Read Angguruk Yali 1 PETRUS 4 Bible Online

1 PETRUS 4 - Angguruk Yali bible

1 PETRUS 4

¹Kristus ino ebe ap kinangmon hag toho weregma watfag. Hiren oho Aren nuwabukag pibag hag toho nunusukag peruk lamuhup. Ap ekeyen Yesusen pibag hag toho perukmu wabuhup halug aren siyag ane turukon eleg aruhu.

²Nit nonoluk welamuhuk li ap kinangmonen tu hilila ari hilila peruk hag toho peruk lamuhup fug, Allahn peruk ane eneg turuk lamuhup.

³Tam amusun toho welatikip li Allah wene enepeleg inaben peruk ane eneg turuk latikip. Turuk latikip ane iminon tu: Pabi ane eneg wenggel haruk lit tu helele ari helele peruk lit ik olokon nalug nenek turuk lit henebuwap toho suburu men ik men naruk lit usane aben tuk fug teg ane turuk lit henemben siyag toho welatikip.

⁴It enemben siyag toho werehen it men mangno roho welahep fugmu nungge fahet nit men ambiyeg welahe fug ulug enekol haruk lit hit henebug uruk lit wereg.

⁵Weregma ap olukon warehon fahet unggum kong timin ulug yer enesug lit werehon inowen hinog-og isahumu iren nungge uhup.

⁶Ari fahet Allah wene fanowon ino ap war atfahon arimano oho hiyag isibag. Hiyag isibahon ariyen it kinangma wereg lit turuk latfag ane fahet unggum kong tibag angge famen Allah hime fanowon fam Allah men sebe roho welam teg.

⁷Mun angge man angge eleg aruhu sambil ketiya horog toho welahe. Hininggareg fahet hinindi yuwag toho wenggel haruk lit sembahyang uruk lamuhup.

⁸Atamon uruk lahiyon aru re: We tem toho honori hinindi enesug lit welamuhubon ariyen siyag ane turuk latikibon apmayap tuhu.

⁹Honori henembeg waharuk halug hinindimu siyag toho wenggel ha fug angge hinibam hondoko kilap enebuhupteg nohoruk ambeg fanoma hiyag isaruk lamuhup.

¹⁰Hiren fano roho foroho lit welamuhup ulug Allah indiyen wal taneg og hisarisiyon ino hikit toho hit-hit honori men let-ler atuk lamuhup.

¹¹Allahn ap misig fam hele uruk laruhun ulug unduhuk ferisiyon inowen Allah ele pikit toho hiyag isaruk laruhu. Allahn ap misig fam ler eneptuk laruhun ulug unduhuk ferisiyon inowen Allahn at ineyap tirisiyon hikit toho ap ler eneptuk laruhu. Ari roho ler eneptuk lit inggareg wel ta fug angge Yesus Kristus unuk fam Allah eneg wel turuk laruhu. At misig eneg mondabi ine roho wereg lit pohol ha kinang ha ki haruk lit wereg. Amin.

¹²Nori, anden nindi henesug lahiyon hunubam tot hiyag hisamin. Indok ambulpul olokonen wal hisik oho hunubam atukon ari fahet hinindi anggin toho henekol haruk lit welam fug. Nik angge nunubam aha puk fug angge

¹³Kristus ubam atfag angge ino nunubam aha ulug henehiyeg toho welamuhup. Ketiya henehiyeg toho welamuhupmu Kristus ebe umbagpag toho waharukmu yet hahupteg henehiyeg anggolo hahup.

¹⁴Kristus unuk fahet hininggaliyap heneptuk lit pulup henebuhup angge famen Allah umbagpag turukon ahime fanowon ino hunubam weregma henehiyeg toho welamuhup.

¹⁵Ap ware feseruk ane men yoholiyangge waruk ane men siyag ane turuk ane men ap enengge hondo rebeserukon men ari fahet hunusuhup halug siyag.

¹⁶Kristus wene holtuk inap uruk lit hunusuruk halug hininggali ha fug angge wereg lit Kristus unuk uruk lit Allah wel turuk lamuhup.

¹⁷Allahn unggum kong tuhu sali ketiya horog toho welahema Allah ibamen unggum werehon atam kong turuk. Unggum kong turuk ane ari nit nunubamen ak tubuhu halug it wene wenggel ha fug angge enepeleg toho wereg inap fobik nangginoho welamuhup?

¹⁸Inindi pikit toho wenggel haruk inap arimano Allahn ying toho fanowap enebuhu halug Allah ninirim peruk lit siyag ane turuk inap nangginoho it arimano unubam tuhu?

¹⁹Ari fahet it arimano Allahn perukon hikit toho unusurukmu fano ane turuk lit ininggareg enehime Allah wal tibahon sali tahan turuk elehon inggikmu emberuk lamuhup.