Read Angguruk Yali IBRANI 5 Bible Online

IBRANI 5 - Angguruk Yali bible

IBRANI 5

¹Ap kinangmonen imam suwon eke welaruhu ulug unduhuk feruk halug ap men Allah men honggolegma wereg. Aben siyag ane turukon eleg atnisi ulug Allah fahet hubu lahaptuk.

²At ino ap kinangmon inggareg ine eleg toho wereg lit ap enepeleg toho werehon men un ke larukon men fahet indi wenggel haruk.

³Ap kinangmonen siyag ane turukon fahet at inowen hubu lahaptuk halug ori winon fahet eneg lahapmin peruk lam fug angge inggareg fahet eke hubu lahaptuk.

⁴An imam suwon welaruhuk ulug inggarehen amu in am fug tehen Allahn hun Harun wol tibareg unduhuk fibag hag toho at ino oho Allahn wol tulug unduhuk feruk.

⁵Ari hag toho Kristus ino oho inggarehen imam suwon aruhuk ulug in atfag fug. Allahn At unduhuk fibareg hiyag utuk lit, ”Anden yoho Hat An namloho ulug indag haptuk lahi,”

⁶ulug hiyag utuk lit wene eke haharoho imbibahon fam, ”Hun Melkisedek inowen alem haloho imbibahon hikit toho Hat imam suwon weregman eneg welaruhun,” ibag.

⁷At ino ap kinangmon hag toho wereg lit indimu siyahen uba yatuk lit war atuk ambeg welahiyon Haren let nabuk teg lahen ulug ele hi roho Allah ubam sembahyang ibag. Sembahyang urukmu Allahn hol hibareg indi seyap tibag.

⁸At Allah amloho welatfag angge famen alem angginon ubam atfagma Nikniyen fano nubam emberisi ulug indi wenggel haruk latfag.

⁹Allahn At fanowap turuk lit palimu imbibagma ap obog toho At ele holtukon fahet mondabi fano atuk ane alem at ngi atfag.

¹⁰Hun Melkisedek alem haloho imbibahon hikit toho At ino imam suwon welaruhu ulug wol tibareg unduhuk fibag.

¹¹Ari fahet alem anggolo werehon hiyag hisila angge famen hinisanggo lareg lit holehep ha fug tehen seleg toho hiyag hisa fug teg lahe.

¹²Indam amusun toho hiyag hisarukmu honoluk alepma hahen milal eneptuk inap hag toho welalep angge famen henepeleg tehen Allah wene alem eneg milal heneptuk lahe. Suburu ineyon henemu wirik toho na fug teg lit ag eneg naruk lahep.

¹³Ap san ag eneg naruk laruhuk peruk halug ele tem toho uruk ane apelehen malik toron hag toho wereg.

¹⁴Suburu ineyon ap suwonen eneg na reg. It arimano inindi anggat teg lit siyahon tu, fanowon tu puk teg lit wereg.