Read Angguruk Yali FILEMON 1 Bible Online

FILEMON 1 - Angguruk Yali bible

FILEMON 1

¹An Paulus Nonowe Yesus Kristus unuk fahet ninggik hele waroho numbaharusama welahiyon ino men nenere Timotius ino menen hit fahet suwesingga tu haharoho emberuk lahe. Filemon nare, yabuk let toho wituk lit niren ninindi hasug laheyon ino men

²nenerek Apfia men, nenere Arkhipus wene fahet ambiyeg til noruk laheyon men Allah umalikisi hit hinibam werehon men hunubahet emberuk lahe.

³Ninikni Allah men Nonowe Yesus Kristus menen hit fahet Inindi henesug lit hit hinindi yuwahap heneptuk lamuhuben sembahyang uruk lahe.

⁴Filemon nare, hat fahet sembahyang uruk lit likiya hupmu Allah fam Nikni uruk lit wel turuk lahi.

⁵Haren Nonowe Yesus fam hindi wenggel haruk lit ap wene holtukon obog toho hindi enesug lahen ane ari holtikik.

⁶Nonowe Yesus fam wenggel haruk lit mangno roho welahe ane ariyen anggen fanowon yihik feruk laruhun ulug anden sembahyang uruk lahi. Yihik feruk laruhunmu niren Kristus ubam fano ane tuk hag teg laheyon ari hindi anggar aruhu.

⁷Filemon nare, haren ap hindi enesug lahen ane fahet an nahiyeg toho wereg lit nine roho turuk lahi. Allah ubam wenggel haruk inap obog toho haren inindi seyap eneptuk lahen.

⁸Kristus unuk fam ari-ari turuk laruhun ulug nele ine roho hiyag hetle angge famen

⁹an nindi hasug lit welahireg nele apma roho heng hapmin peruk lahi. An sabal tegma Yesus wene fahet ninggik hele waroho penjara kilap naptusa.

¹⁰Onesimus ino an penjara weregma namloho atisimu at fahet heng haptuk ane tu emberuk lahi.

¹¹At ino indam hat holohotman asukun siyag teg latisi angge famen ketiya hat fahet oho an fahet oho asukun fano roho turuk.

¹²At ino an nindi hag toho werehen hat hambeg suhuloho monde fik waharuk lahi.

¹³An wene fahet penjara weregma at ino hat hubalma wereg lit let naptuk lamag ulug alele wele angge famen monde fik waharuk lahi.

¹⁴Haren fano peruk elegma an namuwen alele wa fug teg lahi. Fano ane hat hindiyen wenggel haruk lit turuk laruhunen anden nele ine roho ari-ari turuk laruhun ulug hiyag hitmin fug.

¹⁵Allahn perisi ane hikit toho at ino ilamna roho amu welatisireg hat men mondabi welaruhuwen hambeg waruhu.

¹⁶At ino nenere ninindi rohon atisimu hat hamingmingangge hag toho waruhu fug. Atam an men wereg lit an not hag toho welatisi angge ketiya hat men weregma hat hot hag toho welaruhu. Ubabut fahet oho Allah fam indi wenggel haruk ane fahet oho fano peruk laruhun.

¹⁷Haren an fahet Allah fam ninindi misig toho welahe peruk lahen halug an hondoko hibam kilap naplen hag toho at Onesimus oho hondoko kilabuhun.

¹⁸Hun Onesimus inowen haren angge elehap tirisireg paleg angge wereg halug anden ubalmangge og huruhuk.

¹⁹An Paulusen ninggareg ninggik fam tu haharoho emberuk lahi: Anden ubalmangge og huruhuk. Hat hebe abirangge anden angge palehon hag toho welahenma hinggareg holuk tehen hiyag hitmin fug.

²⁰Nare, Nonowe fam wenggel haruk lit let nabuhun ulug heng haptuk lahi. Kristus unuk fam nindi seyap nabuhun.

²¹Haren an nele holuhun ulug nindimu tem toho peruk lit suwesingga aru emberuk lahi. Heng habihiyon ari eneg tuhu peruk lahi fug, nin unon eke sebe roho tuhun ane an noluk.

²²Hiren sembahyang uruk lahep ane ariyen an ninggik hele loloho henembeg waruhuk peruk lahi. Henembeg waruhukmu an nibam hondoko kilapmin puhun.

²³Hun Epafras ino Yesus Kristus awene fahet an men penjara welaheyon inowen nare uruk lit hi haptuk.

²⁴Markus men Aristarkhus men Demas men Lukas men yabuk misihon waruk laheyon arimanowen nare ulug hi haptuk.

²⁵Yesus Kristus inowen indi henesug lit fet henesug laruhu ulug Allah fam sembahyang uruk lahi.