Read Angguruk Yali 1 YOHANES 3 Bible Online

1 YOHANES 3 - Angguruk Yali bible

1 YOHANES 3

¹Ninikni Allahn nit fahet indi anggolo nisaruk ane yet hemek. Allahn numalikisi ulug nununuk suwal neneptisi ane ari famen tem toho nit At umalikisi welahe. Ap kinangmonen Ninikni Allah haruk eleg hag toho nit nonorohole fahet oho enepeleg toho wereg.

²Anden nindi henesug lahiyon nori, ketiya Allah umalikisi welahe angge famen fobik nangginoho welamuhuk ulug ninindi seleg atuk eleg. Kristus waruhu sambil ino ebe ninilen kim hahukteg nit At men ambi roho welamuhuk ane ari nonoluk atuk.

³Ap obog tohowen At fahet tem toho waruhu peruk lit wereg inap arimano Kristus ino Allahn tohon fanowon wereg hag toho it arimano Allah anggengge fanowon hag toho wereg.

⁴Ap obog toho siyag ane turukon arimanowen Allahn komo enepfag ane pisan isaruk. Allahn komo enepfag ane imbibahon siyag ane inowen apmayap turuk.

⁵Nonowe Kristus ubam siyag ane wereg elehen aben siyag ane turukon elehap timin ulug watfag ane hit honoluk.

⁶Ap obog toho Kristus men sebe roho wereg lit ininggik ahandip toho wereg halug it arimanowen siyag ane turuk eleg. Ap siyag ane turuk inap arimanowen Kristus inilen harusa fureg At fahet enepeleg toho wereg.

⁷Numalikisi, ap misihen oho hinindi ninap henebuhup fug. Ap san Allahn peruk ane hikit toho pikir ane turuk halug Kristus ino indi pikit toho wereg hag toho at ino oho indi pikit toho welaruhu.

⁸Wal tibag sambil inowen ak teberuk lit Iblisen siyag ane eneg turuk latfag. Ap san siyag ane eneg turuk halug at ino Iblis amingmingangge wereg. Iblisen turuk ane mondabi siyahap tuhuk ulug Allah amloho ino watfag.

⁹Ap sa Allah amloho wereg halug at ubabut fanowon At ubam werehen siyag ane tuhu fug. Ap ino Allahn indag tarisiyon hag toho werehen at inowen siyag ane tuk fug teg.

¹⁰Allah umalikisi men Iblis umalikisi men fahet enehangge werehon tu: Ap sa Allahn peruk ane hikit toho pikir ane tuk fug angge ori indi enesug elehon ino Allah amloho wereg eleg.

¹¹Wene tam hiyag hisarukmu holtikibon aru: Honori men hit-hit hinindi roho welamuhup.

¹²Hun Kain ino siyahon amingmingangge wereg lit ot ware fisibag hag toho turuk lamuhup fug. Nungge fahet ot ware fisibag? Oweyen turuk latfag ane siyag ane eneg turuk latfag, oren turuk latfag ane fano ane eneg turuk latfag.

¹³Nori, ap kinangmonen hit fahet ninirim peruk halug hinindi anggin ha fug.

¹⁴Nonori ninindi enesug lahe ane ariyen war atuk ambehen wilip atlug onoluk atuk ambeg larukuk ane ari nonoluk. Ap sa ori indi enesug elehon ino ap war atukon wereg ambeg mondabi welaruhu.

¹⁵Ap sa ori indi enesug elehon inowen ap unusuruk ahun hag toho wereg. Ap unusuruk inap arimano mondabi onoluk welam fug teg ane ari honoluk.

¹⁶Aben nit nunuselep angge famen Kristus ninibil atfag ane fahet ware fisibag. Ware fisibag ane ariyen indi nenesug ane nonoluk atisi. Kristus ino it fahet An nuwabukag pibag hag toho niren oho nonori fahet nunusukag peruk lamuhuk.

¹⁷Ap sa anggengge anggolo wereg angge famen are misig anggengge elehen ilaheg toho weregma yet haruk lit og itmin fug ulug indi hondo reberuk lit wereg ahun inowen nangginoho Allah nindi reg lahi uk teg?

¹⁸Numalikisi, nonori ninindi henesug lahe ulug henembilik fam eneg uk fug. Ninindi wirik toho wenggel haruk lit nininggik fam fano ane turuk lit nonori ninindi enesug lamuhuk.

¹⁹Ninikni Allah tem toho urukon ino amingmingangge nit welahe ane ari nonoluk. Nonoluk toho wereg lit Allah alukema ninindi yuwag toho welahe.

²⁰Nininggareg ninindi fam wenggel haruk lahe ane ariyen siyag ane nunubam lombohap taruk lahema Allah suwon palimu wereg lit nit ninindi fam wenggel haruk ane At apma werehon At oluk teg lit wereg.

²¹Anden nindi henesug lahiyon nori, nininggareg ninindi fam wenggel haruk laheyon ariyen siyag ane nunubam lombohap tahuk fug halug Allah alukema nenembong se roho welam teg lamuhuk.

²²Allahn komo neneptuk ane hikit toho turuk lahema nit fahet fano peruk lit werehen At ubam heng uruk lahe angge og nisaruk.

²³Aren komo neneptuk ane uruk lahiyon aru: Amloho Yesus Kristus ubam ninindi wenggel haruk lit Kristus inggarehen hiyag nisibag hag toho nonori men ninindi roho welamuhuk.

²⁴Ap san komo neneptisiyon hikit toho turuk laruhu halug at ino Allah men sebe roho welaruhumu Allah oho at men welaruhu. Allah hime fanowon Aren og nisarisi ane ariyen Allah men sebe roho welahe ane nit nonoluk atuk.