Read Angguruk Yali IBRANI 4 Bible Online

IBRANI 4 - Angguruk Yali bible

IBRANI 4

¹Kel tahup ambeg kolo regma kuhup ulug Allahn sali ibahon uwan teko la fugmu ap eke hit men welahebon enembol fil atisi puhup tohon honoluk toho welamek.

²It indam welatfahon wene fanowon hiyag isibag hag toho nir oho hiyag nisarusa. It arimanowen wene hiyag isarukmu hol hibag angge famen inindimu anggar atfag fugmu saplangge hiyag isibag.

³Nit ninindi anggat teg lit wenggel haruk laheyon arimano Allahn kel tahup ulug hiyako imbibag ambeg Aren ibag ane hikit toho kuhuk: ”An nolok ane it unubam tuhuk ulug hiyag isaruk lit, ’Hit kel tahup ulug Anden hiyako imbiyag ambeg ino kuhup fug,’ ulug irikik.” Pohol kinang wal tibag sambil ino Aren yabuk timin pibahon fam obog toho tibibag angge famen kuhup fug ulug hiyag isibag.

⁴O sabit fahet misihim wene hiyag isaruk lit, ”Allahn mun angge man angge wal tibareg o sabir angge kel tibag,” ulug haharoho imbibag.

⁵Ari imbibag angge famen nin haharoho emberuk lit, ”Hit kel tahup ulug anden hiyako emberikik ambeg ino kuhup fug,” ulug suwesingga fam haharoho imbibag ane niren kim haruk lahe.

⁶Ap winon Allahn kel tahup ulug hiyako imbibag ambeg kuhupmu ap winon atam wene fanowon hiyag isibag angge famen holfag fug ane ariyen it arimano kibag fug ulug hahareg ane seleg teg.

⁷It arimano holfag fug ane ari fahet Allahn o yoho tu welahe ulug ele sali eke imbibag. Tot amusun toho welatfareg palimu eheyon hag toho Daud feneyen hiyag isaruk lit, ”Yoho At ele hol halihip halug hinindi wenggel ha fug angge sohu roho welam fug,” ibag.

⁸Allahn kel tahup ulug hiyako imbibag ambeg ino Yosuan Israel inap hondog eneplug kelepma Allahn fobik oho o eke sambil ulug sali embelep fug.

⁹O eke sambil ulug sali imbibagma o sabit sambil ino Allah umalikisi kel tahup ulug sali imbibahon wereg.

¹⁰Ap sa Allahn hiyako imbibag ambeg ino kuruk ahun ino Allahn mun ane man ane tibibareg kel tibag hag toho at ino oho mun ane man ane turukon embeselug kel taruk laruhu.

¹¹It arimano Allah ele holfag fureg siyag atfag hag toho nir oho siyag ahe ha nowen Allahn kel tahup ulug hiyako imbibagma kuhuk ambeg ino fahet yami ruruk lamuhuk.

¹²Allah wene ino ine roho wereg lit oluk eneg welaruhu. Karog olokon fuma-fuma ayeg werehon min ambi reg eleg. Yukuk toho ware feserukmu mondabi undama kuruk lit ubabut men indi men minggituk lit uwag lilibug toho abuhe amu larikim ninindimu wenggeltuk lit peruk ane aren inamap turuk.

¹³Wal tibag ahun niren hebeloho hiyag umuhuk ahun ino olohotma mun angge man angge sum wan tuk fug angge it enebiye wereg lit misig oho mapmu roho wereg eleg.

¹⁴Allah amloho Yesus ino pohol keyen tulug watfareg imam onowe suwon atfareg nit Nonowe atfagma At fahet fag toho uruk lit ninindimu wenggel haruk laheyon ari fam seneg lit welamuhuk.

¹⁵Imam onowe suwon inowen nit ninine eleg toho weregma Ar oho nit hag ine eleg toho welatfag. Ap suwon ine roho werehon hag toho welatmin puk fug angge nit men ambi roho welatfag. Siyahonen nit wal nisaruk lit Ar oho ambi roho wal haruk latfag angge famen siyag ane At ubam welatfag fug.

¹⁶Nit nenembong se roho indi nenesuhon ino hur atuk ambeg horogma lulen maniyek. Allah ubabut fanowon inowen indi nenesug lit nit siyag toho wereg li let neneptuk laruhuwen maniyek.