Read Angguruk Yali YOSUA 5 Bible Online

YOSUA 5 - Angguruk Yali bible

YOSUA 5

¹NINIKNI Allahn Israel inap onolohotman ik Yordan lilohap tibagma nindig atfag ane fahet ap suwon Amori inap onowesi ik Yordan paloho mo ubuk uruk fil welatfahon men Kanaan inap onowesi ik saho ahik ayegma welatfahon menen hol hibareg enekolen Israel inap onolohotman inine roho tuk teg ane mondabi eleg latfag.

²Welatfareg o misihim sambil NINIKNI Allahn Yosua fam ele uruk lit, ”Helep habo hag toho umatmihinteg Israel inap indam enembilahap pal enepfag hag toho pal enepmihin,” ulug hiyag itfag.

³Hiyag itfagma Yosua inowen helep habo hag toho umaho fibareg Israel inap enembilahap pal enepfag. Punu enembilahap pal enepfag ambeg ino unuk Ap Enembilahap Pal enepfag Ambeg ulug suwalfag.

⁴Indam Israel inap o Mesiren wilip atfahon arimano obog toho enembilahap pal enepfagma wilip atfag angge famen lekma mase ril larukmen indag enepfahon arimano misig oho enembilahap paleg latfag fug. Mase ril larukmen eneg mo teng misigmen nubam hilag nuwalen 40 libagma ap sehen senehon o Mesiren wilip atfahon arimanowen NINIKNI Allah ele sobir isaruk latfahon ari fahet obog toho kalemman war atfag. War atfahon arimano enebe war am fugmu NINIKNI Allahn hiyag isaruk lit, ”Kinang mun angge man angge fano wilip atuk ambeg Anden hunumbasi unubam hit hunumalikisi og isahuk ulug hiyag isiyahon ino hit hinilen yet hahup fug,” ulug sali imbibag ane hikit toho it obog toho kalemman war atfag.

⁷It war atfahon arimanowen unumalikisi kalemman unubalmangge indag enepfahon arimano enembilahap pal enepfag fugmu Yosuan eneg enembilahap pal enepfag.

⁸Israel inap obog toho enembilahap pal enepfagma inibam o sabo wirig latfag ambeg wal taneg kibareg weregman yowil eleg atfag.

⁹Enembilahap pal enepfag sambil ino NINIKNI Allahn Yosua fam ele uruk lit, ”Mesir inaben hit mingming heneptuk lit apmayap heneptuk latuson o yoho Anden elehap turuk lahi,” ulug hiyag itfag. Hiyag itfag ambeg ino unuk Gilgal suwalfahon ketiya oho wereg.[3]

¹⁰O pumbuk Gilgal o Yerikho hili-hilimu wereg lit pikalem ino larukmu hup nunggul hurikenam welatfareg o Paskah sambil sakan atfagma hup arik ohoma Israel inaben Allah olohotman seni Paskah esetuk latfag.

¹¹Seni Paskah esetfahon ino nibareg noholug likiyamon Kanaan kinangman wilip atuk angge wibareg suburu roti sig elehon men hom men wirako naruk latfag.

¹²Kanaan kinangman wilip atuk angge nibag sul ino suburu manna Allahn Israel inap lekma weregma poholman og isaruk latfahon arimano imbisibag. Imbisibag li itanowen Israel inaben Kanaan kinangman wilip atuk angge eneg naruk lit welatfag.

¹³Welatfareg misihim sambil Yosua o Yerikho horogma libareg yet harukmen ap misig karog leho lit olohotma unduhukmu yet hibag. Yet hibareg Yosua ap ino iraham libareg kapal haruk lit, ”Nare, an nibil atmin ulug wahen ano, nuwatmin ulug wahen ano?” ulug kapal hibagma

¹⁴ap inowen te, ”Haren ehenon hikit toho wahi fug, an NINIKNI Allah otsi sehen senehon onowe welahiyon wahi,” ibagma Yosua ino aluke pilabeg kinangma sahung atfareg hi ruruk lit, ”An hat hamingmingangge nubam nungge ane hiyag nitmihin?” ulug kapal hibag.

¹⁵Kapal hibagma Allah otsi sehen senehon onowe inowen Yosua fam hiyag utuk lit, ”Hat unduhuk lahen ambeg tuma Allah ngi reg lit werehen huyug hililip angge hog tibisin!” ibag ane roho Yosuan uyug hililip angge hog tibisibag.