Read Angguruk Yali HAKIM-HAKIM 13 Bible Online

HAKIM-HAKIM 13 - Angguruk Yali bible

HAKIM-HAKIM 13

¹Israel inaben nin eke NINIKNI Allah olohotma siyag-siyag ane eneg turuk latfagma NINIKNI Allahn Israel inap arimano Filistin inap enepma welamuhup ulug ininggikmu imbisibareg weregman eneg mo teng misigmen nubam hilag nuwalen 40 atfag.

²Ari turuk latfag li o Zora ahun unggul unuk Dan unuk te Manoah welatfag. Hun ino uhe ibili reg lit malik indag ta fug angge welatfag.

³Weregma NINIKNI Allah ot malaikat ino hiyap ino ambeg watfareg ele ubam uruk lit, ”Hat ibili reg lit malik indag ta fug angge welahen angge famen malik hahummu aruhumu malik ap angge indag tahun.

⁴Malik ino indag tahunen haren ik anggur ahaluwe men ik olokon winon men Allah fahet umbuk fug tehon oho saliyog na fug angge welaruhun!

⁵Malik ino indag aruhu sambilen Allah amingmingangge nazir wereg lit Allah fam sali umbuhuwon pisan isahu rohon ulug fili fam oruk heroho paleg laruhu fug.[8] Israel inap arimano Filistin inap ininggikmuwen windat eneptukon aren ak turuk laruhu,” ulug hiyag itfag.

⁶Hiyag itfagma hiyap ino ahun ambeg watfareg ele uruk lit, ”Allahn monde fehekon eke nambeg wahama anden yet hihireg Allah ot malaikat hahon misig waha ulug nakol anggolo hihi. Nakolen hat keman wahen ulug umung hihi fugmu aren oho unuk hiyag num fug angge

⁷we ele eneg nubam uruk lit, ’Malik hahummu aruhumu malik ap angge indag tahun. Malik ino indag aruhu sambilen Allah amingmingangge nazir wereg lit Allah fam sali umbuhuwon pisan isa fug angge weregman eneg war aruhuwen haren ik anggur ahaluwe men ik olokon winon men Allah fahet umbuk fug tehon oho saliyog naruk laruhun fug,’ ulug hiyag nerehekma wahi,” ulug hiyag itfag.

⁸Hiyag itfagma hun Manoah inowen NINIKNI Allah fam sembahyang uruk lit, ”Nikni suwon, hamingmingangge monde fehenon ino nin eke monde fuhunmu malik indag tahukon ubam tuhuk ane hiyag nisa waruhu,” ibag.

⁹Sembahyang ibahon Allahn hol hibareg nin ot malaikat ino monde fibagma hiyap ino ahun embeselug yabukmu libareg amu eneg wereg ambeg watfag.

¹⁰Watfagma hiyap ino folo-folo ahun ambeg libareg, ”Ap tam nambeg waharisiyon ino nin eke nambeg waha,” ulug hiyag irik watfag.

¹¹Hiyag irik watfagma ahun Manoah inowen ha lul ulug uhe min ap ino weregma libareg, ”Haren hiyap tu fam hele irikinon ino nin wahen?” ulug umung hibagma yu ibag.

¹²Yu ibagma Manoah inowen, ”Haren malik eke indag tahup ulug hiyag nisarikinon hikir aruhu halug malik ari ubam turuk lamuhuk ane men, at ino su aruhureg inggarehen turuk laruhu ane men fahet hiyag nisamihin,” ulug hiyag itfag.

¹³Hiyag itfagma malaikat inowen hiyag utuk lit, ”Anggur anggen men ik anggur ahaluwe men ik olokon winon men usangge urukon oho saliyog naruk laruhun fug ulug hiyap tu hiyag itikikon ino hikit toho turuk laruhuwen indimuwen fano roho wenggeltuk laruhu,” ibag.

¹⁵Ibagma Manoah ino NINIKNI Allahn ot malaikat monde fehekon tu ulug apeleg teg lit at ubam hiyag utuk lit, ”Wam kambing eke isag humulen tot welatmihin,” ibagma malaikat inowen, ”An welatminmu isag nitlihibon namin fug angge famen haren esetmin peruk lahenon ari NINIKNI Allah fahet embemin ulug yale femihin,” ibag.

¹⁷Ibagma Manoah inowen, ”Haren hiyag nisarikinon hikit toho malik indag tahuk halug hat hi habuhuken hunuk hiyag nisimin!” ibag.

¹⁸Ibagma malaikat inowen, ”Nunuk aben uk fug tehon weregman nungge fahet hunuk sa ulug umung neyehen?” ibag.

¹⁹Ibagma Manoah inowen wam kambing misig wak libareg suburu men mangno roho helep fam embelug NINIKNI Allah aben tuk fug teg ane turukon fahet yalfag.

²⁰Yaltuk lit Manoah uhe menen yet harukmen indok ambulpul yaltuk ambehen hum toho laharikim ambulpul ino fene malaikat ino poholma longgo urukmu yet hibareg hun Manoah inowen NINIKNI Allahn ot malaikat ino monde fehek ulug oluk atfareg uhe men enekolen onorohole han kinangma ying atfag. Ying atfareg weregman malaikat ino fobik oho enembeg wam fug angge mondabi libag.

²²Libagma Manoah inowen uhe fam, ”Nit ninilen Allah hehe angge re we tem toho war amuhuk,” ibagma

²³uheyen te, ”NINIKNI Allahn nunusimin pelepteg yalehe angge ari embeselug malaikat yet hawag ulug nenembeg monde fik wam fug angge ele hiyag neselep fug,” ibag.

²⁴Ibareg welatfagma hiyap ino malik ahummu atfagma indag tibareg unuk te Simson suwalfag. Simson ino su atukmu NINIKNI Allahn ineyap turuk latfag.

²⁵Simson ino o Zora men Estaol men honggolegma Dan inaben o sabo wiroho welatfag ambeg weregma NINIKNI Allahn hime fanowon undama monde fibagma ine roho turuk latfag ane ak tibag.