Read Angguruk Yali IBRANI 6 Bible Online

IBRANI 6 - Angguruk Yali bible

IBRANI 6

¹Nori, ari ulug atam Kristus fahet tor angge milal heneptuson ari embeselug ketiya Kristus fahet palimu werehon anggolo milal taruk ane yami ruruk lamuhuk. Atam hiyag hisaruk latuson honoluk atisimu nin eke sebe roho hiyag husul fug: Siyag ane embeseruk lit Allah fam tem toho wenggel haruk ane men

²ikma pilap eneptuk lit ininggik ununggulmu emberuk ane men ap war atukon onolukap eneptuk lit minggir enebuhu ane fahet alem ari nin sebe roho hiyag husul fug.

³Allahn let heneptuk lit tilihip uruk halug alem eheyon ari tehe ha reg lahe.

⁴Alem misig iminon tu teko lahu ane fahet uruk puk fug. Ap unundama seleg toho wereg lit poholma angge og isaruson nek harusama Allah hime fanowon unubam wereg lit

⁵wene fanowon nek haruk lit Allahn pohol men kinang men ket aruhu sambil fano ane og isahuwon yet harusa inap arimanowen

⁶enembol yig isaruk halug it arimano nin sebe roho ke hareyon embeselug inindi ket am fug teg. It ap arimanowen Allah amloho ino ininggarehen e fam tele feruk lit ap anggolo enelukema inggaliyap turuk.

⁷Osit poholman wambik waharukon ino kinangen naruk halug mun angge man angge kinangma werehon fano wilip atuk. Allahn kinang seiyap turukmu aben yabuk witug yag tarukon naruk angge fanowon arimano wilip atuk.

⁸Kinang ino fam molip men hinde-hinde men wilip atuk halug naruk eleg angge wilip atuk angginang siyag ulug pet turuk lit kinang ino harep pisaho fesuhu.

⁹Nori, ninindi henesug laheyon itanowen ari roho hiyag hisaruk lahe angge famen hit fahet wenggel haruk lit hiren ngi roho foroho lahebon ari fam fano amuhup peruk lahe.

¹⁰Allahn pikit toho kong turuk ane umbusuk fug teg. Hiren lisag toho Allah umalikisi winon ler eneptuk lit At unuk fahet hinindi haruk latikip. Indam oho turuk latikipteg ketiya oho turuk lahep ane ari Allahn oho apeleg am fug teg.

¹¹Fobik fano aruhu ane ngi amuhuben hit wal tanehen henesukun fano roho yami ruruk lamuhupmu fobik aruhu ane teko lahu. Ari hag toho welamuhubon fahet eneg niren fano peruk lahe.

¹²Noho hinilen henebe wiyig toho welam fug angge it inindimu wenggel haruk lit inindi imbik wamburuk latuson arimano fahet Allahn fobik onggo og hisahuk ulug sali emberisiyon ino hir oho ngi amuhuben it onombolim laruk lamuhup.

¹³Allahn Abraham fam ele sali emberuk lit, ”An nim ambi roho werehon elehen ninggareg nunuk fam tik-tem toho sali emberuk lahi,”

¹⁴ulug ele hiyag utuk lit, ”Hat famen ap anggolo amuhupmu mun angge man angge sebe roho og hutuk laruhuken hi haptuk lit tem toho uruk lahi,” ibag.

¹⁵Abraham inowen indi imbik wamburuk lit sali ino fahet yet teg latfagma hiyag itfahon hikit toho og itfag.

¹⁶Ap kinangmonen sali emberuk lit onowesi suwon ununuk uruk lit tik-tem toho ihi ulug sali emberuk. Ari roho teko lahu ulug sali emberuk lit umung-umung atuk ane enele atog kong turuk lahe peruk.

¹⁷Og hisahukon hit ngi amuhup ulug Allahn hiyag isibag inap arimanowen tem toho ehek pukag ulug Allahn sali imbibag.

¹⁸Allahn nele si ihi ha fug teg ulug alem piren pisan isa fug tohon imbibag. Fobik fanowap nenebuhuwon nonolohotma werehon ine roho seneg lit niren yami ruruk lamuhukon fahet tem toho pukag ulug alem piren itano imbibag.

¹⁹Fobik fanowap nenebuhu ane ino wanggun ineyon hag toho tomuk toho laruk lahema ninindi yuwahap neneptuk. Wanggun ineyon ino tomuk toho larukmu Allah ibam sok latuk asum alukema nunumbahaku.

²⁰Nonowe Yesus ino nit fahet kebunggalem hiyag nisaruk lit sok latuk asum ino fam kibag. At ino kibareg werehon ari fam hun Melkisedek alem haloho imbibahon hikit toho At imam suwon atfareg weregman eneg mondabi welaruhu.