Read Angguruk Yali 2 TIMOTIUS 1 Bible Online

2 TIMOTIUS 1 - Angguruk Yali bible

2 TIMOTIUS 1

¹Hat Timotius namloho nindi hasug lahiyon ino hubahet an Paulusen suwesingga aru emberuk lahi. Allahn perisi ane hikit toho Yesus Kristus inowen yonggo laruk laruhun ulug an Paulus hiyag nitisi. Nonowe Yesus Kristus men mangno roho werehon mondabi onoluk welamag ulug Allahn sali emberisiyon inowen hiyag isaruk laruhun ulug mon naptisi. Ninikni Allah Nonowe Yesus Kristus menen hat fahet ilaheg ulug Inindi hasug lit hat hindi yuwahap haptuk lamuhup ulug sembahyang uruk lahi.

³Niniknisi unumbusagsi Allah amingmingangge welatfag hag toho an oho Allah apma wereg lit siyag ane nindimu werehon hirahuk fug angge Allah fam Nikni uruk lit sembahyang uruk lahi. Sembahyang uruk lit hat fahet napeleg am fug angge unukohowet hubanggowet Allah wel turuk lahi.

⁴Uba yatikin ane fahet nindimu wenggel haruk lit weregma walenma nahiyeg anggolo roho welale peruk lahi.

⁵Haren Kristus fam wenggel haruk lit hindi wirik toho welahenon ari an noluk. Haren peruk lahenon ari hag toho himbiyanga Lois men hisinga Eunike men atam Kristus fam inindi wenggel haruk latusa hag toho haren oho ketiya tem ulug wenggel haruk lahen peruk lahi.

⁶Anden ninggik hunggulmu emberikik sambil ino Allahn yabuk fano angge hinggikmu emberisi. Fano angge ino seneg lit hasukun fano roho til noruk laruhunen anden holukap haptuk lahi.

⁷Allah hime fanowon og nisarisiyon ino ninindi nenekolap neneptukon fahet og nisarisi fug. Hit hinine roho unduhuk lit hininggareg hunubabut hale fat taruk lit honori hinindi enesug lamuhup ulug hime fanowon og nisarisi.

⁸Nonowe Yesus fahet fag toho hiyag isaruk lit hinggali ha fug angge an ninggik hele waroho penjara kilap naptuson fahet oho hinggali ha fug. Allahn hineyap haptukmu awene fanowon fahet alem siyahon hubam emberuk halug hindi se roho senetuk laruhun.

⁹Ninikni Allah An numalikisi amag ulug nit wol neneptisireg windat neneptisi. Niren fano ane turukukon fahet windat neneptisi fug, we inggareg indiyen tam pibahon hikit toho indi nenesug lit windat neneptisi. Pohol kinang uwan wal tuk fugmu Kristus it fahet war aruhu ulug indi nisaruk ane ak tibibag.

¹⁰Ak tibibahon ino ketiya Yesus Kristus windat nenepfag ahun ino watfagma inam atfag. Wene fanowon ino fam war atuk ane Aren apmayap tibareg mondabi nonoluk welamuhuk ane Aren palimuwap tibag.

¹¹Wene aru hiyag isil laruk lit milal eneptuk laruhun ulug Allahn unduhuk nubaharisireg mon naptisi.

¹²Mon naptisi ulug alem ari fahet sat toho turuk lahiyon aru fahet ninggali haruk lahi fug. Anden Nikni fam nindimu wenggel haruk lahi ane ninggareg noluk. Hat foroho laruhun ulug an ninggikmu emberisiyon ino At inggarehen oho seneg lit weregman eneg Nonowe waruhuwon ari an noluk.

¹³Tem toho uruk awene anden hiyag hitikikon ino hinggik ine roho seneg lit hikit toho turuk laruhun. Yesus Kristus apma welahi ulug hindimu wenggel haruk lit ap hindi enesug laruhun.

¹⁴Allah hime fanowon nit nunubam werehonen let haptuk lit fano-fano angge foroho laruhun ulug Allahn hinggikmu emberisiyon ino fano roho foroho laruhun.

¹⁵O Asia kinang fam werehon obog toho hun Figelus men Hermogenes men itanowen an enembol yig nutusa ane hat holuk.

¹⁶Hun Onesiforus ino likiya hupmu ninggik hele waroho wereg ambeg akol eleg toho pen niya waharuk latisimu an nahiyeg toho welatikik. Nonoweyen at men owe ot men indi enesug lit fer enesug laruhuwen anden sembahyang uruk lahi.

¹⁷At ino o Roma waharisireg an yami nabil laruk lit hiyag naptisi.

¹⁸An Efesus weregma aren anggolo let naptuk latisi ane ari an oho noluk toho welahimu har oho holuk toho welahen. Nonowe waruhu sambil ino Aren indi hahureg ilahehap tuhu ulug sembahyang uruk lahi.