Read Angguruk Yali YAKOBUS 4 Bible Online

YAKOBUS 4 - Angguruk Yali bible

YAKOBUS 4

¹Hit sehelimu wereg ane yik aptuk ane men honori men hili roho wereg ane men alem keman inam atuk? Hinindimuwen tila peruk ane eke sambil su roho wenggel haruk, eke sambil tot toho wenggel haruk lahep ane ariyen honolok ane inam atuk.

²Mun angge man angge og neselep peruk lahep angge famen og hisaruk eleg halug ap pinggi unusuk teg lahep. Nonoriyen tohon hilila peruk lahep angge famen hininggikmu atuk eleg halug yik aptuk lit honori men hili roho welahep. Sembahyang uruk lahep fug ane ariyen nungge-nungge hininggikmu atuk eleg.

³Hiren sembahyang ket-ker ane uruk lahepma heng uruk lahep angge arimano hininggikmu am fug teg. Hiren heng uruk lahebon ari hininggareg henehum fahet eneg heng uruk lahep.

⁴Nori, hiren hunuhe subon henembol yig utuk hinap! Kinangmon fahet hinindi reg lahep halug Allah men seli roho welahep ane hit henepeleg? Ap san kinangma wereg angge fahet ahiyeg haruk halug at inowen Allah men seliyap turuk.

⁵Suwesingga tamon fam haharoho imbibahon tu alem elegma haharoho imbibag puk fug, ”Allahn wal tibag sambilen sat kilap enepfahon arimano An horogma welalep peruk.”

⁶Ari reg angge famen Allahn indi nisaruk lit og nisaruk ane mondabi palimu wereg. Alem ari fahet haharoho imbibag ane tu, ”Hemet turuk inap Allahn nirim peruk lit unubam lombuk toho wereg inap indi isaruk.”

⁷Allah alukema hur atuk lit Iblis henembol yig umuhupmu aren hit hunumbahalug longgo uhu.

⁸Hit Allah horogma amuhupmu Ar oho hit horogma aruhu. Hit siyag ane turuk hinap hininggik ik umatuk lamuhup. Hinindi piren teg hinap, hinindi misig toho welamuhup.

⁹Hinilaheg toho welahep ane fahet hinindi anggar amag, henehummu siyag toho wereg lit uba yatuk lamek. Hiren inda yatuk lahebon ubalmangge uba yatuk lamuhup. Hit henehiyeg toho welahebon ubalma henehummu siyag aruhu.

¹⁰Nonowe alukeman hininggareg apmayap taruk lamuhupmu Aren hit palimuwap henebuhu.

¹¹Nori, hiren hininggareg honori fahet henele si unubam uruk lamuhup fug. Ap san ori fahet ele si uruk lit enebug uruk ahun inowen Allahn komo nenepfag ane abug uruk lit apmayap turuk. Allahn komo nenepfag ane apmayap turuk ahun inowen komo nenepfag ane hikit toho tuk fug angge ap unubam alem werehon kong turuk ahun hag toho wereg.

¹²Komo neneptuk ane men alem kong turuk ane men imbibag ahun we misig wereg. At inowen eneg ap winon fanowap eneptuk lit winon siyahap enebuk teg. Ari reg angge famen hare ubam alem werehon kong timin peruk lahenon hat ap sa hag toho welahen?

¹³Nori, hiren henele uruk lit, ”Yoho ano sono ano o pumbuk suwon umu fil ano ahamu fil ano lahukteg onggo paloho ayeg waroho hilaruk lit weregman mo lahakureg wambuhu,” uruk lahep.

¹⁴Ari uruk lahep angge famen sono teko lahu ane fahet hit henepeleg. Hit honoluk welahep ane nangginoho welahep? Honoluk welahep ane ari seni ahe aben yet harukmu misihim eleg atuk hag toho welahep.

¹⁵Hiren uruk lalep ane tu, ”Nonoweyen fano puhu halug nit nonoluk wereg lit tu tuhuk, ari tuhuk,” peruk lalep.

¹⁶Ari reg angge famen hininggareg henewelwel tubat taruk lit henele hemet toho uruk lahep. Hiren turuk lahep ane ari obog toho siyag ane turuk lahep.

¹⁷Ap misihen fano ane tuk teg ane oluk angge famen turuk eleg halug at inowen siyag ane turuk.