Read Angguruk Yali HAKIM-HAKIM 17 Bible Online

HAKIM-HAKIM 17 - Angguruk Yali bible

HAKIM-HAKIM 17

¹Tom Efram fam ap eke unuk Mikha welatfag.

²Mikha inowen isinga fam ele uruk lit, ”Uang perak 1.100 haren tohon longgo irisimu aben wehesa ulug an holegman haren huluwap tirikin ahun ino an tu welahi,” ibareg, ”Uang anden hirag tarikikon ino tu,” ibagma isingan, ”Namloho, haren wehek ulug napeleg teg lit huluwap haptikik angge famen ketiya noluk ahama NINIKNI Allahn indi hasug lamag ulug heng uruk lahi,” ibag.

³Ibagma amloho inowen uang hilibahon ino hebeloho isinga og itfag. Og itfagma hiyap inowen ele uruk lit, ”Uang aru NINIKNI Allah fahet emberuk lahi. Uang emberuk lahiyon aru haren wamihinteg Allahn hat indi hasug laruhuwen tu Allah hag toho wereg ulug wel turuk angge eke e fam wiri fuhunteg umbagpag turuk angge fam hililip tebesuhunen ketiya nin hebeloho og hutuk lahi,” ibag.

⁴Ari ibag angge famen amloho ino inggaliyen uang ino wibag fugmu isingan uang perak arimano minggiroho winon 200 oko umbagpag turuk angge emas fam laltuk ahun og itfagma tu Allah hag toho wereg ulug wel turuk angge eke e fam wiri fibareg umbagpag turuk angge fam hililip tibibag. Wel turuk angge witfahon ino Mikha ibam olma unduhuk fibag.

⁵Unduhuk feruk lit Mikha inowen Allah wel turuk ambeg ulug ibam undama hili eke witfag. Witfareg sum fanowon imam inaben wan turuk asum eke yihik felug sabalhe oho wiri fibag. Wiri fibareg amloho eke usangge aru foroho laruhun ulug imam unduhuk fibag.

⁶Ari tibag li ap suwon raja Israel inap fet enesuhon arimano uwan lahuk fugmu ap obog toho inindimuwen tila peruk ane eneg turuk latfag.

⁷Ari turukmu Lewi ahun kabiniyon eke ap pohon hag toho o Betlehem Yehuda kinangma welatfag.

⁸Ap ino o Betlehemen wilip atfareg laruk lit an ap pohon hag toho fano welaruhuk ambeg yami ril lamin ulug hun Mikha ibam tom Efraim fam weregma libag.

⁹Libagma Mikha inowen, ”Hat keman wahen?” ulug kapal hibagma ap inowen, ”An Lewi nahun o Betlehem welatikik ambehen wilip atikikteg ap pohon hag toho welaruhuk ambeg yami ril laruk lit wahi,” ibag.

¹⁰Ibagma Mikha inowen at ubam ele uruk lit, ”Anden wel turuk lahi angge hinggikmu embeminmu hat nit ninikni hag toho wereg lit komo neneptuk laruhunen nit men welamuhuk. Welamuhukmu mo misig-misig larukmu uang perak numen men suburu men sum wan turuk laruhunon men anden og hutuk laruhuk,” ulug hiyag itfag.

¹¹Hiyag itfag ane ino fahet Lewi ahun inowen fano pibagma Mikha inowen ap ino anden wel turuk lahi angge haren foroho laruhun ulug imam unduhuk fibag. Unduhuk fibagma ap kabiniyon ino Mikha men wereg lit amloho yuhon hag toho welatfag.

¹³Weregma Mikha inowen ele uruk lit, ”Lewi ahun ekeyen anden wel turuk lahi angge forohowon fahet NINIKNI Allahn fano ane nubam turuk laruhu ulug ketiya an nindimu noluk aha,” ibag.