Read Angguruk Yali YOSUA 6 Bible Online

YOSUA 6 - Angguruk Yali bible

YOSUA 6

¹O itano li Yerikho inaben Israel inap fahet enekolen sok elehet walinggoho ohowon fam kurukon lare fisibareg ap kuk wilip am turuk latfag fug.

²Ari roho turukmu NINIKNI Allahn Yosua fam ele uruk lit, ”Anden Yerikho inap onowe suwon men sehen senehon enehako roho turuk inap obog toho hat hinggikmu og hitminon holuk toho welamin.

³Hat humalikisi sehen senehon arimano misihim-misihim o pumbuk Yerikho elehet ohowon sel ke walinggik larukmen o falfalikenam aruhu.

⁴Walinggik laruk lit peti elma Allah Wene Numen haharehon kilabeg angge foroho inap imam sabiren wam sapi andimbuk pinggong ele hag toho urukon sabiren seneko peti ino alukema laruk lamuhup. O sabiren angge imam itanowen pinggong ele il o pumbuk elehet ohowon sel ke sabirenam walinggik lahup.

⁵Sabirenam walinggik lahupteg imam itanowen pinggong ele hum toho watukmu hol hahupteg Israel hinap obog tohowen henele ine roho ngik-ngog turuk lamuhup. Ngik-ngog turukmen elehet o pumbuk walinggoho ohowon ino amu halog toho wamburukmu Israel hinap henebe man-man pikit kuhup,” ulug hiyag itfag.

⁶Hiyag itfagma Yosua inowen imam itano wol enepfareg hiyag isaruk lit, ”Hit henebe sabiren pinggong sabiren seneko tam larukmu winonen peti Allahn tohon ino paya roho walug it onombolim lalihip,” ulug hiyag isibareg

⁷Israel inap obog toho unubam hiyag isaruk lit, ”Hit obog toho o pumbuk elehet walinggoho ohowon sel ke walinggik lalihiben maniyek! Hit sehen seneg hinap winon peti Allahn tohon alukema lalihip!” ulug hiyag isibag.

⁸Ari ulug hiyag isibag ane roho sehen seneg inap winon tam atfagma imam enebe sabiren wam andimbuk pinggong ele hag toho urukon eke wal taneg seneg lit watil larukmu peti Allahn tohon it onombolim paya roho walug laruk latfag. Ari til king toho laruk lit fobik atfahon arimano peti Allahn tohon ombolim laruk latfag.

¹⁰Yosua inowen ap arimano uwan la fugmu hiyag isaruk lit, ”Hit laruk lit henele urukmu aben hol hisahup tohon ngik-ngog tuk fug angge henele uk fug angge lalihip! We anden uhuk sambil eneg ngik-ngog tuhup!” ulug hiyag isibag.

¹¹Hiyag isibag ane roho Israel inaben peti paya roho walug o pumbuk Yerikho elehet walinggoho ohowon sel ke we misihim eneg walinggik libareg o sabo wirig latfag ambeg suhuloho watfareg nohoruk latfag.

¹²Nohibareg Yosua ino hubet-habet in atfagma sono larukuk hag toho lul ulug ap sehen senehon winon tam atfagma peti foroho inap enebe sabiren pinggong wal taneg seneg lit watil larukmu peti Allahn tohon paya roho walug onombolim laruk latfag. Pinggong watil king toho laruk lit fobik atfahon arimano peti Allahn tohon ombolim laruk latfag.

¹⁴Ininggik pireneg angge libahon oho we misihim eneg walinggik libareg suhuloho watfag. Ari roho misihim-misihim eneg walinggik larukmen o falfalikenam atfag.

¹⁵Atfagma ininggik sabir angge o hil ket yinggirukmu Israel inap in atfareg tam libag hag toho o pumbuk Yerikho sabirenam walinggik libag. Winasul misihim-misihim eneg walinggik laruk latfag angge famen ari sambil eneg sabirenam walinggik libag.

¹⁶Falfalikenam walinggoho libareg sabiren angge laruk lit imam itanowen pinggong ele hum toho watukmu Yosuan Israel inap hiyag isaruk lit, ”NINIKNI Allahn o pumbuk aru nit nininggikmu og nesehekma ngik-ngog tiyek!

¹⁷O pumbuk aru pin kuruk lit mun angge man angge werehon NINIKNI Allahn tohon aben hila fug teg ulug halog toho hik-hak isalihip. We yaying turuk hiyap Rahab inowen ap niren mon eneptukukon itano hirag eneptisimu at ibam werehon men onoluk welamuhuben embeselihip!

¹⁸Siyahap tilihip angge hik-hak isaruk lit winon ninibam umbat ta lul ulug hirako walihip halug alem angginon nit Israel ninap o saboma welaheyon nunubam aruhu rohon ap misihen oho hirako wa fug!

¹⁹Emas umbagpag turuk angge men perak ili rurukon men tembaga besi ine angge fam wirihon arimano obog toho NINIKNI Allahn ngi reg laruhuwen Allah fahet mun angge man angge foroho ambeg imbik laruk lamuhuk,” ulug hiyag isibag.

²⁰Hiyag isibagma pinggong ele watukmu hol hibareg Israel inaben enele hi roho ngik-ngog turukmen elehet Yerikho walinggoho kilabehon amu halog toho wambibagma Israel inap enebe man-man we pikit o pumbukmu kibareg pin unusibag.

²¹Pin unusuruk lit mun angge man angge o pumbuk Yerikho fam welatfahon ap hiyap sabalonet kabiniyonet wam sapi, domba, keledai arimano obog toho unusibag.

²²Obog toho unusuruk lit Yosua inowen ap tam o Kanaan aluwat ha libahon piren itano unubam, ”Yaying turuk hiyap Rahab ibam lalihipteg hiren at ubam sali emberikibon hikit toho hiyap ino men ibam werehon men og eneplug watlihip,” ulug hiyag isibagma

²³it piren itano Rahab ibam kibareg ikni isinga men ori men ap o ino welatfahon arimano obog toho og eneplug wilip enepfareg Israel ninaben o sabo wiroho welahe ambeg iraham welamag ulug imbisik libag.

²⁴Libareg o pumbuk ino mun angge man angge welatfahon arimano indokma yale fisibareg fano-fano angge emas, perak, tembaga, besi fam wirihon arimano obog toho wibareg NINIKNI Allah fahet foroho angge winon emberuk ambeg imbik libag.

²⁵Ari roho turuk lit yaying turuk hiyap Rahab inowen aluwat ha libahon itano hirag enepfahon fahet ori men at nim welatfahon arimano obog toho Yosuan unusuk fug angge imbisibagma hiyap inowen ondohowonen ondohowon Israel inap enesehelimu weregman eneg ketiya oho wereg.

²⁶Israel inap o Yerikho pin kibag sambil ino Yosua inowen ele uruk lit, ”Ap san o Yerikho siyahap tihi ambeg aru suhuloho wiruhu halug NINIKNI Allahn alem angginon ubam umbuhu. O olun wahu sambil ino malik monggiyon war aruhu, o walinggoho elehet wahureg sok wiruhu sambil umalik ilabowon war aruhu,” ulug siyengge imbibag.

²⁷Siyengge imbibareg weregma NINIKNI Allahn Yosua let turukmu aren turuk latfag ane fahet o Kanaan inap obog tohowen holtuk latfag.