Read Angguruk Yali HAKIM-HAKIM 19 Bible Online

HAKIM-HAKIM 19 - Angguruk Yali bible

HAKIM-HAKIM 19

¹Israel inap onowesi suwon raja uwan lahuk fugmu Lewi ahun eke pohon hag toho tom Efraim ambol fil welatfag. At ino uhe og talug latfag angge famen o Betlehem-Yehuda hiyap eke uheyap tibag.

²Hiyap uheyap tibahon inowen ahun pet tibareg embeselug ikni ibam suhuloho o Betlehem libag. Libareg ikni men weregman pikalem uhan libag.

³Libagma ahun inowen hiyap ino an nambeg suhuloho waruhuwen nele fano roho ubam uhuk ulug ikni ibam weregma libag. Amingmingangge eke men wam keledai piren men laruk lit hiyap ino ambeg libag. Libagma hiyap tuhumon inowen an nikni ibam kik watmihin ulug hiyag itfagma ibam kurukmu ikniyen yet hibareg nahiyeg toho hi rimin ulug olohotma libag.

⁴Libareg iyamalen nit men tot welamuhuken lamihin fug ulug hiyag itfareg suburu men ik men ambiyeg narukmen eneg hup hinahanam atfag.

⁵Hup hinahanam atfagma likiyanet in atfareg Lewi ahun ino nibam lamin ulug turukmu iyamalen ubam ele uruk lit, ”Hinine roho lalihiben suburu nalug lalihip,” ulug hiyag itfag.

⁶Hiyag itfagma Lewi ahun ino iyamal men suburu ambiyeg naruk latfag. Naruk lit iyamalen, ”Hindi hahiyeg toho nit men hup misig eke nohul,” ibag.

⁷Ari ibagma Lewi ahun inowen ari ehen angge famen lamin ibagma iyamalen ele ine roho nohul uruken hup ino oho at ibam nohibag.

⁸Hup uhanam atfagma likiyanet Lewi ahun ino ninibam lul ulug in atukmu iyamalen ubam ele uruk lit, ”Hat nit men suburu naruk lit weregman o hup atmisi,” ulug hiyag itfareg it pirenen ambiyeg suburu naruk latfag.

⁹Suburu nibareg Lewi ahun ino nuhe men namingmingangge men lul ulug in atukmu iyamalen ubam ele uruk lit, ”O hup atuk lit mo ubuk uruken hindi hahiyeg toho wereg lit hup tu oho an nibam nohulteg sono likiya hat hibam lahup,” ulug hiyag itfag.

¹⁰Hiyag itfagma Lewi ahun ino hat men nohuk fug angge we pikit lul ulug libag. Laruk lit uhe men amingmingangge men wam keledai piren hur atuk angge enemberimu pug toho imbibahon men o Yebus unuk eke Yerusalem suwaleg ambeg horogma libag.

¹¹Larukmen o hup atukmu amingmingangge inowen ikni fam ele uruk lit, ”O Yebus tu kulteg nohul,” ulug hiyag itfag.

¹²Hiyag itfagma ikniyen hebeloho ubam uruk lit, ”Ari ehen angge famen nit o pumbuk ap amuwonen tohon tu fam nohuk fug angge we pikit o Gibea ano Rama ano nohik lul,” ulug hiyag itfag.

¹⁴Ari ulug hiyag itfareg kalemma larukmen mo ubuk ibagma Benyamin kinangma o Gibea horogma libag.

¹⁵Libareg o pumbukmu kibagma ap misihen oho nit ninibam nohul ulug hondoko kilap enepfag fugmu silimu heriyeg latfag.

¹⁶Heriyeg lit weregman o hup atfagma ap sabalon eke yabukmuwen suhuloho waharuk lit enembeg watfag. Ap sabalon ino tom Efraim ahun famen Benyamin inap o Gibea welatfahon sehelimu pohon hag toho welatfag.

¹⁷Ap ino watfareg Lewi ahun ino silimu heriyegma yet hibareg at ubam ele uruk lit, ”Hat te keman wahenteg kema lamin peruk lahen?” ulug kapal hibag.

¹⁸Kapal hibagma Lewi ahun inowen, ”An tom Efraim ambol fil wereg nahun famen o Yehuda kinangma o Betlehem larikikteg suhuloho nibam lahuk ulug larukmen o hup ahama ap misihen oho an men nohul ulug hondoko kilap nenebehek fugmu silimu tu heriyeg lahe.

¹⁹Niren nenembohom keledai fahet hoholangge men suburu men walug waharuk lit an nuhe namingmingangge men nunubahet roti men ik anggur ahaluwe men walug wahe angge famen nit nohoruk ambeg eneg eleg,” ulug hiyag itfag.

²⁰Hiyag itfagma ap sabalon inowen Lewi ahun ubam ele uruk lit, ”Hakol ha fug! Hit sili tu fam noholihip fug. Hit an nibam nohorukmu henesehet tohon anden hit og hisamin,” ulug hiyag isibag.

²¹Hiyag isibareg ibam hondoko kilap enepfareg Lewi ahun ambohom keledai piren itano suburu nawag ulug og isibag. Og isibagma it hinahan itano unuyug ik umatfareg suburu men ik men nibag.

²²Inindi enehiyeg toho suburu narukmen o Gibea inap onolok ane turukon arimano o ino walinggoho in arik watfareg sok kik turuk lit ap sabalon ino fam, ”Ap hat hambeg wahayon ino niren yarohuk fulen wilip nisa ma,” ibag.

²³Ari ibagma ap sabalon ino ibamen wilip atfareg it unubam ele uruk lit, ”Nori, siyag ane hiren tul ehebon ari tuk fug! Ap ino an nibam hondoko kilabihi angge re hiren siyahap tilihip fug.

²⁴An nahaloho ap eke men nohorisi fuhon men ap wahayon uhe men wilip hisaminmu hinindi henehiyeg toho yarog eneplihip. We ap ino eneg siyahap tilihip fug,” ulug hiyag isibag.

²⁵Hiyag isarukmu o Gibea inap arimanowen ele abilit turukmen Lewi ahun inowen uhe ino miyaloho wilip isa watfag. Wilip isa watfagma Gibea inap arimanowen hiyap ino hup ino hunduko yarohorukmen eneg o sakan tik oho reg latfag. O sakan tibagma hiyap ino fam lamihin ulug hiyag itfag.

²⁶Hiyag itfagma hiyap ino nahun ambeg lamin ulug larukmen ine elehen ap sabalon ibam ino sok iraham fuk toho ying atfag. Kinangma yinggig lit weregman mo lahik watfag.

²⁷Mo lahik waharukmu hiyap ino ahun nohoruk ambehen in atfareg sok husoho nibam lamin ulug wilip arik oho lit yet harukmen uhe inggik putaroho sokolma yinggigmu yet hibag.

²⁸Yet haruk lit hiyap ino fam, ”Nibam lulen in amin,” ulug hiyag itfag angge famen hiyap inowen hebeloho ele ibag fug. Ele ibag fugmu hiyap wareg angge ino leko wam keledai emberimu imbik lahibareg ibam libag.

²⁹Libareg karog oko uhe wareg angge pal-pal lahapfagma nisanggowen atfag. Nisanggowen atfagma, ”Paleg angge aruma Israel pumbuk obog toho og isa lalihip,” ulug ap mon enepfagma og isil libag.

³⁰Og isil larukmu yet hibahon obog tohowen enele uruk lit, ”Indam Israel inap o Mesiren wilip atug libag liyen tulug olok ane ari hahon ap ekeyen turukmu misihim oho yet harukuk fureg ketiya eneg yet haruk lahe. Alem ari fahet fuki roho wenggel halug nanggintul ulug nenele sahaltulen maniyek,” ibag.