Read Angguruk Yali HAKIM-HAKIM 12 Bible Online

HAKIM-HAKIM 12 - Angguruk Yali bible

HAKIM-HAKIM 12

¹Welatfagma Efraim inap sehen senehon arimano wilip atug o Zafon libareg Yefta fam enele uruk lit, ”Nungge fahet haren nit Amon inap men tog abulen ambiyeg lul ulug wol nenebuk fug angge hamu wilip atikin? Hamu eneg wilip atikinmu hat hebe hibamet harep pisako huwabul,” ulug suwahal ibag.

²Suwahal urukmu Yefta inowen hiyag isaruk lit, ”An men Amon inap menen tog humon aptuk lit anden hit let nenebik wamuhup ulug wol heneptikik angge famen an it ininggikmuwen windat nabul ulug waharikip fug.

³Windat nabik wamusa ulug nangno heneptukmen waharikip fugmu an fano war atmin ulug tog elma larikikmen NINIKNI Allahn Amon inap arimano an ninggikmu emberisi angge re nungge fahet hit o yoho an men suwahal ul ulug wahep?” ulug Efraim inap arimano pet enepfag.

⁴Pet enepfareg Yefta inowen otsi Gilead inap obog toho palu eneplug Efraim inap men tog abik libag. Efraim inap arimanowen Gilead inap enebug uruk lit, ”Hit Gilead hinap nit Efraim ninap men nonori Manasye inap men sehelimu welatikip angge famen nenemu welamuhuk ulug nunumbahalug wilip atikibon fahet hunusul,” uruk latfag. Ari uruk latfag angge famen Gilead inaben it apmayap enepfag.

⁵Apmayap enepfareg Gilead inaben ik Yordan paloho nindig atuk ambeg arimano ilmig tibag. Ari tibagma Efraim inap koloweg wilip atfahon arimano misig-misig Gilead inaben ilmig tibag ambeg arimano laruk lit, ”Ik aru paloho nindig atminen hiyag nemek,” ulug heng eneptuk latfag. Heng eneptukmu Gilead inaben hebeloho, ”Hat te Efraim hahun wahen?” ulug kapal harukmu ap inowen, ”Efraim nahun wahi fug,” uruk latfag halug

⁶iren ap ino fam, ”Ari ehenma nit nenele roho syibolet urukon ino seleg toho imihinmu eneg lamihin ul,” ulug hiyag utuk latfag. Ari urukmu ap inowen syibolet urukon ino seleg toho uk fug tehen sibolet uruk latfag halug Gilead inaben ap ino senetug ik Yordan paloho nindig atuk ambeg arimanowen pinggi watuk latfag. O itano li iren Efraim inap teng-teng angge 42.000 unusuruk latfag.

⁷Yefta ino ap suwon hakim wereg lit Israel inap fet enesugmen eneg mo falfaliken atfagma Gilead ahun Yefta ino war atfag. War atfagma ibam o Gilead kinangma sale fisibag.

⁸Yefta ubalma o Betlehem ahun Ebzan ino ap suwon hakim lahibareg Israel inap fet enesug latfag.

⁹Ebzan inowen ap umalik teng misigmen nubam hilag hinahan 30, hilani umalik oho teng misigmen nubam hilag hinahan 30 indag enepfag. Ebzan inowen hilani umalik arimano enehunsi o wina keyon og isaruk lit ap umalik unuhesi hiyap o wina keyon teng misigmen nubam hilag hinahan hondog enebik libareg og isibag. Ari turuk lit Israel inap fet enesugmen eneg mo sabiren libag.

¹⁰Libagma Ebzan ino war atfagma o Betlehem kinangma sale fisibag.

¹¹Hun Ebzan ubalma Zebulon ahun Elon ino ap suwon hakim lahibareg Israel inap fet enesugmen eneg mo numen libag.

¹²Mo numen libagma Elon ino war atfagma kinang Zebulon fam o pumbuk Ayalon kinangma sale fisibag.

¹³Hun Elon ubalma o Piraton ahun Hilel amloho Abdon ino ap suwon hakim lahibareg Israel inap fet enesug latfag.

¹⁴Elon umalikisi ap angge teng misigmen nubam hilag nuwalen 40 weregma umbusagsi ap angge teng misigmen nubam hilag hinahan 30 welatfag. It wal taneg wam keledai it og eneplug larukon misig-misig foroho latfag. Abdon inowen Israel inap fet enesugmen eneg mo likinen libag.

¹⁵Mo likinen libagma Abdon ino war atfagma Efraim kinangma Amalek inap enentom fam o Piraton pumbukmu sale fisibag.