Read Angguruk Yali HAKIM-HAKIM 15 Bible Online

HAKIM-HAKIM 15 - Angguruk Yali bible

HAKIM-HAKIM 15

¹Welatfagma roti anggen paltuk li Simson nuhe weregma lamin ulug wam kambing umalik misig wibareg iyamal ambeg libag. Libareg, ”Nuhe weregma kimin,” ulug hiyag itfagma iyamal inowen, ”Kimihin fug,” il laruk lit,

²”Nahaloho fahet holok harikinmu mondabi embeserisi ulug hare og itikik. Ot ari kim hamihin, at te tuhum anggolo regma owe men wirim teg elehen ubalmangge hilamihin,” ibag.

³Ari ibagma Simson inowen te, ”An nuhe ap og isarikipmu Filistin hinap hunusuhukon ari siyag fug-o, fano hunusuhuk,” ibareg

⁴farema libareg olomene teng nanggoloben 300 senetfareg piren-piren ahaye het til libag. Het til libareg iral enehaye honggoleg ke pug til libag.

⁵Pug til libareg iral arimano pisaho fibareg Filistin inap iniyabukmu ho ribisibagma roti anggen wereg ke larukmen roti anggen olukon men paloho pug toho imbibahon men e zaitun anggen narukon yatfahon oho obog toho harep nibagma siyag atfag.

⁶Siyag atfagma Filistin inap arimanowen, ”San niniyabuk harep pisarehek?” ulug umung-umung atuk latfagma aben hiyag isaruk lit, ”Simson inowen niyamal Timna ahun inowen nuhe an nare og itisi ulug pisarehek,” ibag. Ibagma Filistin inap arimano libareg Timna ahun ibam harep pisako ahalohowet oriyet unusibag.

⁷Unusibagma Simson inowen, ”Nuhe men niyamal men unusehepma hit hunusuhukteg eneg hunumbahalug lahuk,” ibareg

⁸anggolo unusurukmu unuwag sombo roho lin uruk latfagma Simson ino o Etam owikmu libareg welatfag.

⁹Welatfagma Filistin inap Yehuda punumu watfareg o pumbuk Lehi pin unusuhuk ulug iraham nohik watfag.

¹⁰Weregma Yehuda inaben, ”Nungge fahet nunusik wahep?” ulug kapal isibagma, ”Hun Simson hele wabulteg aren nunusirisi hag toho ar oho wabulen wahe,” ibag.

¹¹Ibagma Yehuda inap teng-teng angge 3.000 Simson welatfag ambeg o Etam owikmu libareg, ”Filistin inaben inine roho sen nenesug lit werehon fahet hat hapeleg? Haren tirikin ane fahet ketiya alem angginon nit nunubam atuk,” ulug hiyag itfag. Hiyag itfagma, ”Iren an nubam turusa ane fahet anden unusirikik,” ibag.

¹²Ibagma iren te, ”Hat hinggik hele wat habulteg og haplug lulteg Filistin inap hat og isahuk ulug wahe,” ibagma Simson inowen te, ”Hiren huwabul fug ulug tem toho iyek,” ibagma

¹³”Tem toho niren huwabul fug, we hinggik hele wat habulteg og haplug lulteg hat og isahuk,” ibareg hele keron piren fam inggik hele watfareg owik famen walug o Lehi watfag.

¹⁴O Lehi watfagma Filistin inaben nininggikmu aha ulug enehiyehen ngik-ngog il ambeg larukmen NINIKNI Allah hime ino ubam atfagma hele inggik watfahon itano hekel indoken narehon hag toho ohog libagma lol atfag.

¹⁵Lol atfareg wam keledai ket war atfahon iyahunde uwag weregma yet hibareg wibareg Filistin inap teng-teng angge winag isa fug tehon 1.000 unusibag.

¹⁶Unusibareg, ”Wam iyahunde fam ap aruma nine roho unusihi.[9] Wam iyahunde fam ap teng-teng angge pinggi unusihi,” ibareg

¹⁷iyahunde uwag ino hik isibag. Iyahunde fam unusibag ambeg ino aben Ramat-Lehi[10] suwalfag.

¹⁸Ap arimano unusibareg Simson ino ik obok anggolo hibareg NINIKNI Allah fam sembahyang uruk lit, ”Haren an Hat hamingmingangge nibil ahenma ap anggolo unusihireg ketiya ik oboken war am hag toho welahimu wene enepeleg inap enembilahap paleg elehonen sen nabukag ulug numbaharuk lahen?” ibag.

¹⁹Ibagma Allahn helep fo reg ambeg o Lehi werehon ino fele ribagma ik wilip atfagma ik ino nibareg ine atfag. Ik wilip atuk ambeg ino Simson inowen Allah fam ele ine roho sembahyang irisi ulug ”Ine roho Sembahyang Uruk Ambeg” suwalfahon ino ketiya oho o Lehi wereg.

²⁰Israel inap arimano Filistin inap enepma weregma Simson inowen Israel inap unubam alem werehon hale feruk lit let eneptukmen eneg mo likin fuman 20 atfag.