Read Angguruk Yali HAKIM-HAKIM 5 Bible Online

HAKIM-HAKIM 5 - Angguruk Yali bible

HAKIM-HAKIM 5

¹Sisera umalikisi men unusibag sambil hiyap Debora men hun Abinoam amloho Barak menen sini yunggultuk latfahon tu:

²”Israel inap tog abul ulug inindi enehiyeg toho laruson fahet NINIKNI Allah wel turuk lamek!

³Anden NIKNI Allah fahet sini yunggultuk latmin. Israel ninap Ninikni sini fam wel timinon ap suwon-suwon, hit palimu welahebon hinisanggo fano holeg lamek!

⁴NIKNI Allah, Hat tom Seir famen waharikin. Hat o Edomen wilip atuk lit kinang sobit-sobit larukmu o mek tirisi, pohol fo roho osit wambik waharisi, hinan oho osit humon pilabik waharisi.

⁵Israel ninap Ninikni Allah indam tom Sinai fam wambik watfag ahun ino waharukmu tom obog toho yuk tirisi.

⁶Hun Anat amloho Samgar welatfag li oho hiyap Yael welatisi li oho huhulangge hilaruk inaben kalemma kahaltuken nungge-nungge ayeg waroho wul ulug o pumbuk eke la eke la turuk ane eleg atisi. Ap enekolen anggen ke hirag-hirag laruk latusa.

⁷Yabuk wituk inaben oho yabuk wit ta fug angge weregma o pumbuk ap enele teng atisimu hat Debora, nit Israel ninap nunubahet ninisinga in atikin.

⁸Israel inap arimanowen ap winonen wel eneptuk angge yami ruruk latusama tog aptuk ane it enengginangma inam atisi angge famen Israel inap teng-teng angge 40.000 yet isarukmen tog men sing men it ininggikmu eleg latisi.

⁹Israel inap milal eneptukon arimano an nindi isaruk lahi. Israel inap tog abul ulug enembong se roho laruson fahet NINIKNI Allah wel turuk lamek!

¹⁰Hit wam keledai kuron fam lahalug laruk lahebonen oho hit ilit fanowon tuwaloho heriyeg lahebonen oho hit kalemma laruk lahebonen oho ap seliyon apmayap eneptukuk ane ap hiyag isaruk lamuhup!

¹¹Ik hinangguruk ambehen aben sini enehiyeg toho yunggultuk lit NINIKNI Allahn let neneptisi ulug wel turuk. Aren umalikisi Israel ninap yabuk wituk laheyon ninibil atisi ulug fog turuk. Allah umalikisi tog abul ulug o pumbukmuwen wilip atusa.

¹²Debora in amin, in amin! In atmihinteg sini eke imihin! Abinoam amloho Barak wilip amin! Ap seliyon ininggik hele waroho lit eneplug watmihin!

¹³We tor angge werehon arimano onowesi enembeg palu arik waharusa. Allah umalikisi Ninikni fahet tog abul ulug sehen seneko waharusa.

¹⁴Efraim inap tonggoma waharusareg Benyamin inap luhaloho larukmu onombolim larusa. Makhir inap onowesi milal eneptukon oho waharusa. Zebulon inap iniknisi sen enesuhon oho waharusa.

¹⁵Isakhar inap fet enesuhon oho Debora men ambiyeg larusa. Isakhar inap larusama hun Barak oho larisi. At ombolim laruk lit tog abul ulug tonggoma kurusa. Ruben inap enele anggolo sahaltuk lit pok atusa.

¹⁶Nungge fahet wam eneg fet enesug lit pok atuk latikip? Wam foroho inaben enembohom wol eneptuk ane eneg holeg lit welamul ulug waharikip fug? Ruben inaben enele urukmen warukmen eneg waharusa fug.

¹⁷Gilead ik Yordan paloho fima fil ninibam yugmu welahe ulug pok atusa. Dan inap nungge fahet ik ahum ke kou fam kulug laruk ane fahet eneg wenggel haruk lit waharusa fug? Asyer inap ik saho ahik ayegma heriyeg lit winama lahuk fug peruk lit welatusa.

¹⁸Zebulon inap fano nunusukag peruk lit enembong se roho tog elma larusa. Naftali inap oho enekol eleg toho tog asilimu larusa.

¹⁹Kanaan inap onowesi suwon tog abul ulug o Megido horogma o Taanakh ik ayegma waharusa angge famen perak fano-fano angge huhulangge hilarusa fug.

²⁰Suhal pohol ke larukonen oho Sisera men tog aptuk latusa.

²¹Ik Kison wal tilmu unuk suwalfag ahik ino oho ine roho waharuk lit og eneptuk latisi. Nine roho unduhuk lit sini yunggultuk latmin!

²²Tog abul ulug wam kuda fam lahalug folo-folo laruk lit unuyug aplohok folung-folung laruk latusa.

²³Allah ot malaikat inowen ele uruk lit, ’Meros inap huluwap eneplihip!’ irisi. ’Iren sehen seneko NINIKNI Allah men ambiyeg tog abik waharusa fugmu mondabi war amag ulug huluwap enebiyek!’ irisi.

²⁴Keni ahun Heber uhe Yael ino Allahn foroho laruhu! Allahn hiyap winon inibam o saboma werehon indi enesug ane apma regma Yael ino indi anggolo reg laruhu!

²⁵Hun Sisera inowen ik heng tirisimu wam sapi ag owe og itisi. Kubag fanowon fam hinang itisi.

²⁶Inggiken wanggun lisoho warisi. Inggik pikironen o wituk lit teltuk angge oko walug Sisera unggul arap toho tele feserisi. Wanggun fam uwal fiman fima ahako folok toho ware feserisi.

²⁷Hun ino waroho Yael uyug alma ying atisi. Yinggig latisi ambeg itano mondabi war atisi.

²⁸Sisera isinga ino olma wereg lit keyenteg fo reg keyen namloho waharuk ano ulug pen haruk latisi. Ele hi roho uruk lit, ’Nungge fahet wam kudan lisoho walug laruk angge waharuk eleg? Nungge fahet wam kuda waharuk lit eneplohok uruk eleg?’ irisi.

²⁹At amingmingangge hiyap indi anggat tehonen hebeloho hiyag itisimu Sisera isingan indimu wenggel haruk lit nin uruk latisi.

³⁰’Ap unusuruk lit huhulangge heleheson arimano ap wal taneg fibituk lit amusun turuk. Ap wal-wal hiyap tuhumon misig ano piren ano og isalusa lit teg. Sisera inowen sum fanowon hilamisi lit teg. An nanggolopma wan tahukon sum fanowon hesenggengge palehon og nirik watmisi ano,’ ulug Sisera isinga hiyag itisi.

³¹Ninikni Allah, ari hag toho ap Hat men seli roho wereg inap obog toho siyag amuhup. Ap Hat inindi hasuhon mo il ine roho yatukon hag toho mondabi fano welamuhup,” ulug Debora men Barak menen sini yunggultuk latfag. Hun Sisera ware fisibagma Israel inap inindi yuwag toho weregman eneg mo teng misigmen nubam hilag nuwalen 40 libag.