Read Angguruk Yali 2 TESALONIKA 2 Bible Online

2 TESALONIKA 2 - Angguruk Yali bible

2 TESALONIKA 2

¹Nonowe Yesus Kristus waruhumu At men mangno roho palu amuhuk ane fahet hiyag husul ane tu holeg lamok.

²Nonowe Yesus waruhu urusa sambil ino yoho sakan tehek uhupmu hinindi fir am fug angge nonghong uhup fug. Ari roho uhup inap arimanowen fulu ane tehema nonoluk aha uhup ano, Allah wene fanowon hiyag hisaruk lahe uhup ano, Paulusen suwesingga fam haharoho emberisiyon fam nonoluk atisi uhup ano, ari uhup ane fahet enele holuhup fug.

³Ap enele eke hag eke hag urukmu hinindi nin aruhu rohon holuhup fug. Yesus waruhu sambil ino uwan sakan tuk fugmu ap anggolowen Kristus enembol yig umuhup. Ap misig olok ane eneg turukon fahet mondabi siyag aruhuwon ino tam inam aruhu.

⁴Aben usa urukon men ninikni Allah wereg urukon men at inowen an palimu welahi uruk laruhu. Allah men seli roho wereg lit Allah ibam hur arik kuhureg an ninggareg Allah welahi uruk lit palimuwap tahu.

⁵An hit men ambiyeg wereg lit siyahon ino waruhu ulug hiyag hisarikik ane honoluk toho welahep fug?

⁶Allahn siyahon ino inam aruhu pibag li inam aruhu ulug ketiya seneg angge misihen at seneg lit werehon ino hit honoluk atisi.

⁷Ap siyahap eneptukon inowen hirako siyahap eneptukmu seneg angge inowen inggik ine roho ki rehen inam atuk eleg. Senehon ino inggik kobog isaruk halug

⁸siyahon ino inam aruhumu yet hahup. Nonowe Yesus waruhu sambil ino ambilik ahe fam pinggi ware feseruk lit mondabi elehap tuhu.

⁹Siyahap eneptukon ino Iblisen ineyap turuken inam aruhureg fano ane eke hag eke hag turuk lit aben tuk fug teg ane turuk lit ele si ane enehangge emberuk laruhu.

¹⁰Allahn siyag amuhup peruk inap arimano unubam at inowen enele ying eneptuk lit siyag-siyag ane turuk lamuhup ulug ele si eke hag eke hag uruk lit inindi ninap enebuhu. It arimano tem toho uruk awene inowen it fanowap enebuk angge famen enembol yig utuk lit inindi haruk elehen siyag amuhup.

¹¹Enele si hiyag isarukon fahet tem toho peruk lamuhuben Allahn siyahon ino inindi ninap enebukag ulug it sehelimu monde fuhu.

¹²It arimano wene fanowon tem toho inindimu wenggel haruk eleg lit siyag ane fahet enehiyeg haruken it obog toho unubam alem siyahon umbuhu.

¹³Nori, Nonowe Yesusen indi henesuhon welahepma Allahn wal tibag sambilen hit fanowap henebuhuk ulug mumal heneptisimu hit fahet Allah fam Ninikni uruk lahe. Allah hime fanowon hunubam emberisiyon inowen fanowap heneptisimu wene fanowon fahet hiren tem toho hinindimu wenggel haruk latikip.

¹⁴Wene fanowon niren hiyag hisaruk latukukon ariyen Allahn wol heneptisi. Wol heneptisiyon inowen Nonowe Yesus Kristus lehoma werehon ino men mangno roho welamuhuben palimuwap henebuhu.

¹⁵Ari fahet hit hinine roho unduhuk lit nenembilik fam hiyag hisarukuk ane men suwesingga haharoho emberukuk ane men hininggik ine roho seneg lamuhup.

¹⁶Nonowe Yesus Kristus men Ninikni Allah menen hiren fano ane hininggik fam turuk lit henembilik fam hiyag isaruk lamuhuben Iren onggon heneptuk lit hinindi wirikap heneptuk lamuhup. Ninikni Allah inowen indi nisaruk lit onggon angge mondabi eleg am fug tohon og nisarisi. Og nisarisireg ninggareg nindiyen fanowap henebuhuk ulug hiyag nisarisimu niren At nangno ruruk lahe.