Read Angguruk Yali YOSUA 9 Bible Online

YOSUA 9 - Angguruk Yali bible

YOSUA 9

¹Israel inaben ap seliyon obog toho apmayap eneptuk urukmu hol hibareg ap suwon-suwon ik Yordan hubula fil tom fam welatfahon men hebema welatfahon men ik saho ahik ayeg keyen tulug tom Libanon fam welatfahon men Het inap, Amori inap, Kanaan inap, Feris inap, Hewi inap, Yebus inap fet enesug latfahon arimanowen

²nenele ul ulug palu atfareg inindi misig toho Yosua men umalikisi Israel inap men tog abik lahuk ibag.

³Ari turukmu Hewi inap o Gibeon welatfahonen oho hun Yosuan o Yerikho men Ai men fam tibag ane hol hibareg

⁴Israel inaben nit nunubahet yatma inap enemu waharuk pukag ulug sum miningon men unuyug hililip angge kiririp tohon hekel fam seleben tibahon men wan teg lit ikag onggorik warehon somug tag toho fanowap tibahon elma ik anggur ahaluwe hinanggohon men sum siyahon men enembohom keledai emberimu imbik lahibareg kalemma laruk lit narukon suburu roti anggen wirahowon lilohon fele-fele larukon walug libag.

⁶Walug laruk lit o Gibeon inap arimano Israel inap o Gilgal iraham o sabo wiroho weregma libareg Yosua otsi men hiyag isaruk lit, ”Nit o yatman henembeg wahereg nit men hit men mangno roho welamuhuken sali nunubam imbiyek,” ibag.

⁷Ibagma Israel inaben Hewi inap arimano unubam enele uruk lit, ”Nit yatman wahe ehep angge famen hit hinibam men nit ninibam men horogma welahereg mangno roho welamuhuk ulug hunubam sali umbuk fug teg lahe,” ulug hiyag isibag.

⁸Hiyag isibagma Hewi inap arimanowen Yosua fam, ”Hat hamingmingangge wahe,” ulug hiyag itfagma Yosua inowen, ”Hit sa umalikisi o keman wahep?” ulug kapal isibag.

⁹Kapal isibagma iren hiyag utuk lit, ”Ninikni, nit ninibam yitmi-yatma wereg lit hat HIKNI Allah unuk suwon fahet holtukuk. Aren o Mesir inowen turuk latfag ane men

¹⁰Amori inap onowesi suwon piren ik Yordan yali fil o Hesbon welatisiyon Sihon men o Astarot welatisiyon Og men unubam tirisi ane men obog toho holtukuk.

¹¹Holtukukmu nit nonowesi men nonori ninibam werehon obog toho menen hiyag nisaruk lit, ’Hit lalihipteg kalemma laruk lit suburu narukon walug Israel inap enembeg lahupteg hiyag isahubon tu: Hit men nit henemingmingangge waheyon men mangno roho welamuhuken sali nunubam imbiyek uhup,’ urusa ane hikit toho wahe.

¹²Lul perukuk sambil ino suburu roti anggen wiratukukon inahan tegma seneko ninibamen wilip atukukteg yat toho walug larukmen eneg lilog atuk lit fele-fele larisiyon tu yet hemek!

¹³Ikag keron elma ik anggur ahaluwe hinanggoho wilip atukukteg yat toho walug larukmen eneg wareg latisiyon aruma men nenesum men nunuyug hililip angge men kiririp tirisiyon aruma oho yet haruk lit yatman wahe ane ino honoluk atmisi,” ulug hiyag isibag.

¹⁴Hiyag isibagma Israel inaben hol hibareg NINIKNI Allah fam nanggintul ulug kapal ha fug angge pali wat enebulen suburu walug wahason we tor angge nul ulug suburu iren walug watfahon tor angge nibag.

¹⁵Nibareg Yosua inowen nit men hit men mangno roho wereg lit hunusuhuk fug ulug sali unubam imbibag. Imbibagma Israel inap onowesi arimanowen oho tem toho ehe ulug hiyag isibag.

¹⁶Sali unubam imbibareg Israel inap arimano wilip atug larukmen eneg hup hinahanam atfagma Hewi inap inibam o Gibeon men Kefira men Beerot men Kiryat-Yearim men libag. Libag ane ariyen Hewi inap inibam o Gilgal horogma nit nenengginang fam wereg ulug onoluk atfag.

¹⁸Onoluk atfareg Israel inap arimanowen unuselep angge famen it onowesi arimanowen Israel inap INIKNI Allahn holeg lit weregma hunusuhuk fug ulug sali unubam imbibag angge re unusuk fug teg latfag. Unusuk fug teg latfag ane ari fahet Israel inap obog tohowen onowesi unubam enele onolok toho uruk latfag.

¹⁹Ari urukmu onowesiyen it unubam enele uruk lit, ”Israel ninap NINIKNI Allahn holeg lit weregma it unubam sali emberukuk angge re unubam nonolok ane tuk fug teg lahe.

²⁰Niren tem ehe ulug hiyag isarukukon pisan isahuk halug Allah undama ahe laharuk lit alem angginon nunubam umbuhu rohon ulug unusuhuk fug,” ibag.

²¹Ari ibareg onowesiyen nin hiyag isaruk lit, ”Unusila angge famen nit fahet e kahaltuk lit ik hinang nisaruk lamuhuben mingming eneptuk lamuhuk,” ibag ane hikit toho Hewi inap unubam turuk latfag.

²²Onowesiyen ibag ane ari hikit toho Yosua inowen Gibeon inap arimano wol enepfareg it unubam ele uruk lit, ”Hit hinibam nit horogma welahep angge famen nungge fahet kalem yitmi-yatman wahe ulug henele si ane nunubam irikip?

²³Henele si ane irikip ane ari fahet siyag amuhup! Hit nenemingmingangge wereg lit Nikni Allah ibam fahet e kahaltuk lit ik hinanggik larukmen eneg mondabi welamuhup,” ulug hiyag isibag.

²⁴Hiyag isibagma Gibeon inaben Yosua fam enele uruk lit, ”Hat HIKNI Allahn amingmingangge Musa feneyen hiyag hisaruk lit, ’Kinang ari obog toho hit ngi amuhuben ap o pumbuk obog toho mondabi elehap turuk lamuhup,’ ulug hiyag isarisi ane nit hat hamingmingangge welaheyonen oho hol harukukteg nit nunusuhup tohon ulug hambeg waharukukteg un ane hiyag hutukuk.

²⁵Ari fahet ketiya hat hinggikmu welahe. Haren fano pemihin ane hikit toho nunubam timihin,” ulug hiyag itfag.

²⁶Ari roho turuk lit Israel inaben Gibeon inap arimano unuselep angge famen Yosua inowen ili og enepfagma otsiyen unusibag fug.

²⁷Unusibag fureg Yosua inowen Gibeon inap arimano mingming eneptuk lit nit Israel ninap fahet oho NINIKNI Allah olohotma hubu lahaptuk ambeg fahet oho e kahaltuk lit ik hinanggik laruk lamuhup ulug hiyag isibag. Hiyag isibag ane ari hikit toho Allahn fobik An wel naptuk lamuhup ulug mumal tibag ambehen ketiya oho turuk.