Read Angguruk Yali YOSUA 7 Bible Online

YOSUA 7 - Angguruk Yali bible

YOSUA 7

¹NINIKNI Allahn Israel inap hiyag isaruk lit mun angge man angge o Yerikho werehon umbuk fug angge obog toho eleha feselihip ulug hiyag isibag. Hiyag isibag ane ari Israel inaben sobir isaruk lit Yehuda ahun Zerah inowen endetfahon Zabdi amloho Akhan inowen Allahn eleha feselihip ibag angge eke hirako hilibag. Hilibahon ari fahet NINIKNI Allahn Israel inap unubahet olok hibag.

²Olok harukmu Yosua inowen otsi enesehelimuwon hiyag isaruk lit, ”O Betel yali fil Bet-Awen horogma o Ai aluwat ha lahalihip,” ulug hiyag isibagma lahibag.

³Lahibareg nin suhuloho watfareg Yosua hiyag utuk lit, ”O Ai pumbuk ino tot tehen nit abirangge siyahap tuhuk ulug lahakuk fug, we enebe tor angge 2.000 ano 3.000 ano tog abik lahakuben hiyag isamihin. Ai inap we tor angge werehen hit obog toho lahakup ulug hiyag nisaruk lit angginap nenepmihin fug,” ulug hiyag itfag.

⁴Hiyag itfag ane ari hikit toho enebe we tor angge 3.000 o Ai inap apmayap enebul ulug libag angge famen Ai inap fahet enekolen linggik-longgo ibag.

⁵Linggik-longgo urukmu Ai inap arimanowen mug eneplug laruk lit sok o Ai pumbukmu kuruk ke famen tulug o Syebarim libareg pule wereg ambehen Israel inap teng misigmen nubam hilag sohowen 36 unusibag. Unusibag ane ari fahet Israel inap enekol anggolo hibag.

⁶Enekol haruk lit Yosua men Israel inap onowesi menen enesum wan teg latfahon tararag toho hik isibareg fesi enebene lahaplug peti NINIKNI Allah Wene Numen haharehon elma kilabeg angge alukema enelenggen fam hur atfareg onorohole han kinangma sahung teg lit weregman eneg o hup atfag.

⁷Yinggig lit Yosua inowen sembahyang ibahon tu, ”Allah Hat NIKNI welahenon, nungge fahet Haren an numalikisi aruma hondog eneplug ik Yordan paloho nindig arik waharikin? Amori inaben ininggikmu umbuhukmu unusukag ulug waharikin ano? Nit ik Yordan fuma fil pok atla fano.

⁸Nikni, Israel inap aruma ap seliyon fahet enekolen linggik-longgo ehesama anden nungge ane imin?

⁹Linggik-longgo ehesa ane ari Kanaan inap men kinang tu ngi roho wereg inap obog toho menen hol hahupteg nunusul ulug waling nenebik waharuk lit nit nununuk kinang tu famen eleha fusuhup. Ari tuhup ane ariyen Hat hunuk suwon siyag aruhu rohon ulug Haren nungge ane tuhun?” ulug Yosuan sembahyang ibag.

¹⁰Ibagma NINIKNI Allahn Yosua fam ele uruk lit, ”Nungge fahet horohole kinangma sahung teg lit welahen? In amin!

¹¹Anden Israel inap unubam sali emberikikon suhan isaruk lit An nolohotma siyag ane turusa. Mun angge man angge o Yerikho werehon eleha feselihip irikik angge eke iren hilarusareg eleha fusuk angge famen enenggengge sehelimu hirako foroho lit wereg.

¹²Ari turusa ane ariyen Israel inap ininggareg Anden eleha feselihip irikik angge hag toho atusareg ap seliyon apmayap enebuk fug teg lit it onolohotman enekolen linggik-longgo ehesa. Anden irikik ane pisan toho hilarikip angge ino hiren eleha fusuhup fug halug An hit men welaruhuk fug.

¹³In atmihinteg Israel inap aruma An nolohotma wamuhuben haren it unubam hele uruk lit, ’Sono Allah men ambi amuhuk ulug hunubabut haloho welamiyek. Israel ninap NINIKNI Allahn ele urukon tu holeg lamek: Numalikisi Israel hinap welahebon, Anden irikik ane sobir isalug hilarikip angge eke hit sehelimu werehen hiren ap seliyon arimano apmayap enebuk fug teg lahep. Hilarikip angge ino eleha fusuhup halug eneg ap seliyon arimano apmayap enebuhup.

¹⁴Ari fahet sono likiya hit hununggul unuk wal taneg welahebon iraroho in arik wamuhupmu ap tuwen hirako foroho ulug honoluk aruhuwen enehangge hunubam hik tuhup. Hik turukmu enehangge ino An HINIKNI Allahn puhuk ane hikit toho ap ununggul unuk sa fam aruhuwon arimano eneg enemumu unduhuk lamuhup. Enemumu unduhukmu it onowesi wal taneg werehon unubam nin enehangge ino hik tuhupmu onowe sa ubam aruhuwon ino otsi men enemumu unduhuk lamuhup. Enemumu unduhukmu ap sa ibam werehon unubam enehangge ino aruhuwon arimano oho enemumu kilig oko in arik lahup.

¹⁵Kilig oko in arik lahupmu ap enehangge ino ubam aruhuwon inowen hirako hilarisi angge ino foroho ulug honoluk aruhumu aret anggenggeyet indokma hik isahup. An HINIKNI Allahn hit hunubam sali emberikik ane suhan isalug Israel hinap henesehelimuwen amben siyahon tirisi ane ari fahet ap ino war aruhu,” ulug hiyag itfag.

¹⁶Hiyag itfagma likiyamon Yosua inowen Israel inap in arik maniyek ulug hiyag isibagma it ununggul unuk wal taneg welatfahon arimano iraroho unduhukmu enehangge unubam hik turukmen ununggul unuk Yehuda inap unubam atfag.

¹⁷Yehuda inap arimano enemumu kilig oko in arik libagma unubam enehangge ino hik turukmen onowe Zerah otsi men unubam atfag. Hun Zerah otsi men enemumu in arik libagma enehangge ino hun Zabdi ibam welatfag inap unubam atfag.

¹⁸Hun Zabdi ibam welatfahon arimano enemumu in arik libagma Yehuda ahun Zerah inowen ondohowon Zabdi amloho Karmi inowen indag tibahon Akhan ubam atfag.

¹⁹Akhan ubam atfagma Yosua inowen at ubam ele uruk lit, ”Namloho, haren siyag ane tirikinon ino nit Israel ninap NINIKNI Allah iline fag toho uruk lit At unuk palimuwap timihin. Tor ane oho an nolohotman hirahuk fug angge haren tirikin ane obog toho an hiyag nimin,” ulug hiyag itfag.

²⁰Hiyag itfagma Akhan inowen hebeloho Yosua hiyag utuk lit, ”We tem ehen. Anden Israel ninap NINIKNI Allah olohotman siyag ane tirikikon tu hiyag hitmin:

²¹Niren ap seliyon enenggengge hilarukukteg anden yet harukmen hilarukuk angge sehelimu wan turuk asum o Babilonia ahun ekeyen fano roho yihik ferisiyon eke men ili ruruk angge perak anggin te kilogram piren men emas anggin te kilogram misig pul ke minggiroho men weregma yet haruk lit an nangge lalep perikikteg oko walug lalug an nibam o sabo wirigmu imbik kirikikteg kinang fabuloho sale ferikik. Sale ferikik angge arimano onggorikmu perak ino saltikik,” ulug fag toho hiyag itfag.

²²Hiyag itfagma Yosua inowen hun aruwen hilarisi angge yami rik lalihip ulug otsi hiyag isibagma folo-folo Akhan ibam libareg olma kulug kinang fabuloho yet harukmen Akhan inowen hilibag angge obog toho kinangma salfag ambeg perak ino oho onggorikmu weregma hiyahibag.

²³Hiyahibag angge arimano obog toho Yosua otsiyen oko walug Yosua men Israel inap obog toho weregma watfareg NINIKNI Allah olohotma seleg toho imbibag.

²⁴Imbibagma Yosua men Israel inap obog toho menen Akhan ino senetfareg umalikisiyet anggengge obog tohowet ambohom sapi keledai domba men ibam o sabo wirihon men aren hilibag angge obog toho men walug o Akhor tonggoma libag.

²⁵Libareg Yosua inowen Akhan fam ele uruk lit, ”Haren nit siyahap neneptikin hag toho o yoho NINIKNI Allahn hat siyahap hapmisi,” ibareg Israel inap obog tohowen Akhan umalikisi men helep fam unusibareg it enebeyet Akhan anggenggeyet aren hilibag anggeyet mangno roho indokma yal enepfag.

²⁶Indokma yal enepfag ambeg emberimu helep lahabil lahibahon arimano ketiya oho wereg. Israel inaben ari roho tibag halug NINIKNI Allahn it unubahet olok haruk latfag ane eleg atfag. Hun Akhan ubam alem angginon ari imbibag ambeg ino unuk suwalfahon ketiya oho o Akhor tonggo[4] suwaleg.