Read Angguruk Yali IBRANI 9 Bible Online

IBRANI 9 - Angguruk Yali bible

IBRANI 9

¹Sali atamon emberuk lit sembahyang uruk ane fahet, o sembahyang uruk ibam ap ininggik fam witukon fahet alem haloho imbibag.

²O sabo fanowon ino hili ambol fil witfahon ino fam iral hunduko emberuk angge men suburu usa inap narukon fahet emberuk ambeg e pila tuwaloho wirig latfag. Hili ambol fil werehon unuk te ”Fanoma” suwaleg latfag.

³Sok pirenon latuk asum aluke fil hili misig wirig latfahon unuk te ”Usama” suwaleg latfag.

⁴Hili ino fam indok munggaltuk angge ili rurukon men Allahn sali ibahon haharoho werehon kilaptuk angge peti ino ili ruruk angge fam hililip toho wiroho foroho latfag. Peti ino undama suburu ”Mana” kubag ili rurukon fam pilabehon men hun Harun uwanggun tomuk asimit wilibihon men helep Wene Numen hahatfahon itano men wereg latfag.

⁵Peti emberimu malaikat piren umbagpag turukon Allah tuma wereg pukag ulug enehangge imbibag. Malaikat ununuk kerub itano eneherabulen Allahn siyag ane turukon elehap turuk ambeg fanoma ino hondo reg latfag. Alem ari fahet niren ketiya tuma tintiloho ul fug.

⁶Fanoma men Usama men ari roho welamag ulug alem haloho imbibag. Imam inap arimanowen Allah fahet turuk ane tul ulug likiya hupmu hili ambol filon ino fam eneg kuruk latfag.

⁷Hili eke alukemon fam ino we imam onowe suwon amu eneg mo ilig am wirig am turukmu misig fam we misihim sambil eneg kuruk latfag. Allah fahet esetuk ambohom amep ino fam inggareg fahet eke, otsiyen siyag ane hirahoman turuk latuson fahet eke inggik fam seneko eneg kuk teg latfag.

⁸Ari turuk latfahon fahet Allah hime fanowon inowen hiyag nisaruk lit, ”O hili ambol filon weregma o usama ino kurukon fahet uwan sok husig eleg,” ulug selehap nisaruk.

⁹Ari nit ketiya welaheyon fahet wirimangge wereg. Ari hag toho aben Allah fahet wam esetuk lit hubu lahaptuk angge famen it inindimu siyag angge werehon let toho fanowap enebuk fug teg.

¹⁰Suburu ik naruk angge fahet na fug urukon men enebe mun angge man angge umako werehon men obog toho alem haloho imbibahon arimano kinangmonen turuk ane fahet haloho imbibag. Allahn mun angge man angge alem kerap tirisi angge re alem tam haloho imbibahon ari eleg atisi.

¹¹Kristus watfahon ino fobik fano-fano angge inam aruhuwon fahet imam suwon aruhuk ulug watfag. O sabo suwon mondabi fanowon ap ininggiken witfag fuhon ino fam kibareg watfag. Ihi ane ari mun angge man angge wal tibag angge tuma werehon fam wirig eleg.

¹²At ino hili usama ino kuruk lit wam domba men sapi men enemep wibareg kibag fug, we inggareg amu amep wibareg nit hundig-hundig fano roho welamuhubon ino fahet misihim kibareg siyahon inggikmuwen mondabi fano welamuhup ulug windar nenepfag.

¹³Wam domba men sapi men yuhambukon enemep hinanggoho ap siyag ane turukon fanowap enebul ulug ketne isaruk lit sapi indok yaltukmu ul atukon ino enebene hilil isarukmu enehap sel ke eneg puhun atuk latfag.

¹⁴Wam amep fam fano amul ulug turuk latfag angge famen Kristus amep men ambi reg eleg. At ino hime fanowon mondabi werehon ubam weregma nebe fanowon eneg Allah fahet embemin ulug imbibag. Niren siyag-siyag ane turuk lit saplangge turuk ane At amep inowen elehap turuk lit ninindi anggen pulmuwon ho roho fanowap nenebuhu fug ano? Fanowap nenebuhumu Allah mondabi oluk werehon amingmingangge welamuhuk.

¹⁵Allah ele sali keron ino imbibagma ap wol eneptukon arimano fanowon og isahuk ibahon ngi roho welamag ulug Kristus pulmu wereg lit ler eneptuk. Allahn ele sali atamon imbibahon pisan isaruk latfahon arimano fanowap enebuhuk ulug At ino war atfag.

¹⁶Aben lin isaruk angge fahet hulul ulug enele sahaltuk ambeg ino ap anggengge lin isalug war atukon wereg.

¹⁷Ap ekeyen nanggengge ap winon amag ulug suwesingga haharoho embelug war atuk halug eneg ap oluk werehonen anggengge hila reg, ebe oluk weregma aren angge hila fug teg.

¹⁸Ari hag toho Allahn ele sali atamon imbibahon ino mep wamburukon fam eneg teko la reg.

¹⁹Musa inowen Allahn alem obog toho ari komo heneptuk ulug ap obog toho hiyag isibareg wam sapi men domba yuhambukon enemep men ik men mangno roho wibareg domba oruk huluwon men musan inggila men wibareg suwesingga ino fene oho ap obog toho enebene oho mep ino ketne enebil laruk latfag.

²⁰Ketne enebil laruk lit, ”Allahn ele sali hit hunubam emberukon mep aru fam wereg,” uruk lit

²¹o sabo ino men mun angge man angge undama werehon sembahyang fahet foroho latfahon arimano obog toho fene ketne enebil laruk latfag.

²²Musa wene fam alem haloho imbibahon hikit toho mun angge man angge mep fam eneg fanowap turuk. Ap unubam mep hililtuk elehon iren siyag ane turukon eleg am fug angge wereg.

²³Mun angge man angge alem poholma weregma wirimangge kinangma werehon arimano mep fam eneg fanowap eneptuk latfag. Alem poholma wereg angge arimano fano amag peruk halug hubu lahaptuk angge mondabi palimu werehon ari fam eneg fano atuk.

²⁴Kristus ino o sabo fanowon ino fam kuruk lit o ebe poholma weregma wirimangge ap ininggiken witfahon ino kibag fug, nit ninibil atuk lit Allah alukema lamin ulug poholma pikit kibag.

²⁵Mo ilig am wirig am turukon fam hundig-hundig imam suwon o sabo fanowon ino fam kuruk lit inggareg amep walug kuk fug angge amu angge amep eneg walug kuruk latfag. Ari hag toho Kristus ino ninggareg nebe embemin ulug kuruk lit iren hundig-hundig kuruk latfag hag toho kibag fug.

²⁶At ino ari hag toho kelepma hahen pohol kinang wal tibag sambil ino ak tebelepteg aben Kristus ino witil-watil laruk lalep. Ari telep angge famen ketiya obog aruhu li welahe ulug we misihim eneg inam atfag. Ninggareg nebe embeminon ari fam aben siyag ane turukon elehap timin ulug watfag.

²⁷Ap kinangmon we misihim war amuhupmu Allahn alem unubam werehon wirim toho kong tuhu.

²⁸Ari hag toho Kristus ino ap kinangmon anggolowen siyag ane turukon Anden ha ruhuk ulug inggareg ebe emberuk lit misihim war atfag. Fobik inggik pireneg angge waruhu sambil ino siyag ane turukon nin eke ha rimin puk fug angge ap An yet nasug lit werehon mondabi fanowon ino it og isamin ulug waruhu.