Read Angguruk Yali 2 PETRUS 2 Bible Online

2 PETRUS 2 - Angguruk Yali bible

2 PETRUS 2

¹Indam Allah umalikisi sehelimu enele si uruk inap inam atuk latfag hag toho ketiya oho enele si ane uruk lit milal heneptuk inap hit sehelimu kik wamuhup. It arimano kik wamuhupteg ap siyahap eneptuk awene ino hiyag hisaruk lit hinindi kahal henebuhup. Onowe windar enepfahon ino fahet awiya waruk lit ininggareg siyag atuk ane alem yami ruruk.

²It arimanowen pabi ane til noruk angge famen fano ane turuk ulug ap anggolo onombolim laruk lamuhup. Iren turuk ane inowen funggalem fanowon Allahn hale fibahon ino fahet ap anggolowen abug uruk lit enembol yig utuk lamuhup.

³Enebuwap fahet eneg wenggeltuk lit suwit inindi famen milal heheg hiyag hisaruk lit henenggengge hirag taruk lamuhup. Iren turuk ane ari fahet Allahn alem angginon wep toho emberisiyon ino eleg aruhu fug.

⁴Malaikat siyag ane tibahon Allahn indi isa fug angge indok humon narukmu kilap enepfag. Kilap enepfareg owik elma hik teg ambeg ino hik isibagma siyag ambeg ino weregman eneg fobik alem kong tuhu sambil eneg wilip amuhup.

⁵Ap kinangmon atam welatfahon indi isa fug angge iren siyag ane uruk ulug ik fam unusibag. Unusibareg we Nuh ino wene fahet tem toho peruk lit hiyag isaruk latfag ahun ino men ap sabiren men onoluk welamag pibag.

⁶Allahn o Sodom men Gomora men harep pisako pin unusibareg fobik Allah fahet enembol yig umuhubon arimano onoluk toho welamag ulug enehangge imbibag.

⁷Lot ino Allah fahet tem toho peruk latfagma oluk welamag pibag. It tuk fug teg ane turuk inap arimanowen likiya hupmu pabi ane eneg turuk lit ele ying turuken Lot ino indi anggin toho welatfag.

⁸Fano ane turuk latfag ahun ino it sehelimu wereg lit likiya hupmu iren onolok ane turuk latfahon yer isaruk lit holtuk latfag. Holtuk latfagma indi fano wenggel haruk latfag angge famen siyaha fisibag.

⁹Ap fano ane turukon siyahonen wal isarukmu Allahn windar enebuk teg. Siyag ane turukon alem kong turuk sambil ino angginon unubam umbuhuk ulug fer enesug lit wereg.

¹⁰It arimanowen ininggareg inindimuwen tila peruk ane ino turuk lit siyag-siyag angge unubam lombohap taruk lit Allahn komo fanowon imbibag ane apmayap turuk. Enele si uruk inap arimanowen ininggali eleg toho hemet turuk lit fanowon poholma werehon fahet abug uruk lit wereg.

¹¹It arimano apma weregma malaikat ine werehon palimu wereg angge famen malaikaren it siyag amag ulug enebug uk fug angge Allah olohotma wereg.

¹²It arimano wamen indi wenggel haruk eleg hag toho werehen sen nenebuhupteg isag nenebukag ulug indag atusa. It arimanowen inindi anggat teg eleg angge famen saplangge eneg abug uruk lit ininggarehen siyag ane turuk ane ariyen fare ambohom hag toho siyag amuhup.

¹³Iren siyag ane turukon ino fahet ayeg waroho war amuhup. Unukoho naruk angge naruk lit enembilikmu unduk fano angge fahet eneg yami ril laruk lit enehiyeg toho wereg. It arimano miye sing hag toho wereg lit hit men ambiyeg suburu naruk lit inindimuwen tila peruk ane inowen nenek turuk lit wereg.

¹⁴It arimano hiyap fahet eneg inil tog sap teg hag toho wereg lit siyahon tu ninirim puk fug angge wereg. Ap inindi wirik teg elehon heg toho memel eneptuk, enebuwap toho wereg ane inowen inindi anggar atuk. It arimano fahet war amag ulug huluwap eneptuk inap wereg.

¹⁵It arimanowen kebunggalem fanowon enembol yig utuk lit un ke laruk. Beor amloho Bileam inowen siyag ane turukon fam onggo hilamin peruk latfag hag toho iren ari roho turuk.

¹⁶Bileam ino siyag ane turuk latfag ane fahet Allahn pet turuk lit komo ribag. Wam keledai emberimu heriyeg latfahon ino ele uk fug teg angge famen ap ele hag toho uruk lit haren siyag ane turuk lahenon embesemihin ulug pet tibag.

¹⁷It enele si uruk inap arimano ik eleruk firig atukon hag toho wereg, hina siyeluwen fu isarukon hag toho wereg. It arimano kuhup ambeg mondabi hik teg ambeg Allahn wep toho emberisi ambeg wereg.

¹⁸It arimano inindi sohu reg angge famen onoluk inaben uruk pukag ulug siyag-siyag ane uruk. Ap winon siyag ane ket enembol yig utuson arimano unubam niren pabi ane turuk laheyon tu hiren oho turuk lamuhup ulug memel eneptuk.

¹⁹It arimanowen ap winon hit hininggik hele loloho wilip amuhup ulug hiyag isaruk angge famen ininggareg siyahon amingmingangge wereg. Ap sa apma atukon ino palimu atukon ino amingmingangge wereg.

²⁰It arimano Nonowe windat nenepfahon Yesus Kristus inindi wenggel haruk lit siyag ane kinangman turukon embeserusa angge famen nin suhuloho senerik lahup halug atam tot fano famen fobik mondabi siyag amuhup.

²¹Wene fanowon ari iren mondabi enepeleg toho welalepma tot fano welalep. Wene fanowon inisanggo fam holtusa angge famen enembol yig utusama it arimano mondabi siyag amuhup.

²²It arimano fahet aben uruk ane tu wirim teg lit wereg, ”Meneyen pak kog tebelug suhuloho inggarehen naruk. Wam oruk fano reg angge famen sabelepma fubu watuk.”