel inaben Allah ele eneg holtuk latfag.

³²Hun Yusuf uwag Israel inaben o Mesiren wilip atuk lit walug watfahon arimano o Sikhem kinangma sale fisibag. Sale fisibag ambeg ino indam Yakuben o Sikhem seneg latfag ahun Hemor umalikisi unubam uang perak teng uhan 100 fam onggo palfag ambeg Yusuf umalikisiyen ondohowon ngi atfag.

³³Harun amloho Eleazar oho war atfagma o Gibea tom Efraim fam werehon Eleazar amloho Pinehas ngi atfag ambeg ino kinangma sale fisibag.