Read Angguruk Yali HAKIM-HAKIM 14 Bible Online

HAKIM-HAKIM 14 - Angguruk Yali bible

HAKIM-HAKIM 14

¹Misihim Simson ino o Timna libareg Filistin hiyap tuhumon misig weregma yet hibag.

²Yet hibareg ibam watfareg ikni men isinga men unubam hiyag isaruk lit, ”O Timna larikikteg Filistin hiyap fanowon misig yet harikikon hilahuken let nabuhup,” ibag.

³Ibagma ikni men isinga menen te, ”Nit ninibam tuma hiyap eleg? Nit nenele uruk laheyon obog toho enesehelimu hiyap eleg? Nungge fahet Filistin inap Allah wene enepeleg inap enembilahap paleg elehon enehaloho hilahuk peruk lahen?” ulug pet tibag. Pet tibagma Simson inowen ikni fam, ”We at eneg nindiyen hilahuken let nabuhup,” ibag.

⁴Ikni men isinga menen NINIKNI Allahn peruk ane hikit toho Simsonen hiyag nesehek puk fug angge ibag. Filistin inaben Israel inap mingming eneptuk latfahon fahet Simsonen unusuruk laruhu ulug alem hiyahukag ulug NINIKNI Allahn perukmu Simson inowen hiyap ari hilahuk ulug wenggel hibag.

⁵Welatfareg Simson ikni isinga men o Timna lul ulug o ino horogma iniyabuk anggur yaho ambeg larukmen mene singa humon olokon misihen huwatmin ulug hilak til Simson ambeg watfag.

⁶Waharukmu NINIKNI Allah ahime Simson ubam atfagma inggikmu nungge-nungge seneg elehen we inggiken sen hibareg lisoho wam umalik fuhatuk hag toho fuhat-fuhat hik isibag. Hik isibareg ikni men isinga men tot hiyag isa fug angge laruk latfag.

⁷O ino libareg Simson men hiyap ino menen enele ambiyeg uruk latfareg hiyap tu fano ulug wenggel haruk latfag.

⁸Welatfareg hiyap ino hilahuk ulug nin o Timna laruk lit mene singa watikikon ino ha lamin ulug kebunggalem embeselug anggenma libareg kim harukmen mene ino undama kin eke yihikmen altap fam ahaluwe wereg latfag.

⁹Wereg latfagma kin altap ino wibareg ahaluwe ino nil-nil libareg ikni men isinga men oho og isibagma nibag. Kin altap aru mene watikikon undaman wihi ulug hiyag isibag fug.

¹⁰Welatfagma ikni inowen hiyap onggoma war isamin ulug larukmu Simsonen te ap kabiniyon wina inaben turuk latfag hag toho umbarikisi seni isag isamin peruk latfag.

¹¹Ari roho peruk lit waharukmu yet hibareg umbarikisiyen ap kabiniyon teng misig eneg Simson men wereg lit seni esetuk lamuhup ulug en enepfag.

¹²En enepfagma Simson inowen it unubam, ”Nori, anden alem misig fahet indit toho umung hisamin. Umung hisaminon ari fahet hiren fano roho hiyag numuhupmu sum likiya hupmu wan turuk lamuhubon teng misig men henehiyehen yunggultuk li wan turuk lamuhubon teng misig men og hisahuk angge famen hit an men weregman o sabirenam aruhumu hiyag num fug teg lamuhup halug sum likiya hupmu wan turukon teng misig men yunggultuk li wan turukon teng misig men hiren an og numuhup,” ulug hiyag isibag. Hiyag isibagma iren, ”Umung nisamihinon ari holtulen in,” ibag.

¹⁴Ibagma Simsonen te, ”Ap narukon ino famen aben naruk angge wilip atisi. Olok angge ino famen unduk fanowon wilip atisi,” ulug indit toho hiyag isibag. Hiyag isibagma, ”Nungge fahet irisi?” ulug wenggel harukmen eneg hup hinahanam atfag.

¹⁵Uhaneg sambil ap arimanowen Simson uhe ino fam, ”Haren hahunen umung nisarisiyon fahet at ubam hele ine roho kapal hamihinmu hiyag hitmisi ane nit hiyag nisamihin. Hiyag nisamihin fug halug hikni ibam harep pisako hat hori men hunusuhuk. Niren angge obog toho eleg amag ulug seni isag nesehep ano?” ulug hiyap ino fam hiyag itfag.

¹⁶Hiyag itfagma hiyap ino ahun ambeg libareg uba yatuk lit, ”Hindi nasug lam fug angge an fahet hirim peruk lahen. An nerekesi fam indit toho hinog og isarikin angge famen ari fahet ihi ulug an hiyag nitikin fug,” ibagma, ”Nikni men nisinga men oho hiyag isarikik fug. Hat nungge fahet hiyag hetle,” ibag.

¹⁷Ibagma uhe ino at olohotman uba yatuk lit eneg weregma Simson umbarikisi men enehiyehen yunggultukmen eneg o sabit sakan tibag. O sabit sakan tibagma Simson inowen nele ying naptuk ulug, ”Alem ari fahet hiyag isarikik,” ulug uhe hiyag itfagma hiyap ino erekesi hiyag isa libag.

¹⁸Libareg weregma o sabit sambil ino mo uwan ubuk uk fugmu erekesi arimanowen unumbarik fam, ”Kin ahaluwe ari unduk fano, nungge-nungge ari hahon unduk fanowon wereg eleg. Mene singa ari olok anggolo, nungge-nungge olokon ari hahon wereg eleg,” ulug hiyag itfag. Hiyag itfagma Simson inowen te, ”An nuwanggun fam yabuk witlep fugmu honoluk alep fug,” ibag.

¹⁹Ibagma NINIKNI Allah hime fanowon ubam atfagma o Askelon libareg Filistin inap teng misig ware fisibareg enesum fanowon wan teg latfahon nonggole fisibareg ap hinog og isibahon arimano og isibag. Og isibareg undaman olok toho ikni ibam watfag.

²⁰Ikni ibam watfagma Simsonen hilahuk pibag hiyap ino ikniyen Filistin ahun tam Simson let turuk lit seni esetfahon ino uhe amag ulug og itfag.