Read Angguruk Yali HAKIM-HAKIM 10 Bible Online

HAKIM-HAKIM 10 - Angguruk Yali bible

HAKIM-HAKIM 10

¹Abimelekh war atfagma Israel inap windat eneptukon eke Isakhar ahun Dodo inowen endetfahon Pua amloho Tola in atfag. Tola ibam o Samir tom Efraim fam welatfag.

²Tola ino ap suwon hakim wereg lit Israel inap fet enesugmen eneg mo ilig am wirig am turukmu fuwap fumahen 23 libag. Libagma Tola ino war atfagma o Samir inowen kinangma sale fisibag.

³Hun Tola war atfagma ubalmangge Gilead ahun Yair ino ap suwon hakim lahibareg Israel inap fet enesugmen eneg mo ilig am wirig am turukmu falfalik fumahen 22 atfag.

⁴Tola inowen ap umalik teng misigmen nubam hilag hinahan 30 indag enepfag. Tola umalikisi arimanowen wam keledai teng misigmen nubam hilag hinahan fam lahalug laruk latfag. O pumbuk Gilead kinangma werehon teng misigmen nubam hilag hinahan it ngi atfahon ununuk o Hawot-Yair suwalfahon ketiya oho wereg.

⁵Yair ino war atfagma o Kamon kinangma sale fisibag.

⁶Yair ino kinangma sale fisibagma Israel inap arimanowen NINIKNI Allah olohotman siyag ane eneg turuk latfag. NINIKNI Allah enembol yig utuk lit At ubam sembahyang uk fug angge ap o wina ke werehonen nunumbasi Baal men Astoret men ulug wel eneptukon men Siria inap, Sidon inap, Moab inap, Amon inap menen Allah hag toho wereg perukon iren oho wel eneptuk latfag.

⁷Ari roho turuk latfagma NINIKNI Allah indimu inahan hibareg Israel inap arimano Filistin inap men Amon inap men ininggikmu imbibag.

⁸Imbibagma Israel inap ik Yordan fuma fil o Gilead tam Amori inap ngi atfag ambeg weregma Amon inaben inindi onolok toho siyahap eneptukmen eneg mo ilig am wirig am turukmu num fumahen 18 atfag.

⁹Atfagma Amon inap arimano ik Yordan paloho nindig atfareg Yehuda inap men Benyamin inap men Efraim inap men tog aptukmen eneg Israel inap arimano asengseng toho welatfag.

¹⁰Asengseng toho wereg lit Israel inaben NINIKNI Allah fam enele hum toho uruk lit, ”Niren Hat holohotman siyag ane anggolo turukuk. Hat nenembol yig hutuk lit ap o wina ke werehonen wel eneptukon Baal arimano niren oho wel eneptuk latukuk,” ibag.

¹¹Ibagma NINIKNI Allahn Israel inap unubam ele uruk lit, ”Mesir inap, Amori inap, Amon inap, Filistin inap, Sidon inap, Amalek inap, Maon inap menen hit henele ying heneptuk latusama hiren An nubam henele hum toho uruk latikipmu Anden hit it ininggikmuwen windat heneptuk latikik fug ano?

¹³Anden windat heneptuk latikik angge famen hiren An henembol yig nutuk lit ap o wina ke werehonen wel eneptukon hiren oho wel eneptuk lahepma Anden hit fobik let henebuhuk fug.

¹⁴Hit asengseng toho welahep halug ap winonen wel eneptuk angge hiren oho mumal tarikibon unubam henele hi roho ilihipmu iren hit windat henebuhup,” ulug hiyag isibag.

¹⁵Hiyag isibagma Israel inaben NINIKNI Allah fam, ”Niren Hat holohotman siyag ane turukukmu Haren fano peruk lahen ane nunubam timihin. O yoho eneg windat nenebik ma!” ibag.

¹⁶Ari ibagma Israel inaben ap winamonen wel eneptuk angge arimano hik isibareg nin hebeloho NINIKNI Allah fam sembahyang uruk latfag. Sembahyang urukmu NINIKNI Allahn Israel inap asengseng haruk latfag ane yet isaruk lit indi anggin toho welatfag.

¹⁷Weregma Amon inap sehen senehon arimano palu atfareg Gilead kinangma o sabo wirik libag. Wirik libagma Israel inap oho palu atfareg o Mizpa o sabo wirik libareg welatfag.

¹⁸Wereg lit Gilead inap onowesiyen it-it enele sahaltuk lit, ”Ap sa Amon inap men tog apmin ulug akol eleg toho tog elma lahu? At ino Gilead ninap obog toho nonowe welaruhu,” uruk latfag.