Read Angguruk Yali HAKIM-HAKIM 11 Bible Online

HAKIM-HAKIM 11 - Angguruk Yali bible

HAKIM-HAKIM 11

¹O Gilead inowen ap ahako roho turukon eke unuk te Yefta welatfag. At ikni unuk Gilead inowen hiyap yaying turukon eke hilibareg enemloho Yefta ino indag tibag.

²Hun Gilead uhe yuhonen oho umalikisi ap angge indag itfag. Umalikisi indag itfahon arimano su atfareg Yefta ino yanggaltul ulug hiyag utuk lit, ”Hat hisinga amuwonen indag hasuhon welahen angge re ninikni war aruhu halug anggengge lin isahuwon ino hat ngi aruhun fug,” ulug yanggalfag.

³Yanggalfagma Yefta ino ori embeselug libareg o Tob tonggoma welatfag. Weregma yoholiyangge waruk inap at ambeg watfagma at men ambiyeg aben tohon hilil noruk latfag.

⁴Weregma o Amon inaben Israel inap men tog abul ulug watfag.

⁵Tog abul ulug waharukmu o Gilead inap onowesi arimano hun Yefta hondohik lul ulug o Tob tonggoma libag.

⁶Libareg Yefta fam enele uruk lit, ”Niren Amon inap men tog aptuk lamuhukon fahet milal neneptuk laruhunen hondog habik wahe,” ulug hiyag itfag.

⁷Hiyag itfagma Yefta inowen Gilead inap onowesi hiyag isaruk lit, ”Hiren an fahet ninirim ulug nikni ibamen yanggal naptikip angge re ketiya alem angginon hunubam weregma nungge fahet an hondog nabik wahep?” ibag.

⁸Ari ibagma iren Yefta hiyag utuk lit, ”Nit ambiyeg lulteg Amon inap men tog aptuk lamuhukon fahet milal neneptuk laruhun halug o Gilead ninap obog toho nonowe hat welaruhun,” ulug hiyag itfag.

⁹Hiyag itfagma Yefta inowen hiyag isaruk lit, ”An hit men o Gilead kinangma suhuloho lulteg Amon inap men tog aptukmu NINIKNI Allahn ap seliyon arimano an ninggikmu umbuhu halug an hit honowe aruhukon fahet we tem toho ehep ano?” ibag.

¹⁰Ibagma iren, ”NINIKNI Allahn holeg lit weregma haren ehenon hikit toho hubam turuk lamuhuken we tik-tem toho ehe,” ulug hiyag itfag.

¹¹Hiyag itfagma Yefta ino Gilead inap onowesi men ambiyeg libagma Gilead inaben, ”Hat nonowe wereg lit nit tog aptukmu milal neneptuk laruhun,” ulug lahapfag. Lahapfagma Yefta inowen mun ane man ane indimu wenggeltuk latfahon NINIKNI Allah hiyag itmin ulug o Mizpa libag.

¹²Welatfareg Yefta inowen otsi hiyag isaruk lit, ”Amon inap onowe suwon ambeg lalihipteg hiyag irik lalihibon tu: Niren nungge ane hubam turukukmu haren nunusul ulug nit nenengginangma waharikin?” ulug hiyag isibag ane ino hikit toho hiyag irik libag.

¹³Hiyag irik libagma Amon inap onowe inowen Yefta otsi hiyag isaruk lit, ”Israel inap o Mesiren wilip atfareg an nangginang ik Arnon famen tulug Yordan ikma obog toho ilmig tibag angge re ketiya hinindi fano roho suhuloho og numuhuben waharikik,” ulug hiyag isibag.

¹⁴Hiyag isibag ane ino Yefta hiyag irik watfagma Yefta inowen nin hebeloho otsi hiyag isaruk lit, ”Amon inap onowe hiyag irik lalihibon tu:

¹⁵Nonowe Yefta inowen ehekon tu holeg lamin! Israel inaben Moab inap enengginang men Amon inap enengginang men ilmig tibag fug.

¹⁶Israel inap o Mesiren wilip atfareg lek keyen ik Longgop ayegma libareg o Kades libag.

¹⁷O Kades libareg ap mon eneptuk lit, ’Edom inap onowe suwon ambeg lalihipteg hiyag irik lalihibon tu: An nangginang keyen lalihip ulug hiyag nisimin,’ ulug hiyag isibag ane hikit toho hiyag irik libag angge famen Edom inap onowe inowen lalihip ulug hiyag isibag fug. Hiyag isibag fugmu Moab inap onowe suwon fam oho ari hag toho heng tibag angge famen aren oho lalihip ulug hiyag isibag fug. Hiyag isibag fugmu Israel inap o Kades welatfag.

¹⁸Welatfareg wilip atug laruk lit Edom kinang oho Amon kinang oho unuyug sobuk fug angge walinggoho lalug lek keyen Moab kinang yali fil libareg Moab kinangma oho kuk fug angge Moab kinang hili-hilimu ik Arnon ayegma o sabo wiroho welatfag.

¹⁹Welatfareg ap mon eneptuk lit, ’Amori inap onowe suwon Sihon o Hesbon weregma lalihipteg nit welamuhuk ambeg lahuken an nangginang keyen lalihip ulug hiyag nisamisiyen hiyag irik lalihip,’ ulug hiyag isibag ane hikit toho hiyag irik libag.

²⁰Hiyag irik libagma Sihon inowen Israel inap arimano an nangginang ilmig tahuk ulug indit toho ehesa ulug wenggel hibareg otsi sehen senehon obog toho wol eneplug o Yahas libareg o sabo wiroho wereg lit Israel inap men tog abul ulug wilip atfag.

²¹Tog aptukmu Israel inap INIKNI Allahn Sihon otsi men it ininggikmu imbibagma Israel inap arimano it Amori inap enengginangma kibag.

²²Kibareg ik Arnon ambut filen tulug lahareg ik Yabok fil oho, lekma yali filen tulug ik Yordan mo ubuk uruk fil oho Amori inap enengginang obog toho Israel inaben ilmig tibag.

²³Ari roho turuk lit Israel ninap NINIKNI Allahn Amori inap arimano yanggal enepfareg enengginang ino Israel ninap og nisibag angge re ketiya haren kinang ari ilmig neneptuk lit yanggal nenebuhunen waharikin ano?

²⁴Hunumba hiren wel turuk lahebon Kamos inowen hit honolohotman ap seliyon yanggal eneptuk ambeg arimano hit ngi atuk lahep fug ano? Ari hag toho nit NINIKNI Allahn ap yanggal eneptuk ambeg arimano nit ngi atuk lahe.

²⁵Haren hawelwel taruk lit an nubabut fano regma Moab inap onowe suwon hun Zipor amloho Balak ubabut siyag teg peruk lahen? At ino Israel inap arimano siyahap enebuhuken tog abul ulug misihim oho waharisi fug.

²⁶Israel inap o Hesbon men Aroer men pumbuk walinggoho werehon men o pumbuk ik Arnon ayegma werehon men amusun toho weregman eneg mo ilig am wirig am turukmu teng nanggoloben 300 atisi angge famen indam oho nungge fahet o pumbuk arimano ininggikmuwen taluk enebul ulug waharikip fug?

²⁷Anden hat hubam siyag ane tirikik fugmu haren nunusimin ulug waharuk lit siyag ane nunubam turuk lahen. NINIKNI Allah alem haloho emberuk ahun inowen o yoho eneg alem nit Israel ninap men hit Amon hinap men nunubam werehon ino hale femisi,” ulug Yefta inowen otsi hiyag isibag ane hikit toho Amon inap onowe hiyag irik libag.

²⁸Hiyag irik libag angge famen Amon inap onowe suwon inowen holfag fug.

²⁹Holfag fugmu NINIKNI Allah ahime fanowon Yefta ubam atfagma kinang Gilead men Manasye men atogman atogma libareg suhuloho ibam o Mizpa Gilead kinangma werehon ino watfareg welatfag. Welatfareg Amon inap men tog abuhuk ulug enembeg libag.

³⁰Libareg Yefta inowen NINIKNI Allah fam sali emberuk lit, ”Haren Amon inap arimano an ninggikmu umbuhun halug

³¹an nebe fano roho suhuloho waharukmu atamtam nibamen an nolohotma wilip aruhu angge ino anden NINIKNI Allahn tohon wereg ulug indokma yale fuhuk,” ulug sali imbibag.

³²Sali imbibareg Yefta inowen Amon inap men tog aptukmu NINIKNI Allahn Amon inap arimano inggikmu imbibag.

³³Inggikmu imbibagma Yefta inowen Amon inap mulangge unusuruk lit o Aroer famen tulug Minit men Abel-Keramim men o pumbuk likin fumahen ilmig enepfag. Ilmig eneptuk lit Amon inap arimano apmayap enepfag.

³⁴Apmayap enepfareg Yefta ino nibam lamin ulug o Mizpa libareg yet harukmen ahaloho we misig eneg angge ino an nikni olohotma lamin ulug sini yunggultuk lit waruk teltil ibamen wilip atukmu yet hibag.

³⁵Yet hibareg asum wan teg latfahon ino tararag isibareg ele uruk lit, ”Yihi, nahaloho, haren an nindi siyahap nabehenma nindimu anggin toho welahi. Anden NINIKNI Allah fam sali emberikikon ino nele si ane irikik ulug uwag oko wa fug teg lahi,” ibag.

³⁶Ibagma ahaloho inowen ikni fam ele uruk lit, ”Nikni, haren NINIKNI Allah fam sali emberikinmu Aren Amon inap hat men seli roho werehon arimano hinggikmu emberisi angge re haren sali irikin ane hikit toho an nubam timihin,” ulug hiyag itfag.

³⁷Ari ulug hiyag itfareg nin eke hiyag utuk lit, ”Nikni, anden heng hapminon tu holeg lamin: An nehebi men tom fam lahulteg an nahun hila fug angge war aruhukon fahet uba yatuk lit pikalem piren welamuhuken heng haptuk lahi,” ulug hiyag itfag.

³⁸Hiyag itfagma Yefta inowen ahaloho fam, ”Tom fam pikalem piren welamuhuben lalihip,” ulug hiyag itfagma ahaloho ehebi men ambiyeg libareg tom fam wereg lit nahun hila fug angge war aruhuk ulug ehebi men uba yako welatfag.

³⁹Uba yatuk lit pikalem piren welatfareg suhuloho ikni ibam watfagma ikniyen tam sali imbibahon hikit toho ubam tibagma hiyap ino ap eke hila fug angge war atfag. War atfag ane ari fahet mo ilig am wirig am turukmu Israel hiyap tuhumon arimano inibam embeselug laruk lit hun Yefta inowen ahaloho fam tibag ane fahet ketiya oho piya sini uruk lit hup uhanam wereg.