Read Angguruk Yali HAKIM-HAKIM 16 Bible Online

HAKIM-HAKIM 16 - Angguruk Yali bible

HAKIM-HAKIM 16

¹Misihim Simson ino Filistin inap inibam o Gaza libareg hiyap yaying turukon misig yet hibareg ambiyeg nohul ulug ambeg libag.

²Larukmu aben yet hibareg Gaza inap unubam, ”Simson waha,” ulug hiyag isibag. Hiyag isibagma at wereg ambeg walinggoho sap turuk lit elehet o pumbuk walinggoho ohowon sokma oho sap turuk latfag angge famen hup atfagma iren, ”Hubanggo senebul fug, likiya sakan turuk halug senebuhukteg wabuhuk,” peruk lit nungge-nungge tuk fug angge weregman

³Simson ino hup humanoho nohoruk ambehen in atfareg elehet o walinggoho ohowon sok ino hembiret uwag fima-fima pilabehonet sa roho umaloma walug tom o Hebron lema fil werehon unggulmu embelug libag.

⁴Welatfareg Simson ino hiyap misig Sorek tonggoma welatfahon unuk te Delila indi hibag.

⁵Indi hibagma Filistin inap onowesi suwon fuwaben itano hiyap ino ambeg libareg, ”Hele fano roho uruk lit nungge fam hine reg lahen ulug hinog og hamihinteg ari roho senebuhupteg inggik hele wabuhupmu ine eleg aruhu ulug hiyag nisahun. Hiyag nisahunmu uang perak teng-teng angge 1.100 nit wal tanehen og humuhuk,” ibag.

⁶Ibagma Delila inowen Simson fam kapal haruk lit, ”Nungge famen hine anggolo reg lahen? Nungge fam ninggik hele wat naplepma nine eleg alep ulug hiyag nimin,” ibag.

⁷Ibagma Simsonen te, ”Sehen inggila sabiren ket uruson lilog teg elehon fam wat naplepma nine eleg toho ap winon hag toho welale,” ibag.

⁸Ari ibagma Filistin inap onowesi suwon arimanowen sehen inggila sabiren keron lilog teg elehon walug watfareg Delila og itfag. Og itfagma Filistin inap at ibam hiraho lit sap turukmu hiyap inowen Simson nohorukmu inggik hele watfag. Hele watfareg, ”Simson, Filistin inap sen habuk oho wahasa,” ibagma Simson inowen sehen inggila itano hekel indoken narukmu kong-kong laruk hag toho og heheg hik isibag. Hik isibagma at ine reg latfahon alem Filistin inap enepeleg teg latfag.

¹⁰Welatfagma Delila inowen Simson fam te, ”An nele ying naptuk lit hele si hiyag nitikin. Nungge fam ninggik hele wat nabuk teg ulug ketiya tem toho hiyag nitmihin,” ibag.

¹¹Ibagma, ”Hele keron aben ililtusa fuhon fam ninggik wat naplepma nine eleg toho ap winon hag toho welale,” ibag.

¹²Ibagma Delila inowen hele keron wibareg Filistin inap at ibam hiraho lit weregma Simson inggik hele watfareg, ”Simson, Filistin inap sen habuk oho wahasa,” ibagma Simson ino hele ino hekel suwaleg miningon hag toho og heheg hik isibag.

¹³Hik isibagma Delila inowen te, ”Hele si ane eneg hiyag nutuk lit nele ying naptuk lahen. Nungge fam ninggik hele wat nabuk teg ulug ketiya tem toho hiyag nitmihin,” ibag. Ibagma, ”Noruk suwalehon sabiren itano welenteg sum haren uruk lahenon men ahandip telenteg atogma e fam ilili felenma ap winon hag toho welalereg nine eleg alep,” ibag.

¹⁴Ari ibagma hiyap inowen, ”Niraham tiya nohik watmihin,” ibagma nohik watfagma oruk suwalehon sabiren itano wibareg sum men ahandip tibareg atogma e fam ilili fibareg, ”Simson, Filistin inap sen habuk oho wahasa,” ibag. Ibagma in atfareg oruk sum men ahandip toho e fam ililohon ino lisoho lol tibag.

¹⁵Lol tibagma hiyap inowen, ”Nindi hasug lahi uruk lahen angge famen halukema welahi fug. Hinahanam hele si ane hiyag nutuk lit nele ying naptuk latikin. Nungge fam hine anggolo reg lahenon fuki roho hiyag nitikin fug,” ibag.

¹⁶Ibareg likiya hupmu hinog waruk lit heng turuk latfagma nele ying naptuken war am hag toho welahi pibareg

¹⁷indimu hirako forohowon obog toho hiyag utuk latfag. Hiyag utuk lit, ”Indag naptisi sambilen an Allah anggengge nazir wereg lit At fam sali umbuhuwon pisan isa fug angge welaruhu ulug Allah fahet numbahibagma indam oho noruk fili fam tot kong napfag fug. Noruk kong naplepma nine elehen ap winon hag toho welale,” ulug hiyag itfag.

¹⁸Hiyag itfagma Delila inowen indimu hirako forohowon obog toho hiyag nerehek pibareg Filistin inap onowesi suwon wamag ulug wol eneptuk lit, ”Indimu hirako forohowon hiyag nerehekma we misihim tu watlihip,” ibagma uang anggolo arimano walug watfag.

¹⁹Watfagma hiyap inowen Simson fam, ”Niraham tiya nohik watmihin,” ibagma nohik watfagma hiyap inowen te ap eke fam, ”Oruk kong tibisin,” ulug hiyag itfagma oruk suwalehon sabiren itano kong tibisibag. Hiyap inowen ari roho turukmu Simson ino ine eleg latfag.

²⁰Eleg latfagma hiyap inowen, ”Simson, Filistin inap sen habuk oho wahasa,” ibagma in atfareg tam wilip atikik hag toho wilip atmin pibag. NINIKNI Allahn imbisibag ane apelehen yoho oho wilip atmin pibag angge famen

²¹Filistin inaben senetfareg il piren hililoho hik isibareg o Gaza hondoholug libag. Libareg hele tembaga fam wirihon ine anggolowon piren fam ilili fisibareg penjara fam kilabe fisibareg roti anggen lilibug turuk laruhun ulug hiyag itfag.

²²Welatfareg oruk kong tibisibahon nin wilip atuk latfag.

²³Welatfagma Filistin inap onowesi suwon palu atfareg tu Allah hag toho wereg ulug wel turuk latfahon Dagon wam anggolo isag umuk oho yunggultuk latfag. Yunggultuk lit, ”Ninikni Dagon inowen Simson seli roho welaheyon ino nininggikmu og nisarisi,” ulug wel turuk latfag.

²⁴Uruk latfareg inindi enehiyeg toho wereg lit, ”Simsonen nenehiyehap nenepmisiyen hondohik aliyek,” ibagma penjara hele waroho kilaptuk ambehen hondoholug watfagma inda yatuk latfareg, ”Uwag pulmu pilabehon piren itano honggolegma unduhuk lamin,” ulug hiyag itfag. Simson ino uwag piren itano pulmu unduhukmu yet hibareg inikni Dagon ino wel turuk lit, ”Simson nit men seli roho werehon inowen ninibam siyahap turuk lit nonori anggolo unusuruk latisiyon ino nunumba Dagon inowen nininggikmu og nisarisi,” ulug yunggultuk latfag.

²⁶Yunggultuk latfagma Simson inowen malik inggik lisulug laruk latfahon ino fam, ”O aru uwag fako senetminteg timi roho in atminen ninggik obog niyimin,” ibagma obog isibag.

²⁷O at hondoholug libag ibam ino ap hiyap anggolo keleg toho wereg lit hiyap ap teng-teng angge 3.000 hinawimu heriyegma Filistin inap onowesi suwon fuwaben itano oho wereg lit Simsonen enehiyehap eneptukmu kilaboho latfag.

²⁸Kilaboho latfagma Simson inowen sembahyang uruk lit, ”NIKNI suwon Allah, an nil piren hililoho hik isaruson fahet Filistin inap unusiminen we yoho let naptuk lit nineyap nabin,” ibag.

²⁹Ibareg uwag pulmu pilabeg latfahon misig inggik hareyon fam seneg lit misig inggik pikiron fam seneg latfareg,

³⁰”Filistin inap aruma men ambiyeg war amulen,” ibareg uwag piren itano ine roho miyal isibagma o ino tukum turuk lit ap obog toho Filistin inap onowesi suwon men hondo enepfagma ap anggolo war atfag. At oho war atuk lit unusibahon anggolo unusibag. Oluk wereg lit tam unusibahon tor angge unusibag.

³¹War atfagma Simson owesi men otsi men obog toho watfareg ebe wareg angge wak libareg ikni Manoah salfag ambeg o Zora men Estaol men honggolegma sale fisibag. Simson inowen Israel inap fet enesugmen eneg mo ilig am wirig am turukmu likin fuman 20 atfag.