Read Angguruk Yali YOSUA 4 Bible Online

YOSUA 4 - Angguruk Yali bible

YOSUA 4

¹Israel inap obog toho ik Yordan fima fil nindig atfagma NINIKNI Allahn Yosua fam ele hiyag utuk lit,

²”Israel inap ununggul unuk nisanggowen wal toho ap misig-misig og enepmihinteg

³hiyag isaruk lit imam arimano ik pulmu kinang lilog teg ambeg unduhuk lit weregma lalusareg helep nisanggowen walug yoho nohul peruk lahep ambeg imbik wamusan hiyag isamihin,” ulug hiyag itfag.

⁴Hiyag itfagma Yosuan Israel inap ununggul unuk wal toho ap misig-misig enebe nisanggowen enemumu unduhuk fisibahon arimano wol enepfareg

⁵hiyag isaruk lit, ”Peti NINIKNI Allahn tohon ino ik pulmu unduhuk ambeg lalihipteg Israel ninap nununggul unuk nisanggowen wirim toho helep nisanggowen ap wal taneg hunumaloma ha rulug watlihip.

⁶Helep ha rulug watlihibon arimano NINIKNI Allahn Israel ninap let nenebehek ane nenepeleg aruhu rohon ulug enehangge hutuk tubul. Hunumalikisiyen fobik hit hunubam, ’Helep aruma nungge fahet hutuk teberikip?’ ulug umung hisahupmu

⁷hiren hunumalikisi hiyag isaruk lit, ’Peti NINIKNI Allahn tohon ino paya roho walug laruk inap arimano ik Yordan ikma kurusareg nindig atukmen ik firig atisi ane nenepeleg am fug angge mondabi wenggel haruk lamuhuken helep aruma enehangge hutuk teberukuk,’ uruk lamuhup,” ulug Yosuan hiyag isibag.

⁸Ari ulug hiyag isibag ane roho ap nisanggowen arimano ik pulmu libareg NINIKNI Allahn Yosua hiyag itfag ane hikit toho Israel inap ununggul unuk nisanggowen wirim toho helep nisanggowen walug watfareg it nohul pibag ambeg imbik watfag.

⁹Imbik watfagma nin eke Yosua inowen peti paya roho walug laruk inap imam arimano unuyug ik pulmu sobig latfag ambeg helep nisanggowen hutuk tibibahon itano ketiya oho wereg.

¹⁰Imam arimano ik Yordan pulmu unduhuk lit weregman eneg NINIKNI Allahn Yosua feneyen hiyag isibag ane roho Israel inap folo-folo ik Yordan paloho nindig atfag. Tibag ane ari Musan Yosua fam ibag ane hikit toho teko libag.

¹¹Israel inap obog toho ik fumag fil libareg weregma peti Allahn tohon paya roho walug laruk inap oho nindig atfareg Israel inap eneluke fil atfag.

¹²Musan hiyag isibag ane hikit toho Ruben inap, Gad inap, Manasye inap minggiroho sehen seneko tam atfareg Israel inap winon enelukema nindig atuk latfag.

¹³Israel inap tog abukon ik paloho libahon arimano obog toho teng-teng angge winag isa fug toho 40.000 NINIKNI Allah it inim weregma sehen seneko ik fumag fil libareg Yerikho kinangon fam ik ayegma welatfag.

¹⁴Nindig atfag sambil ino NINIKNI Allahn Israel inap enesehelimuwen Yosua unuk suwap tibagma Israel inap obog tohowen Musa fahet enekol toho welatfag hag toho Yosua oluk weregma at fahet oho enekol toho wereg lit ele holtuk latfag.

¹⁵Ari roho turuk lit weregman NINIKNI Allahn Yosua fam ele uruk lit,

¹⁶”Peti paya roho walug laruk inap unubam ikman lahik wamusan hiyag isamihin,” ulug hiyag itfag ane roho

¹⁷Yosuan ikman lahik maniyek ulug wol enepfagma

¹⁸ik pulmuwen lahik watfag. Lahik waharuk lit unuyug lisoho walug ik ayegma sobit ha larukmen ik Yordan eleruk fil lareg latfahon ino husibareg tam firuhuk latfag hag toho fitfag.

¹⁹Israel inap ik Yordan paloho nindig atfahon sali mo ino fam pikalem tamon larukmu hup numen atfagma nindig atfareg o pumbuk Gilgal o Yerikho yali fil o sabo wiroho welatfag.

²⁰O Gilgal inowen Yosuan helep nisanggowen ik Yordan ikman walug watfahon itano hutuk tibibag.

²¹Hutuk tibibareg Yosua inowen Israel inap ele hiyag isaruk lit, ”Hunumalikisiyen fobik helep hutuk tibihiyon aruma fahet kapal hisahupmu

²²hiren te, ’Nit Israel ninap ik Yordan pul ke minggiroho kinang lilog atisimu ik fuma nindihig waharukuk ane fahet enehangge hutuk teberukuk,’ ulug hiyag isaruk lamuhup.

²³NINIKNI Allahn nit nunumbasi iniline ik Longgop lilohap tibagma nindihig watfag hag toho Aren nit nonolohotman ik Yordan firiha ferisimu nindihig waharukuk.

²⁴NINIKNI Allahn tirisi ane ari fahet ap kinang atogman atogma werehon obog tohowen hol hahupteg Allah inggik ineyon wereg ulug onoluk aruhumu Allah nit NINIKNI fahet eneg enekol toho welamuhuben hunumalikisi hiyag isaruk lamuhup,” ulug hiyag isibag.