Read Angguruk Yali YOSUA 3 Bible Online

YOSUA 3 - Angguruk Yali bible

YOSUA 3

¹Hiyag itfagma noholug likiyamon hubet Yosua in atfareg Israel inap obog toho inim o Sitim welatfag ambeg ino embeselug ik Yordan ayegma libareg sono ano ha ano ik paloho nindig amuhuk ulug ik ayegma nohik libag.

²Ik ayegma ino weregman o hinahanam atfagma Israel inap onowesi arimano o sabo wirig latfag ambeg walinggoho hiyag isil laruk lit,

³”E sali roho wirihon peti elma Allah Wene Numen haharehon kilabeg angge Lewi inap imam arimanowen paya roho walug larukmu yet isahupteg hir oho welahep ambeg embeselug it onombolim laruk lit

⁴peti ino tot yat toho 1 kilometer tam larukmu iraham hop toho la fug angge ombolim laruk lamuhup. Kalem lahubon ari indam oho larikip fugmu henepelegma re peti ino ombolim lahup halug kalem nonghong uhup fug,” ulug Israel inap hiyag isil libag.

⁵Hiyag isil libagma Yosua inowen Israel inap unubam hiyag isaruk lit, ”NINIKNI Allahn sono aben tuk fug teg ane hit henesehelimuwen tuhuwen hit hunubabut hale feruk lamek!” ulug hiyag isibareg

⁶nin peti foroho inap unubam hiyag isaruk lit, ”Peti ino paya roho walug hit tam atlihipmu Israel ninap honombolim ik Yordan paloho nindig amul,” ulug hiyag isibagma it tam atfag.

⁷It tam atikim NINIKNI Allahn Yosua fam ele uruk lit, ”O yoho tu famen ak timinteg Anden Israel inap enesehelimuwen hat hunuk suwap haptuk laruhukmu Israel inaben indam Allah ino Musa iraham welatisi hag toho Yosua iraham oho wereg ulug onoluk teg lit hat hele eneg holtuk lamuhup.

⁸Ketiya peti paya roho walug laruk inap ikma kulusareg pulmu kuk fug angge ilanma unduhuk lamusan hiyag isamihin,” ulug hiyag itfag.

⁹Hiyag itfagma Yosuan, ”Allah HINIKNI ele imisiyon holik maniyek!” ulug Israel inap wol enepfareg

¹⁰Yosuan te, ”Peti Ninikni Allah kinang obog toho senehon inowen tohon paya roho walug laruk inap arimano hit henelukema ik paloho larukmu yet isalihipteg Allah oluk werehon ino nit sehelimu wereg ulug honoluk atmisi. Aren o Kanaan inap, Het inap, Hewi inap, Feris inap, Girgasi inap, Amori inap, Yebus inap arimano obog toho hit honolohotman yanggal enebuhu.

¹²Ari fahet ketiya Israel ninap nununggul unuk nisanggowen wal toho ap misig-misig eneko enemumu unduhuk feselihip.

¹³Unduhuk feselihipmu peti ino paya roho walug laruk inap imam arimano unuyug ikma imbik kulusama ik Yordan pul ke kong toho ik eleruk filen waharukon yenggeltil lahamisi,” ulug hiyag isibag.

¹⁴Israel inap ik Yordan paloho lahuk pibag li likiya hupmu osit eneg narukmu ik Yordan firuhuk latfag.[2] Firuhuk latfag angge famen imam arimanowen ik Yordan paloho nindig amul ulug peti ino paya roho walug larukmu Israel inap oho o sabo wiroho welatfag ambeg embeselug onombolim libag. Libareg imam arimano unuyug ikma imbik kurukmen

¹⁶ik eleruk fil yat toho o pumbuk Adam o Sartan horogma ik lar atfagma yenggeltil lahibareg ambut ik saho ahik fil larukon firig atfag. Firig atfagma imam arimano ik Yordan pulmu kinang lilog atfag ambeg unduhukmu Israel inap obog toho it iniraham keyen ik fimag fil nindig atfareg o Yerikho kinangon fam ik ayegma welatfag.