Read Angguruk Yali IBRANI 13 Bible Online

IBRANI 13 - Angguruk Yali bible

IBRANI 13

¹Honori hinindi roho welamuhup!

²Ap pohon umbusuk fug angge hondoko kilap eneptuk lamuhup. Pohon hondoko kilap eneptuk lahe ulug turukmen malaikat hondoko kilap eneptuk latfag.

³Hir oho hininggik hele warehon hag toho welahepma honori ininggik hele waroho werehon fahet hinindi wenggel haruk lamuhup. Hit kinangma tuma fano welahepma ap unubam alem wereg lit inindi anggin toho werehon fahet hinindi wenggel haruk lamuhup.

⁴Aben unuhesi hilarukon fahet hit obog tohowen fano peruk lamok. Ap pabi ane til noruk lit ap unuhesi yarog enebil larukon arimano Allahn unubam unggum umbuhuwen hiren oho ap unuhesi yarog eneptuk lamuhup fug.

⁵Hiren uang amingmingangge welam fug angge hininggikmu werehon fahet eneg nit fahet wereg peruk lamok. Allahn ele uruk lit, ”Anden hat fahet napeleg toho welahi fureg misihim oho humbahakuk fug,” ibag.

⁶Ari ibagma niren te, ”Nikni, Haren an let naptukmu nakol eleg toho wereg lahi. Aben alem nungge ane an nubam tuk teg?” ari uruk lit ninindi wirik toho wereg lahe.

⁷Allah wene atam hiyag hisaruk lit milal heneptuk latuson arimano fahet honoluk toho welamok. Iren yabuk turuk lit obog arik ohoma turuk latuson fahet hinindi honoluk toho welamok. Allah fam inindi wenggel haruk lit hit fahet honoluk amag ulug wirimangge turuk latusa.

⁸Sono oho yoho oho Yesus Kristus ino nin am fug angge hundig-hundig mondabi ambi reg lit welaruhu.

⁹Hit sehelimuwen eke hag eke hag alem unon hiyag hisaruk lit hinindi ninap henebuhup tohon holuhup fug. Allahn indi henesug ane ariyen hinindi wirik atuk halug ari fano, naruk angge eke hag eke hag werehon fahet usa ulug alem emberukon ariyen ap fano am fug tehen enele holuhup fug.

¹⁰Helep sengget wareg ambehen niren tohon ino fam o saboma hubu lahaptuk inap arimanowen na fug teg.

¹¹Allah fahet hubu lahabul ulug wam ware felug senggeltukmu mep wilip atukon arimano imam onowe suwon inowen aben siyag ane turukon eleg amag ulug mep arimano hinanggoho walug o fanowon fam kuruk. Kurukmu wam ebe walug o wirig ambeg embeselug selma palohoma lalug yale feruk.

¹²Ari hag toho Yesus inowen An numalikisi ninggareg namep fam fanowap enepmin ulug elehet sok ino ambol fil palohoma asengseng toho war atfag.

¹³War atfagma nir oho elehet sok ino ambol fil lulmu At inggaliyap tibag hag toho nir oho nininggaliyap nenebukag ulug lul.

¹⁴Nit tuma yug toho welamuhuk ambeg ninibam elehen o pumbuk keron fobik waruhuwon fahet yami ruruk lahe.

¹⁵Ari fahet Yesus unuk uruk lit nenembilik fam fag toho Allah wel turuk lit Ninikni ulug At apma umbuk tohon emberuk lamuhuk.

¹⁶Fano ane ap unubam turuk lit ap ler eneptuk lamuhubon ari famen enebe An nubahet embehesa ulug Allahn fano peruken hiren henepeleg am fug.

¹⁷Hit fet henesug lit milal heneptuk inap arimano enele holtuk lit onombolim laruk lamuhup. Allahn it arimano nangginoho wereg ulug kapal isahumu hiyag umuhup inap wereg lit hit hinindi selehap hisaruk lit fet henesug lit wereg. Ari roho turuk lahepma fet henesug inap arimano sat ha fug angge inindimu enehiyeg toho let heneptuk lamuhup. Hiren enesukun siyahap eneplepma alem angginon hit hunubam alep.

¹⁸Likiya hupmu nit fahet sembahyang uruk lamuhup. Alem eke hag eke hag nunubam atukmu fano ane eneg turuk lamuhuk ulug yami ruruk lamuhuken nit ninindimu siyahon het toho foroho lahe fug peruk lahe.

¹⁹An hit henembeg folo-folo wam hag teg laruhuken ihi ane ari turuk lamuhup ulug komo heneptuk lahi.

²⁰Allah ap mangnowap eneptuk ahun inowen ele sali pisan tuk fug tohon imbibahon ino hikit toho Yesus amep wilip atfagma wam domba Inikni suwon amag ulug Nonowe Yesus ino ap war atukon wereg ambehen olukap tibag.

²¹Allahn peruk ane turuk lamuhup ulug mun angge man angge fanowon At inowen tug toho og hisaruk laruhu. Yesus Kristus fam wenggel haruk lit Allahn fano ane eneg telep peruk ane niren turuk lamuhuken nenesukun fanowap neneptuk laruhu. Yesus Kristus palimu werehon ino wel turukmen eneg welamuhup. Amin.

²²Nori, anden suwesingga il horog angge tu hit fahet emberuk lahi angge famen komo heneptuk lahi ane aru hinindimu henehiyeg toho holtuk lamok.

²³Nenere Timotius hele waroho kilaptusa ambehen wili feserusa angge re at an nambeg folo-folo waharuk halug an men ambiyeg hit pen hisa wamuhuken honoluk toho welamok.

²⁴Hit honowesi fet henesug inap men Allah umalikisi inindi fanowon men unubahet anden hi eneptuk lahi ane hiyag osomok. Nit nonori Italia werehonen hi heneptuk.

²⁵Allah ap indi enesuhon ino hit obog toho let heneptuk lit welaruhu.