Read Angguruk Yali YOSUA 8 Bible Online

YOSUA 8 - Angguruk Yali bible

YOSUA 8

¹Welatfagma NINIKNI Allahn Yosua fam ele uruk lit, ”Hakolen yuk lahun fug. Anden o Ai inap onowe suwon men inibam pumbuk ino men enengginang walinggoho werehon men hinggikmu emberuk lahi. Ari fahet haren o Ai ilmig toho kuhuk ulug hotsi sehen senehon obog toho hondog eneplug lahakun.

²Lahakunteg o Yerikho inap onowe suwon men unubam tirikin hag toho o Ai inap onowe men unubam tuhun. Ari turuk lit enenggengge oho enembohom oho o winama eleha feseruk latikip hag toho eleha feselep angge famen we ari sambil eneg huhulangge hilahup. O ino ilmig toho kul ulug o Ai ambol fil hirako wereg lit kahal enesug lamuhuben hotsi minggiroho winon hiyag isahun,” ulug hiyag itfag.

³Hiyag itfagma Yosua otsi sehen senehon obog tohowen o Ai ilmig ta lul ulug wilip amuk oho lit otsi sehelimuwon enehako roho turukon teng-teng angge 30.000 en enesug latfareg hiyag isaruk lit, ”O hubanggo hit tam lalihipteg

⁴o Ai ino ambol fil elehet walinggoho ohowon horogma hirako wereg lit kahal enesug lamiyek. Kahal enesug lit henesehen wep toho welatlihip.

⁵Kahal enesug lit weregman eneg sono likiya an notsi winon men o ino horogma lahukteg pin kul ulug turukmu o Ai inap arimano winasul turusa hag toho yanggal nenebul ulug o inowen wilip arik waharukmu nit it onolohotman linggik-longgo uhuk.

⁶Linggik-longgo urukmu iren nit fahet winasul linggik-longgo urusa hag toho ketiya oho turuk ulug wenggel haruk lit nit mug neneplug larukmen eneg o ino embeselug yatma lahup.

⁷Yatma larukmu hiren yet isahupteg hirako welamuhup ambehen wilip atug o ino ilmig toho kuhupmu hit HINIKNI Allahn o ino hininggikmu umbuhu.

⁸O ino ilmig toho kuruk lit NINIKNI Allahn hiyag nisarisi ane hikit toho harep pisako olunap tubusuhup. Anden hiyag hisihiyon hikit toho eneg tuhup,” ulug hiyag isibag.

⁹Hiyag isibag ane hikit toho ap arimano libareg o Ai ino kahal enesug lamul ulug o Ai men Betel men honggolegma Ai hubula fil hirako wereg latfag. Weregma hup ino sambil Yosua otsi winon pok atfahon men o sabo witfag ambeg nohibag.

¹⁰Noholug likiyamon Yosua inowen otsi in arik maniyek ulug hiyag isibagma iraroho unduhukmu wal taneg kim isibareg Yosua men Israel inap onowesi men tam atuk lit o Ai lahibag.

¹¹Lahibareg Yosua otsi men o Ai horogma ik eleruk fil o sabo wirik libag. O sabo wirik libag ambeg ino men o Ai men honggolegma tonggo eke welatfag.

¹²Yosua otsi men o sabo witfag ambeg weregma otsi tam libahon enebe teng-teng angge 5.000 o Ai men Betel men honggolegma Ai hubula fil hirako welatfag.

¹³Ari regma Yosua otsi sehen senehon anggolo welatfahon arimano luhaloho o Ai ik eleruk fil weregma otsi winon o ino hubula fil kahal enesug lit welatfag. Weregman hup atfagma Yosua otsi at men ambiyeg welatfahon arimano tonggo ino pulmu wambibag.

¹⁴Likiyamon Ai inap onowe suwon inowen Israel inap arimano tonggoma weregma yet isibareg Israel inap winonen nit ninibam ambol fil hirako wereg lit kahal nenesug ulug apeleg toho wereg lit Israel inap tonggoma wambik waharuson arima unusul ulug otsi obog toho men o inowen wilip atug indam Israel inap men tog apfag ambeg lek horogma libag.

¹⁵Unusul ulug larukmu yet isibareg Yosua otsi menen enekolen linggik-longgo uruk hag toho turuk lit lek fil libag.

¹⁶Linggik-longgo urukmu yet enesug lit ap obog toho o Ai welatfahon arimano palu arik maniyek ulug wol enepfareg inibamen wilip atug Israel inap mug eneplug laruk lit o ino embeselug we tot yat toho libag.

¹⁷Israel inap mug eneplug lul ulug o pumbuk elehet walinggoho ohowon sok kuruk ke husoho embeselug libagma ap misig oho pok atfag fug.

¹⁸Pok atfag fugmu NINIKNI Allahn Yosua fam ele uruk lit, ”Anden o Ai ino hinggikmu emberuk lahireg haren fit seneg lahenon ino leko o ino fil pil hamihin,” ulug hiyag itfagma Yosua inowen fit seneg latfahon ino leko o Ai fil pil hibag.

¹⁹Pil harukmu yet hibareg Yosua otsi o pumbuk ino kahal enesug latfahon arimano folo-folo hirako welatfag ambehen wilip atfareg o ino kuruk lit harep pisako siyaha fisibag.

²⁰Ari turukmu o Ai inap arimano hebeloho enembol fil yet harukmen inibam pumbukmuwen hubu poholma laharukmu yet hibareg inine eleg atfagma wilip amul ulug turukmen ininggik pikit fil hare fil la fug teg latfag. La fug teg lit weregma inibam oho harep pisako siyaha feserukmu yet isibareg Yosua otsi men lek fil linggik-longgo uruk latfahon arimanowen ap mug neneplug wahason arima unusik lul ulug hebeloho it enembeg laruk latfag.

²²Israel inap lek fil libahon arimano suhuloho o Ai inap unusil waharukmu Israel inap o Ai pin kibahon arimano oho o inowen wilip atug unusul ulug enembeg waharuk latfag. Ari roho turuk lit o Ai inap arimano fuman-fuman himbit enesug lit mul unusurukmu ap misig oho wilip atfag fug.

²³We Ai inap onowe suwon ino senetfareg ar oho watep angge famen ebe oluk angge Yosua ambeg hondoholug libag.

²⁴Israel inap lek fil linggik-longgo urukmu o Ai inaben unusul ulug mug eneplug libahon arimano obog toho Israel inaben unusibareg hebeloho o pumbuk ino kik waharuk lit olma welatfahon oho obog toho unusibag.

²⁵O ino sambil eneg unusibahon abet hiyabet enebe teng obog sehelet obog 12.000 unusibag.

²⁶Mul unusukag ulug Yosua inowen fit o Ai fil leho lit weregman eneg ap obog toho unusibag.

²⁷Unusibareg Israel inap arimanowen NINIKNI Allahn Yosua hiyag itfag ane hikit toho o Ai inap enembohom men enenggengge winon men huhulangge hilibag.

²⁸Hilibareg Yosua inowen o pumbuk harep pisako olunap tibisibag ambeg ino ketiya oho wereg.

²⁹Ai inap onowe suwon ino Yosua inowen e fam lahapfagma weregman eneg o hup atfagma otsi hiyag isibag ane hikit toho wareg angge ino e famen pilabe fik libareg sok o pumbukmu kurukon alukema hik isibag. Hik isibag ambeg emberimu helep lahabil lahibahon arimano ketiya oho wereg.

³⁰O itano li Yosua inowen Israel ninap NINIKNI Allah fahet hubu lahaptuk ambeg ulug tom Ebal fam helep esengget watfag.

³¹Helep esengget waruk lit NINIKNI Allah amingmingangge Musa inowen Israel inap hiyag isibag ane suwesingga fam paloho imbibahon ino hikit toho helep ine angge besi fam fele ruruk elehon eneko esengget watfag. Esengget watfag ambeg ino emberimu Israel inap arimanowen NINIKNI Allah fahet hubu lahabul ulug wam winon yaltuk lit winon Allah olohotma nul ulug esetuk latfag.

³²Helep esengget watfag ambeg ino Yosua inowen hun Musan tam Israel inap iniline haharoho imbibag awene ino helep misig fam paloho imbibag.

³³Paloho imbibagma Israel inap obog toho onowesi men ap suwon sehen senehon milal eneptukon men alem haloho emberuk inap men ap pohon it sehelimu welatfahon men peti Wene Numen haharehon elma kilabeg angge ino fuma-fuma walinggoho in arik libag. In arik libahon arimano minggiroho winon tom Gerizim fil winon tom Ebal fil unduhukmu it honggolegma Allah amingmingangge Lewi inap peti forohowon arimano unduhuk latfag. NINIKNI Allah amingmingangge Musa inowen Israel inap fuma-fuma unduhukmu Allah unuk fam hi eneptuk lamuhup ulug indam hiyag isibag ane hikit toho unduhuk latfag.

³⁴Unduhukmu Yosua inowen Musa wene suwesingga fam hahareg ane obog toho uruk lit Allah ele holtuk lamuhup halug fano welamuhup, At ele sobir isaruk lamuhup halug siyag amuhup ulug hiyag isibag.

³⁵Ari roho hiyag isaruk lit hun Musan indam hiyag isibag ane paloho imbibahon ino il misig oho umbusuk fug angge abirangge Israel inap obog toho abet hiyabet maliket ap pohon it men welatfahonet hiyag isaruk latfag.