Read Angguruk Yali HAKIM-HAKIM 6 Bible Online

HAKIM-HAKIM 6 - Angguruk Yali bible

HAKIM-HAKIM 6

¹Welatfareg Israel inaben NINIKNI Allahn siyag peruk ane eneg turuken Allahn Midian inap ininggikmu imbisibagma

²Midian inaben Israel inap siyahap eneptukmen eneg mo sabiren libag. Mo sabiren larukmu Israel inaben Midian inap fahet enekol toho wereg lit o pumbukmu embeselug tom fene o hirako wirig latfahon arimano men owikmu men hirag arik laruk latfag.

³Ari roho turuk lit Israel inaben yabuk obog toho wiri ferukmu Midian inap men Amalek inap men yali fil welatfag inap arimano menen Israel inap unusul ulug

⁴o sabo wiroho waharuk lit Israel inap iniyabuk siyahap til laruk lit o Gaza horogma imbisik laruk latfag. Ari roho mo eke fam eke fam turukmen eneg wam domba, sapi, keledai, mun angge man angge hilaruk lit Israel inaben naruk angge obog toho mondabi eleha fisibag.

⁵Eleha feseruk lit enembohomet ungga saloho nohoruk anggeyet mun angge man angge walug waharuk lit helem inini anggolowen winag isa fug teg hag toho ap wam unta fam lahalug waharuk latfahon arimano luhaloho kik watfareg Israel inap inibam harep pisako siyahap eneptuk latfag.

⁶Ari roho siyahap eneptukmen eneg Israel inap enenggengge obog eleg atfagma enele hi roho let nenebin ulug Allah fam uruk latfag.

⁸Uruk latfagma NINIKNI Allahn amingmingangge nabi misig monde fibahon ino Israel inap enembeg libareg hiyag isaruk lit, ”Israel hinap Hinikni Allahn ele urukon tu holeg lamek, ’O Mesir inaben hit hininggik lisoho mingming heneptuk latfag ambehen Anden hit hondog heneplug wilip atik iyag.

⁹Mesir inap men ap winon menen siyahap heneptukmu Anden hit it ininggikmuwen taluk heneptuk latikik. Taluk heneptuk lit hit honolohotman yanggal eneplug it enengginang hit og hisaruk latikik.

¹⁰Og hisaruk lit Anden hit hunubam, ’Hit HINIKNI Allah An tu welahi, Amori inap enengginang hit welahep ambeg tumonen tu Allah hag toho wereg perukon hiren wel eneptuk lamuhup fug,’ irikik angge famen hiren An nele holtikip fug,’ ehek,” ulug hiyag isibag.

¹¹Hiyag isibareg weregma hun Yoas amloho Gideon ino Midian inaben yet niyalug nuwabuhup ulug o Ofra hirahoma wereg lit suburu roti anggen waruk latfag. Warukmu NINIKNI Allah ot malaikat ino e wali Gideon ikni unggul unuk Abiezer ahun Yoasen tohon alma hur arik watfag.

¹²Watfareg malaikat ino Gideon olohotma inam arik libareg at ubam ele uruk lit, ”NINIKNI Allahn hat hahako roho turuk hahun welahenon let habuhu,” ulug hi ribag.

¹³Ari ulug hi ribagma Gideonen malaikat fam hiyag utuk lit, ”Ah Nikni, Allahn let heneptuk ehen angge famen nungge fahet nit siyag toho welahe? NINIKNI Allahn indam nunumbasi let eneptuk lit iniline aben tuk fug teg ane turuk latfag hag toho nit niniline inam atukmu yet haruk lahe fug. Nunumbasiyen nit hiyag nisaruk lit, ’NINIKNI Allahn o Mesiren hondog neneplug wilip atfag,’ ulug tintiltuk latfag angge famen ketiya NINIKNI Allahn nit Midian inap ininggikmu hik nisarisi,” ulug hiyag itfag.

¹⁴Hiyag itfagma NINIKNI Allahn hebeloho hiyag utuk lit, ”Hine roho laruk lit Israel inap arimano Midian inap ininggikmuwen windat enebik lahun ulug Anden hat mon haptuk lahi,” ulug hiyag itfag.

¹⁵Hiyag itfagma Gideonen, ”Ah Nikni, nungge fam Israel inap windat enebuhuk? Nununggul unuk Manasye ninap misig angge famen nonori winonen an nikniyen indag nenesuhon fahet siyag peruk ninap welahe. An nebe oho nine mondabi eleg toho welahi,” ulug hiyag itfagma

¹⁶NINIKNI Allahn ubam ele uruk lit, ”Anden let haptuk laruhukmu haren Midian inap apmayap eneptuk lit obog toho unusuhun,” ulug hiyag itfag.

¹⁷Hiyag itfagma Gideonen te, ”Haren an hindi nasug lahen halug anden we tem toho NINIKNI Allahn hiyag nerehek peminen enehangge wal hamihinmu yet hamin.

¹⁸An suburu wak laminteg og hirik watminmu eneg lamihinen tiya welamin,” ibagma Allahn te, ”Fano, An tiya weregma hat watmihin,” ulug hiyag itfag.

¹⁹Hiyag itfagma Gideon olma kibareg wam kambing umalik misig waroho esetfareg suburu roti anggen sum misig 10 kilogram roti suwap turuk angge ragi embeselug wiratfareg wam osohowon ino kou fam kilaboho wam ahaluwe kubag fam pilaboho walug watfareg malaikat e wali alma weregma imbik watfag.

²⁰Imbik watfagma malaikat inowen, ”Wam men roti men wamihinteg helep tu fam imbik lahin! Wam ahaluwe oho hilil isimin!” ulug hiyag itfag ane roho Gideon inowen tibag.

²¹Tibagma malaikat inowen wanggun inggikmu seneg latfahon ino ambiyangen wam men roti men imbibahon arimano tung hibagma helep ino famen indok ambulpul wilip atfareg wam men roti men obog toho nibag. Obog toho narukmu malaikat ino Gideon olohotman longgo ibag.

²²Longgo ibagma Gideon ino NINIKNI Allahn malaikat nambeg monde fehek ulug oluk atfareg ele uruk lit, ”Yihi, NIKNI suwon Allah, malaikat nambeg monde fik wahenma an nilen yet hihi,” ibag.

²³Ibagma NINIKNI Allahn Gideon fam ele uruk lit, ”Hakol ha fug angge hindi yuwag toho welamin. War aruhun fug,” ibag.

²⁴Ibagma Gideon inowen malaikat inam atfag ambeg ino NINIKNI Allah fahet hubu lahaptuk ambeg eke wiri fibareg unuk ”NINIKNI Allah ap fanowap eneptukon inam aha ambeg” ulug suwalfag. Unuk suwalfag ambeg ino ketiya oho Abiezer inap wereg ambeg o Ofra wereg.

²⁵O ino sambil hubanggo NINIKNI Allahn Gideon fam ele uruk lit, ”Hat hikni ambohom sapi abon mo sabiren welatisiyon ino wamihinteg hikniyen tu Allah hag toho wereg perukon Baal fahet hubu lahaptuk ambeg halog tebesemihinteg hubu lahaptuk ambeg iraham ninisinga poholmon wereg perukon Asyera fahet pilabeg ahan ino paloho hik isamihin.

²⁶Hik isamihinteg punu ino fam An hat HIKNI Allah fahet hubu lahaptuk ambeg eke fano roho wiri femihin. Wiri femihinteg wam sapi wamihinon ino waroho e paloho hik isamihinon ino fam An fahet yale fesemihin,” ulug hiyag itfag.

²⁷Ari ulug hiyag itfagma Gideon inowen amingmingangge numen og enepfareg NINIKNI Allahn hiyag itfag ane hikit toho tibag. Anden unukoho turukmu an nori men o pumbuk aru fam werehon menen yet niyalug nuwabuhup tohon ulug Baal fahet hubu lahaptuk ambeg ino hubanggo halog tibisibag.

²⁸Halog tibisibagma likiyamon o pumbuk ino fam welatfag inap arimano in atfareg yet harukmen Baal fahet hubu lahaptuk ambeg halog tegman Asyera fahet pilabeg ahan ino pale fisibareg Allah fahet hubu lahaptuk ambeg keron wiri fibahon ino fam wam sapi ino waroho yale fisibagma yet hibag.

²⁹Yet hibareg it-it enele sahaltuk lit, ”San tehek?” ulug ap umung enebil larukmen aben te, ”Yoas amloho Gideon inowen tehek,” ulug hiyag isibag.

³⁰Hiyag isibagma o pumbuk ino fam welatfag inaben Yoas fam hiyag utuk lit, ”Hat hamlohowen Baal fahet hubu lahaptuk ambeg halog tebesehekteg Asyera fahet pilabeg ahan oho paloho hik esehekma ware fusulen wilip nisa ma!” ulug Yoas hiyag itfag.

³¹Hiyag itfagma Yoas inowen ap at iraham luhal arik watfahon arimano obog toho unubam hiyag isaruk lit, ”Hiren Baal ibil atuk lit let turuk lamuhuk peruk lahep? Ap san Baal let turuk halug o sono mo uwan lahik wam fugmu o yoho eneg war atmisi. Baal ino we tik-tem toho Allah hag toho wereg halug at fahet hubu lahaptuk ambeg halog tehek ahun ari inggarehen watmisi,” ulug hiyag isibag.

³²Yoas inowen te, ”Gideonen hubu lahaptuk ambeg halog tehekma Baal ine halug inggarehen Gideon watmisi,” ibag ane ino fahet ap welatfahon arimanowen Gideon unuk keron Yerubaal suwalfag.[4]

³³Welatfagma Midian inap men Amalek inap men mo lahik waharuk fil welatfahon arimano mangno roho ik Yordan paloho watfareg Yizreel tonggoma o sabo wiroho welatfag.

³⁴Weregma NINIKNI Allah ahime fanowon inowen hun Gideon ineyap turukmu pinggong ele hum toho watuk lit Abiezer inap an nombolim lalihip ulug wol enepfag.

³⁵Wol enepfareg Asyer inap, Zebulon inap, Naftali inap, Manasye inap ik Yordan fuma-fuma werehon arimano obog toho wol eneplihip ulug ap mon enepfagma it arimano oho Gideon let tuhuk ulug ambeg watfag.

³⁶Watfagma Gideon inowen Allah fam ele uruk lit, ”Haren te, ’An hat feneyen Israel inap windat enebuhuk,’ irikin ane tem toho irisi peminen

³⁷wam domba oruk paloho roti anggen waruk ambeg emberuk lahiyon tu fam eneg hibilil wambik watmisireg kinang walinggoho werehon lilog teg latmisimu Allahn tem toho hiyag nitisi ulug noluk atmisi,” ulug heng tibag.

³⁸Heng tibareg likiya Gideon ino ha libareg yet harukmen hibilil wam domba oruk imbibahon ino fam wambik watfagma lisoho wibareg pete harukmen kubag misig ololop atfag.

³⁹Ololop atfagma Gideon inowen Allah fam ele uruk lit, ”Nin eke heng hapminon fahet holok ha fug. Anden nin eke wal haruk lit wam oruk paloho emberuk lahiyon aru lilog tegma iraham ke kinang obog toho hibilil wambik watmisimu filik atmisi,” ulug ele pirenehon heng ibag.

⁴⁰Heng ibag ane hikit toho Allahn hibilil pilabik watfagma wam oruk paloho imbibahon lilog tegman iraham ke kinang obog toho filik atfag.