Read Angguruk Yali 2 TESALONIKA 3 Bible Online

2 TESALONIKA 3 - Angguruk Yali bible

2 TESALONIKA 3

¹Nori, nit fahet sembahyang uruk lit Allah wene su amag ulug hiren fano holtikip hag toho ap winonen oho holuhuben sembahyang uruk lamuhup.

²Wene fahet ket-ker ane uruk lit siyag ane turuk inaben nenele ying neneptuken Allahn windat nenebukag ulug sembahyang uruk lamuhup. Ap obog tohowen Allah fam inindimu wenggel haruk eleg angge famen

³Nonowe ino indi wirik toho wereg lit hit hinindi ineyap heneptuk lit siyahon alukeman hit windat henebuhu.

⁴Nonowe fam ninindimu wenggel haruk lit hit komo heneptuk laheyon hikit toho turuk lahep hag toho fobik oho ari hiren turuk lamuhup peruk lahe.

⁵Ninikni Allah hinindi reg lit Nonowe Yesus indi imbik wamburuk latisi hag toho hir oho hinindi imbik wamburuk lit welamuhup ulug Ninikni Allahn hinindi anggarap henebuhu.

⁶Nori, ap sa henere wereg angge famen ambingga roho wereg lit niren hiyag hisarukukon hikit toho turuk eleg halug at horogma welamuhup fug. Ari ulug Nonowe Yesus Kristus unuk fam komo heneptuk lahe.

⁷Nit hit sehelimu wirimangge welatukukmu nonombolim la hag tohon ari hit honoluk. Hit men wereg lit ambingga roho welatukuk fug.

⁸Henenggengge saplangge narukuk fug. Ap ininggikmu werehon eneg naruk lit hunubam angginap tul fug ulug likiya hupmu asengseng toho nininggik fam yami ruruk latukuk.

⁹Henenggengge hila fug teg lahe perukuk fug. Niren tul ane ari hiren yet nisahupteg hiren oho ari roho turuk lamuhup ulug wirimangge emberukuk.

¹⁰Nit hit sehelimu wereg lit alem aru fahet hit komo heneptukuk: Ap misihen yabuk ninggik fam wit taruk ane nirim peruk ahun ino suburu nahu fug.

¹¹Ap winon hit sehelimu ambingga roho wereg urukmu holtukukon ari fahet komo heneptuk lahe. It arimano yabuk wit ta fug angge alem elehon fahet ket-ker ane til noruk lit wereg.

¹²Ap ari hag toho werehon arimano iniyabuk yuwag toho wit tahupteg enesuburu ininggarehen tohon naruk lamuhup ulug Nonowe Yesus Kristus unuk fam onolukap eneptuk lit komo eneptuk lahe.

¹³Nori, hit henesukun siyag am fug angge fano ane eneg turuk lamuhup.

¹⁴Suwesingga aru fam haharoho embeheyon ap misihen hol haruk eleg halug at inggali amag ulug ubam enehangge tag tuhupteg at men hininggik ahandip toho welamuhup fug.

¹⁵Ap ino seliyon wereg peruk lamuhup fug, nenere amag ulug komo ruruk lamuhup.

¹⁶Ninikni Allah ap mangnowap eneptuk ahun inowen likiya hupmu alem eke hag eke hag hunubam atukmu hinindi yuwahap heneptuk lit mangnowap heneptuk laruhu. Ninikniyen hit fet henesug laruhu ulug sembahyang uruk lahe.

¹⁷An Paulusen hi heneptuk lahi ane aru ninggareg ninggik fam hahatuk lahi. Suwesingga obog toho emberuk lahiyon arimano fahet enehangge tu emberuk lahi.

¹⁸Nonowe Yesus Kristus inowen indi henesug laruhu ulug sembahyang uruk lahi.