Read Angguruk Yali HAKIM-HAKIM 2 Bible Online

HAKIM-HAKIM 2 - Angguruk Yali bible

HAKIM-HAKIM 2

¹NINIKNI Allah ot malaikat ino o Gilgalen o Bokhim lahibareg Israel inap unubam ele uruk lit, ”Anden hit o Mesiren hondog heneplug wilip atik iyareg kinang Anden og hisahuk ulug hiyag hisiyahon ino fam hondoko hunumbahik waharik iyareg Anden hit hunubam hiyag hisaruk lit, ’An hit Hinikni roho welaruhuk,’ ulug sali imbiyahon ino napeleg aruhu fug.

²Kinang Kanaan yug inap men mangno roho welamuhuk ulug sali umbuk fug angge iren hubu lahaptuk ambeg arimano halog toho siyaha fusuhup ulug hiyag hisarikik angge famen hiren holtikip fug. Nungge fahet An nele sobir isaruk lahep?

³Ari fahet Anden iminon tu holeg lamek: Kinang Kanaan yug inap hit honolohotman yanggal enebuhuk fugmu hit hiniraham wereg lit seli roho welamuhup. Iren hinindi waruk lamuhupmu iren tu Allah hag toho wereg ulug wel eneptuk angge hiren oho wel eneptuk lamuhup halug fobik siyag amuhup,” ulug hiyag isibag.

⁴Hiyag isibagma holfareg Israel inap obog toho enele hum toho uba yatuk latfag.

⁵Uba yatuk lit Israel inaben NINIKNI Allah fahet wam waroho hubu lahapfag ambeg ino unuk te Bokhim[2] suwalfag.

⁶Welatfagma Yosua inowen Israel inap hinibam lalihip ulug hiyag isibagma kinang welamuhuk ambeg ulug wal-wal senerik libag.

⁷Yosua oluk weregma Israel inaben NINIKNI Allah fam eneg wenggel haruk latfag. Yosua war atfagma ori winon NINIKNI Allahn Israel inap unubam fano ane turukmu haruk latfag inap suwon-suwon arimano onoluk welatfag li oho Israel inap Allah apma eneg welatfag.

⁸Welatfagma hun Nun amloho Yosua Allah amingmingangge ino indag tibahon sali teng uhan 110 atfagma war atfag.

⁹War atfagma kinang inggarehen tohon o Timnat-Serah tom Efraim fam punu Gaas iliko fil kinangma sale fisibag.

¹⁰Yosua ori winon oho war atfareg unumbasi men mangno atfagma unumalikisi indag enepfahon arimanowen NINIKNI Allahn Israel inap unubam turuk latfag ane enepeleg toho wereg lit Allah fam wenggel ha fug angge welatfag.

¹¹Wenggel ha fug angge NINIKNI Allah olohotman siyag ane eneg turuk lit Allah it o Mesiren hondog eneplug wilip atfahon ino imbisibareg ap winon it walinggoho welatfag inaben tu Allah hag toho wereg ulug wel eneptuk angge ununuk Baal men Astoret men iren oho wel eneptuk latfag. Ari roho turuk lit NINIKNI Allah indi siyahap turukmu Israel inap fahet olok hibareg huhulangge hilaruk inap ininggikmu embeseruk lit ap seliyon it walinggoho welatfahon Israel inap unusukag ulug enembeg mon enepfagma iren hebeloho unusuk fug teg latfag.

¹⁵Israel inaben hebeloho unusuhuk ulug turukmen NINIKNI Allahn Israel inap siyahap enebuhuk pibareg tam ibag ane hikit toho apmayap eneptuk latfag. Ari roho hundig-hundig apmayap eneptukmen eneg asengseng haruk latfag.

¹⁶Asengseng harukmu NINIKNI Allahn ap fet enesuhon hakim in eneptukmu iren Israel inap arimano huhulangge hilaruk inap ininggikmuwen windat eneptuk latfag angge famen

¹⁷Israel inaben fet enesug inap Allahn in eneptuk latfahon enele oho holtuk latfag fug. Holuk fug angge INIKNI Allah embeselug wel eneptuk angge ap winonen tohon iren oho wel eneptuk latfag. Ari roho turuk lit unumbasiyen NINIKNI Allah ele holtuk lit welatfag ane enembong se roho imbisibareg siyag ane eneg turuk latfag.

¹⁸Ap seliyonen Israel inap enele ying eneptukmu ya nga urukon NINIKNI Allahn hol haruk lit nindiyen ulug ap fet enesuhon hakim in eneptuk latfareg let eneptukmu iren Israel inap ap seliyon ininggikmuwen taluk eneptuk latfag.

¹⁹Fet enesug inap arimano war atukmu Israel inaben wel eneptuk angge enemuwon wel eneptuk latfag. Ari roho turuk lit iniknisi we tot fano roho welatfag angge famen iren unubabut haluk fug angge subangge siyag ane eneg turuk latfag.

²⁰Israel inaben ari roho eneg turukmu NINIKNI Allahn it fahet olok haruk lit, ”Anden Israel inap unumbasi unubam sali imbiyahon ino iren pisan isaruk lit An nele sobir isaruken

²¹kinang Kanaan yug inap Yosuan yanggal eneptisi fugmu werehon Anden misig oho yanggal enebuhuk fug.

²²Yanggal enebuhuk fugmu Israel inap arimano Kanaan yug inap enesehelimu wereg lit unumbasiyen Anden hiyag isiyag ane hikit toho turuk latfag hag toho iren oho turuk lamuhup ano eleg ano ulug Israel inap wal isahuk,” peruk latfag.

²³NINIKNI Allahn Kanaan yug inap arimano wilip amuhup fug pibagma Yosuan yanggal enebuk fug teg latfag hag toho at war atfagma Israel inap fobik welatfahonen oho yanggal enepfag fug.