Read Angguruk Yali IBRANI 7 Bible Online

IBRANI 7 - Angguruk Yali bible

IBRANI 7

¹Hun Melkisedek ino o Salem inap onowe suwon wereg lit Allah palimuwon amingmingangge imam welatfag. Misihim sambil Abraham ino ap suwon men tog aptuk lit apmayap enepfareg ibam suhuloho waharukmu Melkisedek ino olohotma libareg Allah unuk fam hi ribag.

²Hi ribagma Abrahamen aren angge obog toho palu numen tebelug palu numon og itfag. Hun unuk Melkisedek suwaleg latfahon ino niren hebeloho uruk lit halug atamon ”Nonowe pikir ane turukon” suwalegma fobikon ”Salem inap onowe tog pilapni” suwaleg latfag.

³At ino ikni isinga eleg angge umbusagsi eleg angge indag atukon men war atukon eleg angge Allah amloho men ambi roho werehen at ino imam mondabi welaruhu ulug unduhuk fibag.

⁴At suwon weregma nunumba Abraham inowen seliyon apmayap eneptuk lit huhulangge wibahon arimano minggiroho og itfahon ino yet hemek.

⁵Hun Lewiyen ondohowon arimano fam hit imam wereg lit Allah let turuk lamuhup ulug in enepfag. In enepfahon arimanowen oho onori Israel inap hiyag isaruk lit hininggikmu atukon palu numen tebelug palu numon Allah fahet emberuk lamuhup ulug unubam imbibag. Onotsi Israel inap arimano Abrahamen ondohowon wereg angge famen Musa wene fam imbibahon hikit toho emberuk lamuhup ulug heng eneptuk latfag.

⁶Hun Melkisedek ino it ununggul unukon fug angge famen Abraham fam minggiroho embemihin ulug heng tibag. Abraham ino fam Allahn sali imbibag angge famen hun Melkisedek inowen Allah unuk fam hi ribag.

⁷Palimu werehonen apma werehon fanowap turuk lit hi ruruk ane ari seleg teg lit wereg.

⁸Fuma fil Lewi inap it kinangmon war atukon arimanowen minggiroho emberuk lamuhup ulug heng enepfag, fuma fil Melkisedek at ino fahet oluk wereg ulug haharoho imbibahon inowen embemihin ulug heng tibag.

⁹Abraham fam minggiroho embemihin ulug heng tibag ane hikit toho aren ondohowon Lewi inap oho at apma kukag ulug heng enepfag. Ari roho Lewi inaben eneg minggiroho embelihip ulug heng enebuk teg angge famen it unubam heng enepfag.

¹⁰Lewi uwan indag am fugmu Melkisedek ino Lewi umba salkal ulteg ambi amul ulug olohotma libag.

¹¹Lewi inap imam amag ulug in enepfahon ariyen ap fano alepma imam winon Melkisedek alem haloho imbibahon hikit toho unduhuk felep? — Lewi inap arimano imam weregma Musa wene ino Israel inap unubam imbibag angge famen fano atfag fug. — Imam winon ino unduhuk feruk lit nungge ulug hun Harunen alem imbibahon hikit toho in haptuk lahe ibag fug?

¹²Imam inap lahaptuk ane nina feseruk halug Musa wene fam haharoho imbibag ane ino oho nin aruhu.

¹³At ino fahet nit tuma nenele uruk laheyon ino unuk amu ahun famen wereg, indam oho At unggul unukonen hubu lahaptuk latfag fug.

¹⁴Nit Nonowe ino Yehuda inap ununggul unukon famen ondoko larisi. Ununggul unuk Yehuda famon Musan te imam welamuhup ulug misihim oho haharoho imbibag fug ane ari ap obog toho onoluk.

¹⁵Imam winon Lewi ahun fuhon hun Melkisedek inowen alem haloho imbibahon hikit toho unduhuk fibag ane ariyen ihi ane aru seleg aruhu.

¹⁶At imam unduhuk fibahon ino ap kinangmonen alem haloho emberukon fam unduhuk fibag fug, we alem mondabi oluk welaruhuwon ino hikit toho unduhuk fibag.

¹⁷At ino fahet haharoho imbibahon tu, ”Hun Melkisedek inowen alem haloho imbibahon hikit toho Hat imam suwon weregman eneg welaruhun,” ibag.

¹⁸Ap kinangmonen komo eneptukon alem aru welaruhu ulug haloho emberuk angge famen ine elehen umbusuhup.

¹⁹Musa wene inowen ap fanowap enebuk fug teg. Ap fanowap enebuk fug tehen ketiya alem fanowon mondabi Allah men mangno amuhukteg fano welamuhukon ino inam atfag.

²⁰Alem ihiyon tu Allahn tik-tem toho ihi ulug sali embelep fugmu teko lelep fug angge famen sali imbibahon fam teko libag. Lewi inap arimano Allahn sali umbuk fug angge in enepfag angge famen

²¹At ino ubam sali emberuk lit unduhuk fibag. Ubam ele ibareg sali emberuk lit, ”Hat imam onowe welaruhun ulug unduhuk hubahakiyon aru weregman eneg mondabi welaruhun ulug Allahn sali emberukon ino nungge fahet sali nambiken emberikik puhu fug,” ibag.

²²Allahn ele sali ine roho imbibahon ino pisan tuhuk fug ulug Yesus enehangge hag toho unduhuk fibag.

²³Imam inap arimano war atukmu nin unubalmangge lahap enebil larukmu nin anggolo atuk latfag.

²⁴Anggolo atuk latfag angge famen At ino mondabi weregman eneg ap winon eke imam At ubalmangge am fug teg.

²⁵Ap obog toho Aren ler eneptukmu Allah ambeg waharukon arimano Aren mondabi fanowap enebuk teg. At ino mondabi oluk wereg lit Allah alukeman it arimano inibil atuk.

²⁶Imam onowe suwon ubabut ari hag toho werehon fahet niren fano peruk lahe, ubabut fano reg lit siyag ane turuk elehon, sing angge ubam tag teg lam fug angge siyag ane turuk inap men mangno roho welam fug angge pohol palimu werehon ino fahet fano peruk lahe.

²⁷Imam onowesi suwon welahe perukon arimano men wirim teg eleg. It arimanowen likiya hupmu ininggarehen siyag ane turukon fahet tam hubu lahaplug unumalikisiyen turukon fahet fobik hubu lahaptuk. At inowen inggareg ebe Allah fahet emberuk lit we misihim hubu lahapfahon ari ap obog toho fahet misihim hubu lahapfag.

²⁸Musa wene fam werehon hikit toho ap inine elehon arimano imam inap amuhup ulug in eneptuk. Musa awene weregma Allahn sali imbibahon ino hikit toho mondabi fano aruhu ulug amloho Kristus ino palimu unduhuk fibag.