Read Angguruk Yali 1 TIMOTIUS 2 Bible Online

1 TIMOTIUS 2 - Angguruk Yali bible

1 TIMOTIUS 2

¹Atam hiyag hisaruk lahiyon Allah ubam henele uruk lit heng taruk lamuhupteg ap obog toho fahet sembahyang uruk lit Allahn og nisarukon fahet hi ruruk lamuhup.

²Ap obog toho fahet sembahyang uruk lit nit welamuhuk ane fahet yuwag toho fano roho Allah fam wenggel haruk lit nonori men mangno roho welamuhuken pemerintah men ap suwon men fahet sembahyang uruk lamuhup.

³Ihiyon ari eneg Allah windat neneptisiyon inowen fano peruk lit ahiyeg haruk.

⁴Ap obog toho Yesusen fanowap enebuhumu pikir ane onoluk aruhu ulug Allahn fano peruk lit wereg.

⁵Allah we misig weregma ap men Allah men mangnowap eneptukon we misig eneg Kristus Yesus ap kinangmon atfahon ino At eneg wereg.

⁶Ap obog toho ininggik hele warehon lol amuhup ulug inggareg ayeg waroho og isibag. Ihiyon ari atam sali watfahon ino hikit toho inam atisi.

⁷Wene inam atisiyon aru yonggo laruk laruhun ulug Allahn an unduhuk nubaharisiyon inowen tem toho uruk lahi, nele si uruk lahi fug. Yahudi inap fuhon o pumbuk yatma werehon arimano Allah fam nindi pikit toho wenggel haruk lit hiyag isaruk lahi.

⁸O kema-kema aben sembahyang uk oho lit ininggik fanowon unug haruk lit unundama ahe lahuk fug angge onori men hili roho welam fug angge sembahyang uruk lamuhup.

⁹Hiyaben wenema kul ulug sum se roho wan tuk hahon eneg wan turuk lamuhup. Honorukmu fano-fano angge kilabuk fug angge umbagpag turuk angge wan tuk fug angge sum onggo anggolo fam warukon wan tahup fug.

¹⁰Sum wan turuk hag toho inindi fanowon eneg wenggel harukon Allah wene holtuk hiyap ariyen wan tuk tehon wan turuk lamuhup.

¹¹Wene hiyag isarikim hiyap eneplohok eleg angge apma wereg lit hiyag isarukon holtuk lamuhup.

¹²Hiyap enele hemet toho wene hiyag isarukon arimanowen ap hiyag isahup fug. Ininggareg enewelwel tubat taruk lit nenehunsi nit nenepma wereg puk fug angge enele eleg angge welamuhup.

¹³Allahn ap wal tibag sambil Adam tam wal tibareg Hawa fobik wal tibag.

¹⁴Hun Adamen Iblis ele holfag fug, he Hawan eneg ele holfareg siyag ane tibag.

¹⁵Siyag ane tibag angge famen hiyaben malik indag eneptuk lit Allah fam wenggel haruk lit ap inindi isaruk lit fano ane turuk halug tuk teg ane eneg turukmu Allahn fanowap enebuhu.