Read Angguruk Yali 1 TIMOTIUS 5 Bible Online

1 TIMOTIUS 5 - Angguruk Yali bible

1 TIMOTIUS 5

¹Haren ap sabalon unubam hele ine roho komo enebuk fug angge hele fano roho niknisi ulug unubam uruk laruhun. Ap kabiniyon unubam nori ulug komo eneptuk laruhun.

²Hiyap sabalon unubam nisingasi ulug hiyap tuhumon unubam notsi peruk lit hundama siyag ane wenggel ha fug angge komo eneptuk laruhun.

³Hiyap yuwohon we tem toho yuwog toho werehon hindi enesug lit ler eneptuk laruhun.

⁴Hiyap yuwohon misig umalikisi ambiyangasi itanowen let tuk fug angge wereg halug it arimano komo eneptuk lit hiniknisi hinisingasi hinibam werehon arimanowen hit totma kul heneptuk latfag hag toho hiren oho ler eneptuk lamuhup ulug komo eneptuk laruhun. Ari roho turukmu Allahn fano peruk.

⁵Hiyap yuwohon we tem toho yuwog toho wereg lit amu eneg werehon inowen likiya hupmu Allah fam wenggel haruk lit sembahyang uruk lit wereg.

⁶Hiyap yuwohon ekeyen ahiyeg haruk ane eneg yami ruruk halug at ino oluk wereg angge famen warehon hag toho wereg.

⁷Hiyap yuwohon fano roho welamag tohon ihiyon ari fam komo eneptuk laruhun.

⁸Ap misihen uhe malik men ibam werehon arimano men fano fer enesug lam fug angge wereg halug at ino wene fam ambol yig utuk ahun hag toho wereg. Wene holtuk eleg inap tot fano weregma at ino mondabi siyag aruhu.

⁹Hiren hiyap yuwohon ununuk suwesingga fam haharoho umbuhubon arimanowen Allah umalikisi ler eneptuk lamuhup. Ununuk umbuhunon arimano indag tibag sali mo ilig am wirig am turukmu teng piren nubam hilag tehon 60 eneg ununuk emberuk laruhun. We misihim ap og enesug latfareg lin enepfahon,

¹⁰unubabut fano ane tirikim yer isaruson, unumalikisi fano roho kul eneptuson, pohon ler eneptukon, Allah umalikisi unuyug umag eneptukon, siyag toho werehon ler eneptukon, eke hag eke hag fano ane turuk latuson eneg ununuk haharoho umbuhun.

¹¹Hiyap yuwohon famen tuhum weregma ununuk hahabuk fug. It arimanowen ap ahap fanowon ariyen og neneplep peruk ane ari fam Kristus embeseruk hag toho wereg.

¹²Tam Kristus apma welahe angge re ap eke wahuk fug ulug fag toho urusa angge famen urusa ane ino enepeleg atuk lit ininggarehen siyahap taruk.

¹³It arimanowen ap inibam keheg wilip aheg turuk lit nungge-nungge ki ha fug angge enele sibiling-sibiling ane il noruk lit ap winonen turuk ane enebug il laruk lit werehon arimanowen uk fug ane uruk.

¹⁴Wene enepeleg inaben wene holtuk ninap nununuk siyahap tuhup tohon hiyap tuhumon yuwog werehon arimanowen ap hilahupteg unumaliki indag tahupteg inibam fano welamuhuben enehunsi hilawag.

¹⁵Hiyap yuwohon enebe piren hinahan itanowen kebunggalem fanowon embeselug Iblis ele holtusa.

¹⁶Ahun men uhe men hiyap yuwohon misig ambiyeg wereg lit fano let turuk lamuhup. Let turuk lit weregma Allah umalikisiyen suburu emberukon eke let tuk fug angge hiyap we tem toho yuwog werehon suburu emberukon arimano og isaruk lamuhup.

¹⁷Penatua Allah umalikisi fano roho fer enesuhon itano hinindi enesug lit hi eneptuk lamuhup. Uruk lahiyon ari enesengseng toho ap wene hiyag isaruk lit ikma wamburuk ane fahet milal eneptukon fahet uruk lahi.

¹⁸Musa wene fam haharoho emberuk lit, ”Wam sapi misihen roti anggen uyuhen soptukmu anggen polog warukon tot namisi fug ulug ambilik hele fam arom toho pug tuk fug,” ulug haharoho imbibag. Nin eke haharoho emberuk lit, ”Ap ekeyen are yabuk wir utukon fahet onggo og utuk,” ulug haharoho imbibag.

¹⁹Aben penatua fam siyag ane tirikip ulug alem unubam emberuk halug ap pirenen hinahanen ninil fam harukuk uruk halug eneg tem toho puhun.

²⁰Iren siyag ane turuk halug it winonen oho enekol amag ulug ap obog toho enelukeman komo eneptuk laruhun.

²¹Allah men Yesus Kristus men otsi malaikat mumal eneptuson enelukeman iminon tu tem toho holeg lamok: Anden ihi ane roho holtuk lit ap onorohole kim enebuk fug angge inibil am fug angge pulmu unduhuk lit fuma filet fuma filet ambi roho komo enebuhun.

²²Ap eke wene hiyag isaruk laruhun ulug folo-folo hinggik unggulmu embelug unduhuk fuhun fug. Ap winonen siyag ane turuk halug har oho it men mangno aruhun fug. Ari roho turukon ariyen hebeloho hat hubam am nowen holuk toho welamok.

²³Hat hahum wanggo ruruk lit hebe hine eleg toho welahenma ik pikit eneg na fug angge anggur ahaluwe tot ik men mangno rebelug naruk laruhun.

²⁴Ap ekeyen siyag ane turukon unggum kong turuk ahun hiyag um fugmu atam inam aruhu. Ap ekeyen siyag ane turukon fobik eneg onoluk aruhu.

²⁵Ari hag toho aben fano ane turukmu ap obog toho onoluk aruhu. Onoluk aruhu fug halug mondabi hiraho lit welam fug teg.