Read Angguruk Yali 1 TIMOTIUS 3 Bible Online

1 TIMOTIUS 3 - Angguruk Yali bible

1 TIMOTIUS 3

¹”Ap sa Allah umalikisi ikni roho fer enesug laruhuk peruk lit wereg ahun inowen yabuk fano anggolowon seneruhuk peruk laruhu,” ulug aben uruk ane ari tem toho uruk.

²Ap Allah umalikisi ikni roho fer enesug lit welaruhuwon ino re at fahet abug uruk elehon, uhe misig werehon, indi imbik wamburukon, fuki roho wenggel harukon, indi wirik toho werehon, ap pohon unubam fano ane turukon, ele seleg toho urukon eneg welam teg.

³Ap inowen ik olokon nalug turuk hag toho turuk laruhu fug, olok ane puk fug angge indi wiyig toho werehon, ap hili roho werehon mangno atukon, uang fahet nikni peruk elehon eneg welam teg.

⁴Ap ino uhe malik men fano werehon umalikisi enesukun fano roho turuk lit nele holtuk lamuhup ulug komo eneptukon inowen Allah umalikisi sen enesug laruhu.

⁵Ap ino uhe umalik komo eleg angge wereg halug Allah umalikisi nangginoho fer enesug lam teg?

⁶Ap ket eneg wene holtukon Allah umalikisi fer enesug lit halug awelwel tarukmu Iblisen siyahap tuhu rohon Allah umalikisi ikni roho welaruhu fug.

⁷Wene holtuk eleg inaben ap ino fahet holuhupteg fano puhup. Fano puk fug angge abug uhupmu Iblisen yebangge reg ambeg luhur aruhu rohon.

⁸Uang Allah fahet emberukon arimano foroho inap fahet tu imin: Inindi wirik toho werehon, enembilik piren toho uruk elehon, ik olokon nalug turuk inap hag toho turuk elehon, mun angge man angge fahet enesehet teg elehon eneg in amuhup.

⁹Allah wene fag toho hiyag isarisiyon it arimanowen inindimu fano roho foroho lamuhup.

¹⁰In enebuhup inap arimano unubabut tam yer isalug aben fano peruk halug unduhuk feseruk lamuhup.

¹¹Unuhesi oho inindi wirik toho wereg lit sibiling-sibiling ane uk fug angge inindi imbik wamburuk lit fano werehen iren turuk ane fahet aben fano peruk lamuhup.

¹²Uang Allah fahet emberukon foroho inap arimano uhe misig og talug lit uhe umalikisi men fano roho wereg lamuhup.

¹³Uang Allah fahet emberukon arimano indi wirik toho foroho lit weregma aben yet hahupteg fano puhupmu at inowen Kristus fam tem toho peruk lahi ulug ele ine roho ap hiyag isaruk laruhu.

¹⁴Folo-folo hambeg pen hiya waruhuk angge famen ihiyon obog toho aru suwesingga fam tam emberuk lahi.

¹⁵Amusun toho welatug waruhuk halug suwesingga imbihiyon ari fam Allah ibam nangginoho foroho lamuhup ulug holuk toho welaruhun. Allah ibam uruk lahiyon ari Allah oluk werehon ino helep ubule hag toho o uwag hag toho weregma umalikisi at apma fano welamuhup.

¹⁶Wene nit uruk laheyon Allahn map toho foroho latfahon ketiya fag toho hiyag nisarisi ane aru uruk lahe: At ino ap kinangmon atfareg inam atfagma Allah hime fanowon fam fanowap tibag. Malaikat iniline oho ebenam atfagma o pumbuk Allah unuk enepeleg ambeg oho At fahet hiyag isaruk lit ap kinangmonen At fahet tem toho perusama At wel tuhup ulug Allahn fanoma unduhuk fibag.