Read Angguruk Yali HAKIM-HAKIM 3 Bible Online

HAKIM-HAKIM 3 - Angguruk Yali bible

HAKIM-HAKIM 3

¹Israel inap iniknisi tam welatfahon arimanowen Kanaan inap men tog aptuk ane onoluk teg latfag angge famen unumalikisi enepeleg teg latfag. Ir oho onoluk aruhu ulug NINIKNI Allahn Kanaan kinang famen o pumbuk minggiroho winon yanggal eneptuk latfag fug. NINIKNI Allahn Israel inap unumalikisiyen oho An nubam we tik-tem toho wenggel niyaruk lamuhup ano ulug wal isahuken Kanaan inap arimano it sehelimu fano welamag pibag.

³NINIKNI Allahn pibag ane hikit toho Filistin inap inibam pumbuk fuwaben men Kanaan inap ununggul unuk obog toho men Sidon inap men Hewi inap tom Libanon atogman atogma punu Baal-Hermon famen tulug o Hamat pumbuk yug toho welatfahon arimano oho Israel inap sehelimu welatfag.

⁴NINIKNI Allah indimuwen wenggel haruk lit An Israel inap INIKNI Allahn Musa feneyen ari-ari turuk lamuhup ulug it unumbasi fahet imbiyag ane ino iren oho seneg lamuhup ano ulug Kanaan inap feneyen wal isaruk laruhuk pibag.

⁵Ari pibag ane ino hikit toho Israel inap arimano Kanaan inap, Het inap, Amori inap, Feris inap, Hewi inap, Yebus inap enesehelimu welatfag.

⁶Ari roho wereg lit Israel inap eneholani men Kanaan inap eneholani men tikan toho og-og atuk lit Kanaan inaben wel eneptuk angge iren oho wel eneptuk latfag.

⁷Israel inaben INIKNI Allah fahet enepeleg atfareg Kanaan inap unumbasi Baal men Asyera men unubam iren oho sembahyang uruk lit NINIKNI Allah olohotman siyag ane eneg turuk latfag.

⁸Siyag ane turukmu NINIKNI Allahn olok hibareg Israel inap arimano Aram-Mesopotamia inap onowe suwon Kusyan-Risyataim inggikmu imbibagma at apma weregman eneg mo ilig am wirig am turukmu likinen libag.

⁹Mo likinen libagma Israel inaben NINIKNI Allah fam let nenebin ulug enele hi roho urukmu Israel inap windat enebuhu ulug NINIKNI Allahn Kenas amloho Kaleb ot Otniel ino unduhuk fibag.

¹⁰Unduhuk fibagma NINIKNI Allah ahime fanowon ino Otniel ubam atfagma Israel inap fet enesug lit alem unubam welatfahon haloho emberuk latfag. Mesopotamia inap onowe suwon Kusyan-Risyataim men tog aptukmen NINIKNI Allahn ap suwon ino otsi men Otniel inggikmu imbibagma apmayap enepfag.

¹¹Apmayap enepfagma Israel inap alem eke hag eke hag unubam am fug angge inindi yuwag toho weregman eneg mo ilig am wirig am turukmu teng misigmen nubam hilag nuwalen 40 atfag. Atfagma Kenas amloho Otniel ino war atfag.

¹²Otniel ino war atfagma Israel inaben nin hebeloho NINIKNI Allah olohotman siyag-siyag ane eneg turukmu NINIKNI Allahn Moab inap onowe suwon Eglon ino ineyap tibagma Israel inap enele ying eneptuk latfag.

¹³Eglon inowen Amon inap men Amalek inap men an nibil amuhup ulug wol enepfareg hondog eneplug wilip atfareg Israel inap apmayap eneptuk lit o Yerikho e palem wereg ambeg ino ilmig tik libag.

¹⁴Ilmig tik libagma Israel inap arimano Moab inap onowe Eglon apma weregman eneg mo ilig am wirig am turukmu num fumahen 18 atfag.

¹⁵Atfagma Israel inaben NINIKNI Allah ubam let nenebin ulug enele hi roho urukmu Israel inap windat enebuhu ulug NINIKNI Allahn Benyamin ahun Gera amloho Ehud ino unduhuk fibag. Ehud ino inggik hare filon eneg ine reg latfag. Moab inap onowe Eglon inowen Israel inap unubam hundig-hundig onggo og nirik waharuk lamuhup ulug hiyag isibag angge arimano Ehud inowen Eglon ambeg walug laruk latfag.

¹⁶Misihim sambil onggo walug larukon horog atfagma hun Ehud inowen karog horohon fuma-fuma ayeg umahowon eke witfareg sum wan teg latfahon undama alunggu pikit fil pug toho wan tibag.

¹⁷Karog ino wan tibareg onggo arimano Eglon ambeg walug libag. Eglon ino ebe fit taruk lit ahum hum teg latfag.

¹⁸Weregma Ehuren onggo arimano Eglon og irik libareg Ehuren otsi onggo paya roho walug libahon fam hinibam lalihip ulug hiyag isibareg ar oho it men ambiyeg walep angge famen

¹⁹usa ahalep o Gilgal inowen hutuk tibibahon iraham waharuk lit Ehud namu eneg nin hebeloho Eglon ambeg lamin pibareg otsi embeselug ap suwon ambeg watfareg at ubam ele uruk lit, ”Nikni, hat ap suwon, aben nenele hol nisahup tohon ulug anden hat hubam nele hirako hiyag hitminen nin wahi,” ibag. Ibagma Eglon inowen, ”Hele tot toho in,” urukmu itano amingmingangge obog toho wilip atfag.

²⁰Eglon ino amu hinawimu heriyegma Ehud ino at iraham libareg hiyag utuk lit, ”Allahn Eglon hiyag irik lamihin ulug hiyag nitisi ane holeg lamin,” ibag. Ibagma Eglon ino heriyeg latfag ambehen in atfag.

²¹In atukmu Ehud inowen karog alunggu pikit fil pug toho wan tibahon ino inggik hare filonen lisoho wibareg ap suwon ahummu holum kila fisibagma

²²karog ayehet ambowet seiyen hondo ribag. Hondo ribagma Ehud inowen karog ino lisoho wa fug angge sok hinawi ambol filen wilip atfag.

²³Wilip atuk lit Ehud inowen sok hinawi aluke fil werehon lare felug hili ambol filen wilip atfag.

²⁴Wilip atfagma Eglon amingmingangge arimano inikni ambeg kul ulug kurukmen sok ino lareg latfagma enele uruk lit, ”Miyema laha lit teg,” ibag.

²⁵Ari ibareg amingmingangge arimano sok husimisi ano ulug nangno rurukmen ap suwon inowen sok husibag fug. Husibag fugmu amingmingangge arimanowen sok husuruk angge wibareg sok husoho kim harukmen inikni wareg lit kinangma yinggigmu kim hibag.

²⁶Kim hibareg Ehud ino senetep angge famen it orog-orog ane turukmu itano at koloweg wilip atfag. Wilip atfareg usa ahalep hutuk tibibag keyen tom Efraim fam o Seira libag.

²⁷O Seira libareg Ehud inowen pinggong ele hum toho watfagma Israel inap palu arik watfareg at ombolim laruk lit Yordan tonggoma wambibag.

²⁸Ehud inowen it unubam ele uruk lit, ”NINIKNI Allahn Moab inap hit men seli roho werehon arimano hininggikmu emberisi angge re folo-folo an men lulen maniyek!” ibag. Ari ibagma Israel inap arimano Ehud ombolim laruk lit ik Yordan paloho nindig atuk ambeg arimano ilmig tik libag. Ilmig tibagma ap seliyonen ik Yordan paloho nindig amul peruk latfag angge famen nindig am fug teg latfag.

²⁹Ari turuk latfag li Moab inap inine roho wereg lit enehako roho turuk latfag angge famen Israel inaben Moab inap arimano teng obog sehelet obog 10.000 unusurukmu ap misig oho wilip atuk latfag fug.

³⁰Ari roho turuk lit Israel inaben Moab inap apmayap enepfag sambil ino famen tulug Israel inap arimano inindi yuwag toho weregman eneg mo ilig am wirig am turukmu teng hinahan atfag.

³¹Ehud ino war atfagma Anat amloho Samgar ino ap suwon in atfag. Samgar inowen wanggun wam sapi hondog eneplug laruk angge fam Filistin inap teng falfalik fimahen 600 pinggi unusibag. Ari roho turuk lit aren oho Israel inap windat eneptuk latfag.