Read Angguruk Yali HAKIM-HAKIM 18 Bible Online

HAKIM-HAKIM 18 - Angguruk Yali bible

HAKIM-HAKIM 18

¹Ari turuk latfag li ap suwon raja Israel inap fet enesuhon arimano uwan lahuk fugmu Dan inap arimanowen yug toho welamuhuk ambeg ulug yami rik laruk latfag. Atamtam Israel inap ununggul unuk obog toho yug toho welamuhup ambeg ulug kinang wal taneg hiyag isaruk lit Dan inap uwan hiyag isibag fug.

²Hiyag isibag fugmu Dan inaben it sehelimuwon enehako roho turukon o Zora inap men Estaol inap men enebe fuwaben hiyag isaruk lit, ”Kinang aru aluwat ha lalihip,” ulug mon enepfag. Mon enepfagma ap fuwaben itano tom Efraim fam lahibareg o hup ahama nohul ulug Mikha ibam libag.

³Mikha ibam horogma laruk lit hol harukmen Lewi ahun kabiniyon inowen ele urukmu hol hibareg ap pohonen ele ehek ulug onoluk atfagma Dan inap fuwaben itano ambeg libareg enele ubam uruk lit, ”Nare, ap san hat hondog haplug tuma waharisi? Nungge ane tuma turuk lahen?” ulug kapal hibag.

⁴Kapal hibagma Lewi ahun inowen, ”Mikha inowen anden wel turuk lahi angge haren foroho laruhunmu onggo og hutuk laruhuk ulug imam in naptisimu welahi,” ulug hiyag isibag.

⁵Hiyag isibagma iren at ubam enele uruk lit, ”Haren Allah amingmingangge welahi ehen angge re nit lahuk ambehen tuhuk peruk laheyon hikir aruhu ano ulug haren Allah fam kapal hamihinon hiyag nisimin,” ulug hiyag itfag.

⁶Hiyag itfagma imam inowen, ”NINIKNI Allahn hit lahuk peruk lahebon fahet fano peruken hinindi fano roho lalihip!” ulug hiyag isibag.

⁷Hiyag isibagma ap fuwaben itano o Lais libag. Libareg o Lais inap unubabut ke roho wereg ulug yet isarukmen o Sidon inap enengginang horog toho wereg eleg angge famen Sidon inaben turuk ane hikit toho turukmu yet isibag. It Lais inap arimano enemumu wereg lit alem eke hag eke hag unubam atuk elehen inindi yuwag toho weregma mun angge man angge enesehet tohon ininggikmu wereg latfag.

⁸Ari roho weregma yet isibareg onori welatfag ambeg o Zora men Estaol men suhuloho watfag. Watfagma onoriyen it unubam enele uruk lit, ”Hit larikip ambehen yet haruk latikip ane hiyag nesemek,” ibag.

⁹Ibagma iren hebeloho hiyag isaruk lit, ”Nit larukuk ambeg fano anggolo weregma yet harukukteg wahe. Ketiya nit men wilip amulteg ap arimano men tog aptuk lit kinang ino ilmig tahuken maniyek. Hit henebe sohu roho welam fug! Musun tuk fug angge ketiya folo-folo lulen maniyek!

¹⁰Hit o Lais ino lahupteg yet hahupmu kinang ino fuma-fuma hiyalegma mun angge man angge aben hilala perukon anggolo werehen ap arimano inindi yuwag toho weregma yet isahup. Kinang ino Allahn nit nininggikmu umbuhuk peruk ane nonoluk ahama hiyag hesehe,” ibag.

¹¹Ari ibareg ununggul unuk Dan inap teng falfalik fuman 600 o pumbuk Zora men Estaol men embeselug o Lais ilmig tahuk ulug laruk lit

¹²Yehuda kinangma libareg o Kiryat-Yearim hubula fil o sabo wiroho welatfag. O ino unuk O Sabo Dan Inaben Tohon suwalfahon ketiya oho wereg.

¹³O inowen wilip atfareg hun Mikha ibam tom Efraim fam weregma libag.

¹⁴Libareg tam o Lais ino aluwat ha libahon fuwaben itanowen onori unubam enele uruk lit, ”O aruma tu Allah hag toho wereg ulug e fam wirihon umbagpag turuk angge fam hililip teberuson men sum fanowon imam inaben wan turuk angge men sabalhe men wereg angge re honoluk toho! Hiren usangge aruma fam tilihibon fano wenggel homok!” ulug hiyag isibag.

¹⁵Hiyag isibareg Lewi ahun kabiniyon Mikha ibam ino weregma libareg, ”Nare, wa,” ulug hi ribag.

¹⁶Hi ribagma ap ino o inowen wilip atfareg Dan inap sehen senehon teng-teng angge 600 men o ino sok iraham unduhukmu

¹⁷tam o Lais aluwat ha libahon ap fuwaben itanowen usangge ino men sum fanowon men sabalhe winon arimano men nit hulul ulug it winon pisan isalug o ino kibag.

¹⁸O ino kurukmu imam inowen, ”Nungge tul ulug kuruk lahep?” ulug kapal isibag.

¹⁹Kapal isibagma iren at ubam, ”Hele imbisin! Hat nit ninikni wereg lit nunubahet imam welaruhunen nit men lul. Hat ap misig eneg fahet imam welaruhunon ari fano ano, Dan ninap nenebe anggolo welaheyon nunubahet imam welaruhunon ari fano ano, haren wenggel himin,” ulug hiyag itfag.

²⁰Ari ulug hiyag itfagma imam ino indimu ahiyeg hibareg usangge ino men sum fanowon men sabalhe winon olman forohowon arimano wibareg Dan inap men ambiyeg libag.

²¹Laruk lit unumalikisi men enembohom fano-fano angge unumaloma ha roho walug larukon men onolohotma laruk latfag.

²²It arimano Mikha ibam ino embeselug tot yat toho larukmu itano Mikha inowen at ori wol enepfareg Dan inaben wibag angge taluk enebul ulug mug eneplug libag.

²³Mug eneplug laruk lit Dan inap unubam enele hi roho, ”Unduhuk lamiyek!” ibagma Dan inap arimano enembol fil hebeloho Mikha ubam, ”Nungge pehenteg hori menen sehen seneko mug neneplug wahep?” ulug kapal hibag. Kapal hibagma Mikha inowen ele uruk lit,

²⁴”Usangge anden tohonet foroho ahunet hiren hilalug lahepma an ninggikmu eleg aha angge famen nungge fahet ari hag toho an umung niyaruk lahep?” ibag.

²⁵Ibagma Dan inaben Mikha fam, ”Ap aruma inindi onolokonen hat huhe maliket hunusulusama war ahep ha nowen, hele imbisin,” ulug hiyag itfag.

²⁶Hiyag itfagma Mikha inowen ap aruma inine roho turuken anden apmayap enebuk fug teg lahi ulug oluk atfareg ibam suhuloho larukmu Dan inap arimano oho lul pibag fil libag.

²⁷Usangge hun Mikha inowen witfahon men imam aren lahapfahon ino men walug laruk lit Dan inap arimano o Lais libag. Lais inap arimano inindi yuwag toho weregman Dan inaben unusik waharuk lit inibam Lais ino harep pisako olunap tibisibag.

²⁸Lais inap arimano o pumbuk Sidon yatma o Bet-Rehob tonggoma enemumu weregma ap misihen oho ili og enebik watfag fugmu Dan inap arimanowen inibam o Lais ino mondabi eleha fisibag. Eleha fisibag ambeg ino Dan inaben o pumbuk keron eke wiri fibareg yug toho welatfag.

²⁹O pumbuk keron witfahon ino unumba Israel amloho Dan unuk salikap toho o Dan suwalfag.

³⁰Ari tibareg Dan inaben usangge iren yoholiyangge hilibahon ino o Dan inowen unduhuk feruk lit Musa umbusag Yonatan hun Gersom amloho ino Allah amingmingangge imam lahapfag. Lahapfagma Yonatanen ondohowonen ondohowon arimano oho Dan inap fahet imam weregman eneg o ino welatfag inap arimano Asyur inaben ininggik hele waroho o Asyur kinangma imbisik libag.

³¹Ari roho turuk lit Dan inap arimanowen usangge hun Mikhan witfahon ino wel turuk lit weregman eneg Allah wel turuk ibam o Silo witfahon ino ap seliyonen halog tibisibagma usangge ino wel turuk latfag ane imbisibag.