Read Angguruk Yali HAKIM-HAKIM 20 Bible Online

HAKIM-HAKIM 20 - Angguruk Yali bible

HAKIM-HAKIM 20

¹Ari ibareg Israel inap obog toho o Gibean teko larisiyon fahet NINIKNI Allah olohotman nenele sahaltul ulug o Dan famen tulug Bersyeba fam enebe misig atfareg o Mizpa luhal arik watfag. Waharuk lit o Gilead kinangma welatfahon arimano oho watfag.

²Watfahon arimano karog seneko enebe teng-teng angge 400.000 waharuk lit it ununggul unuk wal-wal welatfahon onowesi men o Mizpa luhal arik watfag.

³Israel inap obog toho o Mizpa luhal arik waharusa urukmu Benyamin inaben hol hibag. Israel inap luhal arik watfahon arimanowen Lewi ahun uhe ware fisibahon ino fam, ”Ap arimanowen hit hunubam onolok toho turusa ane ari hiyag nisimin,” ulug hiyag itfag. Hiyag itfagma Lewi ahun inowen hiyag isaruk lit, ”An nuhe men nibam lahuk ulug kalemma laruk lit Benyamin inap inibam o Gibea nohul ulug o pumbukmu kurukuk.

⁴

⁵Kurukukmu o hup atisimu o Gibea inap arimanowen an nuwabul ulug o an welatikik ibam ino walinggoho in arik waharusa. Waharusareg an nuwatep angge famen an numbahalug nuhe eneg yarohorukmen eneg war atisi.

⁶War atisimu anden nuhe wareg angge ino warikikteg pal-pal lahaptikik. Lahaptikikteg Gibea inap arimanowen nit Israel ninap nenesehelimuwen mondabi siyag ane turusa angge re Israel inap obog toho onoluk amag ulug anden ap hiyag isaruk lit nuhe warehon paleg angge aruma Israel pumbuk obog toho og isa lalihip ulug mon enebik waharikik.

⁷Nori, ketiya hit Israel hinap obog toho tuma luhal arik wahepteg henele sahaltuk lit tilihip ane fahet kong toho embelihip,” ulug hiyag isibag.

⁸Hiyag isibagma Israel inap obog toho in atfareg enele misig ane uruk lit, ”Gibea inap arimanowen Israel ninap nenesehelimuwen mondabi onolok ane turusama niren ayeg waroho unusik lahuk. Niren it arimano siyahap enebuhukon uwanma nit ap misig oho suhuloho ninibam lahuk fug. Ari fahet nit minggiroho winonen ap arimano men tog aptukmu ap winon nit fahet suburu esetuk lamuhuben hiyag enebul. Hiyag enebul ulug ketiya nit ap obog toho minggiroho nenebe numen-numen palu amulteg enehangge hik tulmu ap numen-numen sehelimuwon misig-misig enehangge unubam atmisiyon arimanowen suburu nit fahet esetuk lamuhupmu nit winon Gibea inap arimano unusik laruk lamuhuk,” ibag.

⁹

¹⁰

¹¹Ari ibag ane hikit toho Israel inap arimano inindi misig atfareg misig ane eneg tul peruk lit o Gibea inap unusul ulug wilip atfag.

¹²Wilip atfareg Israel inap arimanowen ap mon eneptuk lit, ”Benyamin inap ununggul unuk obog toho unubam hiyag isa lalihibon tu: Hit sehelimuwen mondabi siyag ane eke teko larisimu

¹³ketiya Gibea inap unubabut onolokon arimano nit nininggikmu embelihip. Embelihipmu siyag ane nit Israel ninap nenesehelimuwen teko larisiyon ino eleg amag ulug Gibea inap arimano unusuhuk,” ulug hiyag isibag ane hikit toho Benyamin inap obog toho hiyag isa libag angge famen Benyamin inap arimanowen onori Israel inaben ibag ane ari holfag fug.

¹⁴Holfag fureg Benyamin inap pumbuk obog toho Israel inap men tog abul ulug o Gibea luhal arik watfag.

¹⁵O ino sambil luhal arik watfahon arimano winag isarukmen karog seneg latfahon enebe teng-teng angge 26.000 waharukmu nin sebe roho o Gibea inap tog inine roho aptukon teng pireneg fimahen 700 luhal arik watfag.

¹⁶Luhal arik watfahon arimano sehelimu ap ininggik hareyon fam tog inine roho abukon teng-teng angge 700 welatfag. It arimanowen helep anggen hik turuk angge fam hik turukmu wabul peruk angge ino hil tubuk fug angge waroho eneg laruk latfag.

¹⁷Israel inap karog senehon oho luhaloho weregma winag isarukmen enebe teng-teng angge 400.000 welatfag.

¹⁸Welatfareg Israel inap arimano o Betel libareg Allah fam enele uruk lit, ”Benyamin inap men tog abulen nununggul unuk keyon tam lul?” ulug kapal hibagma NINIKNI Allahn, ”Yehuda inap tam lalusa,” ulug hiyag isibag.

¹⁹Hiyag isibagma likiyanet Israel inap arimano in atfareg o Gibea pin kuhuk ulug o ino horogma o sabo wirik libareg welatfag.

²⁰Welatfareg Israel inap arimanowen Benyamin inap men tog abul ulug o Gibea aluke fil iraroho in arik libag.

²¹In arik libagma Benyamin inap arimano o Gibea inowen wilip atfareg o ino sambil eneg Israel inap teng-teng angge 22.000 pinggi unusibag.

²²Unusibagma Israel inap arimano NINIKNI Allah wel turuk ambeg o Betel libareg uba yatukmen eneg hup atfagma NINIKNI Allah fam enele uruk lit, ”Nonori Benyamin inap men tog abuhuken nin wilip amuhuk ano?” ulug kapal hibagma NINIKNI Allahn hebeloho hiyag isaruk lit, ”Tog abik lahup,” ibag. Ari ibagma Israel inap enembong se atfareg Benyamin inap men tog abul ulug tam in arik libag ambeg o ino sambil oho misigmu in arik libag.

²³

²⁴It iraroho unduhukmu yet isibareg

²⁵Benyamin inap arimano tam o Gibea inowen wilip atfag hag toho o ino sambil oho wilip atfareg Israel inap karog seneg latfahon teng-teng angge 18.000 pinggi unusibag.

²⁶Unusibagma Israel inap obog toho nin NINIKNI Allah wel turuk ambeg o Betel libareg suburu na fug angge hiyang wereg lit uba yatukmen eneg o hup atfagma NINIKNI Allah men mangno roho welamul ulug wam esetuk lit At fahet wam eke waroho hubu lahapfag.

²⁷Ari tibag li peti elma Allahn sali imbibag ane haharehon kilabeg angge o Betel weregma Harun umbusag Pinehas hun Eleazar amloho ino Allah amingmingangge imam wereg lit peti ino foroho latfag. Foroho lit weregma Israel inap arimanowen NINIKNI Allah fam enele uruk lit, ”Nonori Benyamin inap men tog abuhuken nin wilip amuhuk ano, tog umbusuhuk ano?” ulug kapal hibagma NINIKNI Allahn hebeloho hiyag isaruk lit, ”Anden o sono Benyamin inap arimano hit hininggikmu umbuhuken wilip amuhup,” ibag.

²⁸

²⁹Ari ibagma Israel inap arimano minggiroho winon Benyamin inap kahal enesug lamul ulug o Gibea ino walinggoho hirag arik libag.

³⁰Hirag arik libagma Israel inap winon tam o Gibea ino pin kul ulug in arik libag hag toho o hinahaneg sambil ino oho iraroho in arik libag.

³¹In arik libagma Benyamin inap o Gibean wilip atfareg tam Israel inap unusik libag hag toho o ino sambil oho unusil laruk lit inibam pumbuk embeselug we tot yat toho libag. We tot yat toho laruk lit anggenman oho kalem o Betel laruk keyen oho o Gibea laruk keyen oho Israel inap unusik libag. Israel inap unusik libahon arimano teng misigmen nubam hilag hinahan 30 unusibag.

³²Unusibareg Benyamin inap arimanowen enele uruk lit, ”Niren Israel inap aruma tam apmayap eneptukuk hag toho ketiya oho apmayap enebehe,” ibag. Ari ibag angge famen Israel inaben it-it enele uruk lit, ”Nit enekol inaben turuk hag toho turuk lit linggik-longgo ul halug Benyamin inap arimano mug neneplug waharuk lit o Gibea ino embeselug we tot yat toho anggenma laruk ke lalusareg nin hebeloho inibam o pumbukmu folo-folo kuk fug tehen unusik lulen maniyek,” ibag.

³³Ari ibag ane hikit toho Israel inap arimano linggik-longgo ibag. Linggik-longgo ibareg o Baal-Tamar horogma suhuloho in arik larukmu Israel inap minggiroho winon teng-teng angge 10.000 en enepfahon ap seliyon kahal enesug lit o Geba horogma hirako welatfag ambehen wilip atfag. Wilip atfareg o Gibea halog tul ulug larukmu yet isibareg Benyamin inap arimano nunusulusa puk fug angge nit palimu amul ulug Israel inap men inine roho tog aptuk latfag.

³⁴

³⁵Inine roho tog aptuk latfag angge famen NINIKNI Allahn Israel inap arimano let eneptukmu o ino sambil Israel inaben Benyamin inap teng-teng angge 25.100 unusibag.

³⁶Onori unusibagma yet isibareg Benyamin inap arimanowen mulangge nunusehesa ulug onoluk atfag. Unusibag ane ari re Israel inap arimanowen wenggel haruk lit nonori minggiroho winon hirahoman wilip amusareg o Gibea ino pin kulusan nit winon Benyamin inap onolohotman linggik-longgo uruk hag toho lul ibag ane roho libag.

³⁷Larukmu onori winon folo-folo hirahoman wilip atlug o Gibea pin halog toho kuruk lit ap obog toho unusibag.

³⁸Unusehe ane fahet nonori Israel ninap winon arimano onoluk amusan enehangge hubu lahabul ulug tam it unubam sali imbibag ane hikit toho o pumbuk ino harep pisako siyahap turukmu hubu muhultil laharuk latfag.

³⁹Ari turukmu Israel inap winon arimano linggik-longgo uruk hag toho libagma Benyamin inaben mug eneplug laruk lit ap teng misig unusibareg enele uruk lit, ”Niren Israel inap aruma tam apmayap eneptukuk hag toho yoho oho tik-tem toho apmayap enebehe,” ibag.

⁴⁰Ari hag toho enele uruk lit enembol fil hebeloho yet harukmen o Gibea ino famen hubu pohol fil laharukmu yet hibareg ninibam o pumbuk obog toho harep pisako siyaha fesehesa ulug onoluk atfag.

⁴¹Onoluk atfagma yet harukmen nin Israel inap winon it unusul ulug waharukmu yet isibareg Benyamin inap arimano enekolen inindi elek turuk lit siyag amul pibag.

⁴²Ari peruk lit Benyamin inap arimano Israel inap onorohole keyen lek fil linggik-longgo ul ulug larukmen Israel inap arimanowen mug eneplug larukmu Israel inap winon o Gibea pin kibahon arimano ke amu keyen waharuk lit Benyamin inap arimano elehet oko kilap enepfagma it pulmu wereg lit tog aptuk latfag.

⁴³Tog aptukmu Israel inap arimanowen Benyamin inap muko tan unusil yan unusil o Gibea yali fil libag.

⁴⁴Ari roho unusuruk lit Benyamin inap enehako roho tog aptuk latfahon ap teng-teng angge 18.000 unusibag.

⁴⁵Unusurukmu yet isibareg Benyamin inap winon arimano enekolen lek fil linggik-longgo ul ulug enembol fil hebeloho helep unuk Rimon fil kalemma larukmen Israel inaben mug eneplug laruk lit ap teng-teng angge 5.000 unusibareg koloweg wilip atfahon arimano nin mug eneplug laruk lit o Gideom horogman ap teng-teng angge 2.000 unusibag.

⁴⁶Benyamin inap enehako roho tog aptuk latfahon o ino sambil unusibahon obog toho ap teng-teng angge 25.000 war atfag.

⁴⁷It obog toho war atfagma Benyamin inap enekolen lek fil libahon sehelimuwon onoluk welatfahon teng falfalik fumahen 600 helep unuk Rimon iraham libareg lekma weregman eneg pikalem uhan libag.

⁴⁸Ari roho turukmu Israel inap arimano o Benyamin kinang atogman atogma laruk lit abet wamet mun angge man angge siyaha fisil laruk lit inibam o pumbuk obog toho harep pisako oluna fisibag.